The Phnom Penh Post Search

Search form




Logo of Phnom Penh Post newspaper Phnom Penh Post - លោកនាយក​រដ្ឋមន្ត្រី៖ អគ្គលេខាធិការ​អាស៊ាន​គាំទ្រ​កម្ពុជា​ក្នុង​ការដោះស្រាយ​វិបត្តិ​នៅ​មីយ៉ាន់ម៉ា

លោកនាយក​រដ្ឋមន្ត្រី៖ អគ្គលេខាធិការ​អាស៊ាន​គាំទ្រ​កម្ពុជា​ក្នុង​ការដោះស្រាយ​វិបត្តិ​នៅ​មីយ៉ាន់ម៉ា

Content image - Phnom Penh Post
លោកនាយក​រដ្ឋមន្ត្រី ហ៊ុន សែន និង​លោក លឹម ចុក ហ៊ុយ អគ្គលេខាធិការ​អាស៊ាន កាលពី​ថ្ងៃ​ម្សិលមិញ​។ រូបថត SPM

លោកនាយក​រដ្ឋមន្ត្រី៖ អគ្គលេខាធិការ​អាស៊ាន​គាំទ្រ​កម្ពុជា​ក្នុង​ការដោះស្រាយ​វិបត្តិ​នៅ​មីយ៉ាន់ម៉ា

ភ្នំពេញៈ លោកនាយក​រដ្ឋមន្ត្រី ហ៊ុន សែន បាន​អះអាងថា អគ្គលេខាធិការ​អាស៊ាន​លោក លឹម ចុក ហ៊ុយ (Lim Jock Hoi) ​គាំទ្រ​គោលបំណង​របស់​កម្ពុជា​ក្នុងការ​ដោះស្រាយ​វិបត្តិ​នៅ​មីយ៉ាន់ម៉ា ដែល​ស្របទៅនឹង​កិច្ចព្រមព្រៀង​ទាំង ​៥ ចំណុច​របស់​មេដឹកនាំ​អាស៊ាន​។ ​លោក​ក៏បាន​ស្នើ​លោក​ Hoi​ ជំរុញ​ប្រទេស​ទីម័រ​ខាងកើត ចូល​ជា​សមាជិក​អាស៊ាន​ថ្មី​នាពេលខាងមុខ​ផងដែរ​។

ទំព័រ​ហ្វេសប៊ុក​លោក ហ៊ុន សែន បញ្ជាក់​នៅ​ថ្ងៃទី​ ១៧ មករា​ថា​៖ «​ទាក់ទង​ទៅនឹង​ស្ថានភាព​នៅ​មីយ៉ាន់ម៉ា ឯកឧត្តម​ក៏បាន​គាំទ្រ​នូវ​គំនិត​ផ្ដួចផ្ដើម​របស់​កម្ពុជា​ជាពិសេស​គោលបំណង​របស់​កម្ពុជា​​ដែល​បាន​អនុវត្ត​ស្រប​ទៅ​ចំណុច​ទាំង​ ៥ [​កុងសង់ស៊ីស​] ​នោះ​»​។

ការបង្ហោះ​សារ​លើ​ហ្វេសប៊ុក​នេះ​ធ្វើឡើង​ បន្ទាប់ពី​លោក ហ៊ុន សែន មាន​ជំនួប​ជាមួយ​លោក Hoi នៅ​ថ្ងៃទី​ ១៧ មករា ដែលជា​ផ្នែក​មួយ​​នៃ​ការ​មក​បំពេញ​ទស្សនកិច្ច​នៅ​កម្ពុជា​ចាប់ពី​ថ្ងៃទី​ ១៥ ដល់ទី​ ១៩ ខែមករា ដើម្បី​ស្វែងរក​មធ្យោបាយ​ពង្រឹង​អាស៊ាន​ឱ្យ​ល្អប្រសើរ និង​ស្អិតល្មួត​ខ្លាំង​ឡើងវិញ បន្ទាប់ពី​សមាគម​មួយ​នេះ​ប្រឈម​បញ្ហា​ផ្ទៃក្នុង​។

អាស៊ាន​ជួប​វិបត្តិ​ផ្ទៃក្នុង ក្រោយ​មេដឹកនាំ​យោធា​មីយ៉ាន់ម៉ា​លោក មីន អ៊ុងឡាំង ​(Min Aung Hlaing)​ ធ្វើ​រដ្ឋប្រហារ​ទម្លាក់​រដ្ឋាភិបាល​ជាប់ឆ្នោត​ដែល​ដឹកនាំ​ដោយ​លោកស្រី អ៊ុងសាន សូជី កាលពី​ខែកុម្ភៈ ឆ្នាំ​ ២០២១​។ មេដឹកនាំ​យោធា​រូបនេះ មិន​ត្រូវបាន​អញ្ជើញ​ឱ្យ​ចូលរួម​កិច្ចប្រជុំ​កំពូល​មេដឹកនាំ​អាស៊ាន​កាលពី​ខែតុលា ឆ្នាំ​ ២០២១ ដោយ​មូលហេតុ​មិនបាន​​អនុវត្តតាម​កិច្ចព្រមព្រៀង​ទាំង​ ៥​ ចំណុច​របស់​អាស៊ាន​ដែល​ក្នុងនោះ​តម្រូវ​​ឱ្យមាន​ការបញ្ឈប់​អំពើហិង្សា​ផងដែរ​។

ទំព័រ​ហ្វេសប៊ុក​ដដែល​បន្តថា​៖ «​សម្ដេច​តេជោ​ក៏បាន​ជម្រាបជូន​ឯកឧត្តម​អគ្គលេខាធិការ​អាស៊ាន​ជំរុញ​ក្នុងការ​រៀបចំ​កិច្ចប្រជុំពេញអង្គ ដើម្បី​ធ្វើ​សកម្មភាព​មនុស្សធម៌​ជួយ​ដល់​មីយ៉ាន់ម៉ា​ដែល​កន្លងមក​ប្រទេស​ជប៉ុន​ក៏បាន​គាំទ្រ​ចំពោះ​គំនិត​បង្កើត​កិច្ចប្រជុំ​ដើម្បី​សកម្មភាព​មនុស្សធម៌​ជួយ​ដល់​ប្រទេស​មីយ៉ាន់ម៉ា​នេះ​ផងដែរ​»​។

លោក​ប្រា​ប់លោក Hoi ថា គោលបំណង​របស់លោក​ទៅកាន់​មីយ៉ាន់ម៉ា​​កាលពី​ថ្ងៃទី​ ៧-៨ ខែមករា គឺ​ធ្វើ​យ៉ាងណា​ ដើម្បី​ឱ្យមាន​បទ​ឈប់​បាញ់ បញ្ឈប់​អំពើហិង្សា ផ្ដល់ជំនួយ​ដល់​ប្រជាជន​​មីយ៉ាន់ម៉ា​ដែល​ត្រូវការ​ចាំបាច់ និង​បើក​ច្រកទ្វារ​នៃ​ការចរចា​រក​ដំណោះស្រាយ​​ជាពិសេស​សម្រាប់​ការងារ​ប្រេសិត​ពិសេស​អាស៊ាន​។

Content image - Phnom Penh Post
លោក​ ហ៊ុន សែន ពេល​ជួប​លោក Lim Jock Hoi ពីថ្ងៃ​ ១៧ មករា​។ រូបថត SPM

លោកនាយក​រដ្ឋមន្ត្រី​ក៏បាន​ប្រាប់​លោក Hoi អំពី​គំនិត​ផ្ដួចផ្ដើម​របស់លោក​ដែល​ស្នើឡើង​ក្នុងការ​ជំរុញ​ដំណោះស្រាយ​វិបត្តិ​នៅ​មីយ៉ាន់ម៉ា​ឱ្យ​ទៅមុខ​តាមរយៈ​ការបង្កើន​យន្តការ​ត្រីភាគី​ចូលរួម​ដែលមាន​កម្ពុជា​ធ្វើជា​ប្រធាន​អាស៊ាន​ឆ្នាំនេះ ប្រ៊ុយណេ​ដែលជា​ប្រធាន​អាស៊ាន​ឆ្នាំមុន និង​ឥណ្ឌូនេស៊ី​ដែលជា​ប្រធាន​អាស៊ាន​ឆ្នាំក្រោយ បូក​ជាមួយនឹង​អគ្គលេខាធិការ​អាស៊ាន​ដើម្បី​ធ្វើការ​ជាមួយ​គ្នា​។

លោក ហ៊ុន សែន បានស្នើ​ឱ្យ​លោក Hoi ជួយ​ជំរុញ​ការគាំទ្រ​ដល់​សមាជិក​ភាព​របស់​ប្រទេស​ទីម័រ​ខាងកើត ចូល​ជា​សមាជិក​អាស៊ាន​នាពេល​ខាងមុខនេះ ដោយ​លោក​លើកឡើងថា​៖ «​យើង​បានធ្វើ​ការងារ​នេះ​ ១១​ ឆ្នាំ​ហើយ ដែល​ប្រទេស​នេះ​បាន​រង់ចាំ​យូរហើយ​»​។

ទាក់ទង​នឹង​សមាជិកភាព​របស់​ប្រទេស​នេះដែរ ហ្វេសប៊ុក​លោក​ ហ៊ុន សែន អះអាងថា លោក Hoi នឹង​បន្ត​ផ្ដល់​ការគាំទ្រ​ផ្ដល់​ការបណ្ដុះបណ្ដាល​សមាសភាព​ដល់​មន្ត្រី​នៃ​ប្រទេស​ទីម័រ​ខាងកើត​នេះហើយ​អ្វីដែល​លោក Hoi ចង់ឃើញ​គឺ​វឌ្ឍនភាព​នៃ​ការត្រៀម​ចូល​ជា​សមាជិក​ថ្មី​របស់​ទីម័រ​ខាងកើត​ក្នុង​សមាជិក​អាស៊ាន​នេះ​។

លោក រ៉ូ វណ្ណៈ សហស្ថាបនិក​វិទ្យាស្ថាន​ប្រជាធិបតេយ្យ​កម្ពុជា​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ១៧ មករា​ថា ទស្សនកិច្ច​របស់​អគ្គលេខាធិការ​អាស៊ាន​មកកាន់​កម្ពុជា​នៅពេលនេះ​គឺជា​ការលើកកម្ពស់​កិច្ច​សហប្រតិបត្តិការ​ជាមួយ​កម្ពុជា​ក្នុងនាម​ជា​ប្រធាន​ប្តូរ​វេន​អាស៊ាន​ផង និង​សម្របសម្រួល​ការងារ​ដែល​កម្ពុជា​អាច​ស្នើសុំ​ជួយ​រឿង​ជំនួយ​មនុស្សធម៌​ទៅ​មីយ៉ាន់ម៉ា និង​អាច​បញ្ហា​ក្រម​ប្រតិបត្តិ​ស្តីពី​សមុទ្រ​ចិន​ខាងត្បូង​ផងដែរ​។

បើតាម​ហ្វេសប៊ុក​លោក ហ៊ុន សែន លោក​បានស្នើ​សុំឱ្យ​អគ្គលេខាធិការ​អាស៊ាន​ជួយ​ចូលរួមចំណែក​ក្នុង​ការលើក​ទឹកចិត្ត​ក្នុងការ​ចរចា​លើ​ក្រម​ប្រតិបត្តិ​ស្តីពី​សមុទ្រ​ចិន​ខាងត្បូង ​(COC) ​ឱ្យបាន​ដំណើរការ​ទៅមុខ​។

ហ្វេសប៊ុក​លោក ហ៊ុន សែន អះអាង​ថា លោក Hoi នឹង​ខិតខំ​ជំរុញ​ការអនុវត្ត​សេចក្តីប្រកាស​ស្តីពី​ក្រម​ប្រតិបត្តិ​សម​ភាគី​សមុទ្រ​ចិន​ខាង​ត្បូង​ (DOC) ជាពិសេស​អាច​ផ្ដល់​ទីតាំង​អគ្គលេខាធិការ​អាស៊ាន​ក្នុង​ការរៀបចំ​កិច្ចប្រជុំ​ទាំងឡាយ​ដើម្បី​ធ្វើ​យ៉ាងណា​ឱ្យមាន​វឌ្ឍនភាព​នៃ​ការចរចា​ទៅលើ COC​។

លោក ហ៊ុន សែន ធ្លាប់បាន​ប្រាប់​​រដ្ឋមន្ត្រីការបរទេស​ថៃ​លោក ដន ប្រាម៉ាត់ វីណៃ ​(Don Pramudwinai)​ កាលពី​ខែធ្នូ ឆ្នាំ​ ២០២១ ថា ជំហរ​របស់​កម្ពុជា​ពាក់ព័ន្ធ​នឹង​សមុទ្រ​ចិន​ខាងត្បូង​នោះ​គឺ​ត្រូវ​ជំរុញ​ការអនុវត្ត​ឱ្យបាន​ខ្ជាប់ខ្ជួន​តាម​សេចក្តីប្រកាស​ស្តីពី​ក្រម​ប្រតិបត្តិ​សមភាគី​សមុទ្រ​ចិន​ខាងត្បូង និង​ឱ្យ​ប្រទេស​ដែលមាន​ការពាក់ព័ន្ធ​នឹង​ជម្លោះ​សមុទ្រ​ចិន​ខាងត្បូង​ចរចា​គ្នា​ ​និង​ខំប្រឹងប្រែង​ធ្វើយ៉ាងណា​សម្រេច​ COC ​ឱ្យបាន​នៅពេលដែល​លោក​ធ្វើជា​ប្រធាន​អាស៊ាន​ឆ្នាំ​ ២០២២​។

លោក ហេង គីម​គង់ អ្នកស្រាវជ្រាវ​ជាន់ខ្ពស់​នៃ​មជ្ឈមណ្ឌល​អភិវឌ្ឍន៍​កម្ពុជា ប្រាប់​ភ្នំពេញ​ប៉ុស្តិ៍​នៅ​ថ្ងៃទី ​១៧ មករា ថា ក្នុងនាម​ជា​ប្រធាន​អាស៊ាន វា​មាន​សារៈសំខាន់​ណាស់​សម្រាប់​កម្ពុជា​ក្នុងការ​ស្វែងរក​ការគាំទ្រ​ពី​អគ្គលេខាធិការ​អាស៊ាន និង​ភាគី​ពាក់ព័ន្ធ​ដើម្បី​ស្វែងរក​ដំណោះស្រាយ​ចំពោះ​ជម្លោះ​សមុទ្រ​ចិន​ខាងត្បូង​។

លោក​ថ្លែងថា​៖ «​ប្រសិនបើ​កម្ពុជា​អាច​សម្របសម្រួល​ដល់​ការបញ្ចប់​ COC នៅ​ឆ្នាំនេះ មុខមាត់​របស់​កម្ពុជា​នឹង​ប្រសើរ​ឡើង​យ៉ាងខ្លាំង​»៕

អត្ថបទគួរចាប់អារម្មណ៍