ភ្នំពេញៈ គណៈកម្មាធិការជាតិរៀបចំការបោះឆ្នោត គ.ជ.ប បានបិទបញ្ចប់ការទទួល និងការដោះស្រាយពាក្យបណ្តឹងក្នុងដំណាក់កាលនៃការបិទផ្សាយនូវបញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវលុបឈ្មោះចេញពីបញ្ជីបោះឆ្នោតឆ្នាំ ២០២១ បន្ទាប់ពីក្រុមប្រឹក្សាឃុំសង្កាត់នៅទូទាំងប្រទេសទទួលបានពាក្យបណ្តឹងសរុបចំនួន ៣៦ បណ្តឹង។
យោងសេចក្តីប្រកាសព័ត៌មានរបស់ គ.ជ.ប បានឱ្យដឹងថា គិតត្រឹមថ្ងៃទី ១៤ ខែមករា ឆ្នាំ ២០២២ ក្នុងដំណាក់កាលបិទផ្សាយនូវបញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវលុបឈ្មោះចេញពីបញ្ជីបោះឆ្នោតឆ្នាំ ២០២១ ក្រុមប្រឹក្សាឃុំសង្កាត់ (កបឃ.ស) ទូទាំងប្រទេសបានទទួលពាក្យបណ្តឹងសរុបចំនួន ៣៦ បណ្តឹង ដែលសុទ្ធសឹងតែជាពាក្យបណ្តឹងតវ៉ា។ ដោយឡែកនៅថ្នាក់ គ.ជ.ប និងនៅថ្នាក់ក្រុមប្រឹក្សាធម្មនុញ្ញ ពុំទាន់ទទួលបានពាក្យបណ្តឹងណាមួយឡើយ។
អគ្គលេខាធិការរង គ.ជ.ប លោក សោម សូរីដា ប្រាប់ភ្នំពេញប៉ុស្តិ៍ថា ការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវលុបឈ្មោះចេញពីបញ្ជីបោះឆ្នោតមានរយៈពេល ១០ ថ្ងៃ គិតចាប់ពីថ្ងៃទី ៣ មករា ដល់ថ្ងៃទី ១៣ មករា ឆ្នាំនេះ។
លោកបន្តថា គិតមកទល់ថ្ងៃបិទបញ្ចប់នេះ គ.ជ.ប ទទួលបណ្តឹងសរុបចំនួន ៣៦ បណ្តឹង ដោយលោកចាត់ទុកថា គឺជាតួលេខមួយដែលបង្ហាញពីប្រសិទ្ធភាពរបស់ក្រុមការងារចុះឈ្មោះបោះឆ្នោត ដែលបានយកចិត្តទុកដាក់លើការងារនេះ ទើបពុំសូវមានកំហុសឆ្គង។
លោកថា៖ «៣៦ បណ្តឹងនេះជាតួលេខមួយយើងថា ច្រើនក៏បានថា តិចក៏បាន ប៉ុន្តែថាច្រើនមានន័យថា បងប្អូនប្រជាពលរដ្ឋគឺបានទៅមើលឈ្មោះខ្លួនហើយ ដូចនេះបង្ហាញពីប្រសិទ្ធភាព និងសមត្ថភាពការងាររបស់ក្រុមការងារចុះឈ្មោះបោះឆ្នោត»។
លោកបានឱ្យដឹងថា ក្នុងចំណោមទាំង ៣៦ បណ្តឹងនោះរួមមាន បណ្តឹងខ្លះកំពុងដោះយ ដើមបណ្តឹងសុំដកពាក្យបណ្តឹង យល់ព្រមតាមពាក្យបណ្តឹង និងបានបដិសេធពាក្យបណ្តឹងផងដែរ។
លោក សំ គន្ធាមី នាយកប្រតិបត្តិអង្គការអព្យាក្រឹត និងយុត្តិធម៌ដើម្បីការបោះឆ្នោតនៅកម្ពុជាបានមើលឃើញថា ពាក្យបណ្តឹងចំនួន ៣៦ នេះនៅមានចំនួនតិច បើប្រៀបធៀបនឹងឈ្មោះបោះឆ្នោតជិត ១០ លាននាក់ ដែលបង្ហាញថាប្រជាពលរដ្ឋមិនសូវចាប់អារម្មណ៍លើរឿងនេះ។
លោកបន្តថា៖ «ចំនួនបណ្តឹងនេះតិចមែនទែន បើគិតជាភាគរយព្រោះឈ្មោះបោះឆ្នោតជិត ១០ លាននាក់ ដោយសារប្រជាពលរដ្ឋអត់សូវបានទៅមើលឈ្មោះ នៅសាលាឃុំ សង្កាត់ អ៊ីចឹងទៅបណ្តឹងក៏មានតិចដែរ បើពលរដ្ឋទៅមើលច្រើនគាត់នឹងឃើញការខុសច្រើន ហើយគាត់នឹងមានការតវ៉ា»។
បើតាមលោក សំ គន្ធាមី មូលហេតុដែលពលរដ្ឋមិនសូវបានទៅពិនិត្យមើលបញ្ជីឈ្មោះបោះឆ្នោត ដោយសារពួកគាត់មិនសូវចាប់អារម្មណ៍ ខណៈការផ្សព្វផ្សាយរបស់ គ.ជ.ប មិនទាន់បានទូលំទូលាយ។
លោកថា៖ «ខ្ញុំសម្ភាសពលរដ្ឋដែលអត់បានទៅមើលឈ្មោះបោះឆ្នោតគាត់ (ពលរដ្ឋ) ប្រាប់ថា អត់បានទៅមើលឈ្មោះទេលោកគ្រូអើយ មិនបាច់ទៅមើលទេ គេដឹងលទ្ធផលបោះឆ្នោតហើយ ពីណាជាប់ឆ្នោតគេដឹងមុន ហើយសម្ដីដែលគាត់ប្រាប់យើង អ៊ីចឹងមានន័យថាគាត់មិនសូវចាប់អារម្មណ៍ហើយការផ្សព្វផ្សាយមិនសូវទូលំទូលាយ»។
គ.ជ.ប បានឱ្យដឹងថា ការដាក់ ការទទួល និងការដោះស្រាយពាក្យបណ្តឹងក្នុងដំណាក់កាលនៃការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលត្រូវលុបចេញពីបញ្ជីបោះឆ្នោតឆ្នាំ ២០២១ មាន ៣ ដំណាក់កាល។ ដំណាក់កាលទី ១ ការដាក់ ការទទួលពាក្យបណ្តឹងនៅ (កបឃស) មានរយៈពេល ១០ ថ្ងៃយ៉ាងយូរបន្ទាប់ពីថ្ងៃបិទផ្សាយបញ្ជីបោះឆ្នោតដំបូង និងការដោះស្រាយពាក្យបណ្ដឹងមានរយៈពេល ៣ ថ្ងៃយ៉ាងយូរ បន្ទាប់ពីថ្ងៃបានទទួលពាក្យបណ្ដឹង។
ដំណាក់កាលទី ២ ការដាក់ ការទទួលពាក្យបណ្តឹងនៅ គ.ជប មានរយៈពេល ៥ ថ្ងៃយ៉ាងយូរ បន្ទាប់ពីថ្ងៃបានទទួលសម្រង់សេចក្តីសម្រេច (ទ ១២០៣) របស់ (កបឃ.ស) និងការដោះស្រាយពាក្យបណ្តឹងរយៈពេល ៥ ថ្ងៃយ៉ាងយូរ បន្ទាប់ពីថ្ងៃបានទទួលពាក្យបណ្តឹង។
ចំណែកដំណាក់កាលទី ៣ ការដាក់ ការទទួលពាក្យបណ្តឹងនៅក្រុមប្រឹក្សាធម្មនុញ្ញមានរយៈពេល ៥ថ្ងៃយ៉ាងយូរ បន្ទាប់ពីថ្ងៃបានទទួលសម្រង់សេចក្ដីសម្រេច (ទ.១២០៣) របស់ គ.ជ.ប និងការដោះស្រាយពាក្យបណ្ដឹងរយៈពេល ១០ ថ្ងៃយ៉ាងយូរបន្ទាប់ពីថ្ងៃបានទទួលពាក្យបណ្តឹង។
គ.ជ.ប បានបញ្ជាក់ថា ដំណើរការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតត្រូវបានលុបចេញពីបញ្ជីនៅតាមឃុំសង្កាត់ទូទាំងប្រទេស ឆ្នាំ ២០២១ បានប្រព្រឹត្តទៅដោយរលូនស្ងប់ស្ងាត់គ្មានអំពើហិង្សា និងគ្មានការគំរាមកំហែង។
សូមជម្រាបថា ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី ៥ ឆ្នាំ ២០២២ ត្រូវបានរាជរដ្ឋាភិបាលកម្ពុជាកំណត់យកថ្ងៃទី ៥ ខែមិថុនា ឆ្នាំ ២០២២ ខាងមុខនេះ៕