.jpg)
ប្រឡាយទឹក និងវាលស្រែស្ថិតក្នុងសភាពរីងស្ងួតក្នុងស្រុកព្រះនេត្រព្រះ។ រូបថត ក្រសួងធនធានទឹក
បន្ទាយមានជ័យៈ ប្រជាកសិករក្នុងឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យបានអំពាវនាវសាជាថ្មីដល់អាជ្ញាធរពាក់ព័ន្ធ ដើម្បីជួយអន្តរាគមន៍បូមទឹកសង្គ្រោះដំណាំស្រូវ និងឪឡឹករបស់ពួកគាត់ ខណៈពេលនេះ ទឹកក្នុងប្រឡាយ និងត្រពាំងបានគោករីងអស់ទៅហើយ។
ប្រជាកសិករនៅភូមិអន្លង់វិល ឃុំទឹកជោរ លោក ជឹម ហាច អាយុ ៦២ ឆ្នាំបានប្រាប់ភ្នំពេញប៉ុស្តិ៍ថា ស្រូវប្រាំងរបស់គាត់ជាង ២ ហិកតា កំពុងតែរកកលចង់ខូច ដោយសារតែខ្វះទឹកស្រោចស្រព។ កាលពីថ្ងៃចន្ទសប្ដាហ៍មុន ពួកគាត់បានដាក់សំណើសុំកិច្ចអន្តរាគមន៍ទៅលោកមេឃុំឱ្យជួយទាក់ទងទៅមន្ត្រីធនធានទឹក ដើម្បីជួយបើកបង្ហូរទឹកទំនប់អាងស្ទាក់ទឹកមួយចំនួនមកជួយសង្គ្រោះដំណាំស្រូវប្រាំងរបស់ពួកគាត់ ប៉ុន្តែរហូតមកទល់ពេលនេះ នៅមិនទាន់ឃើញមានទឹកមកដល់នៅឡើយទេ។
លោកថ្លែងថា៖ «នៅពេលនេះ ទឹកតាមថ្លុក ត្រពាំង និង ប្រឡាយបានគោករីងអស់ហើយ។ បើមិនមានការជួយអន្តរាគមន៍បើកបង្ហូរទឹកពីអាងស្តុកទឹកនានាមកជួយទាន់ពេលទេ វានឹងក្រៀមស្វិតងាប់អស់ជាមិនខានទេ»។
ស្រដៀងគ្នានេះ អ្នកស្រី គាង ប៊ុណ្ណារី អាយុ ៥១ ឆ្នាំ ជាប្រជាកសិករនៅភូមិសំរោង ឃុំទឹកជោរ បានប្រាប់ភ្នំពេញប៉ុស្តិ៍ថា ស្រូវប្រាំង ២ ហិកតារបស់គាត់កំពុងប្រែពណ៌ពីបៃតង មក លឿង និងក្រៀមស្វិតជាបណ្ដើរៗហើយ ដោយសារតែបញ្ហាខ្វះទឹក ខណៈរដូវកាលនេះអាកាសធាតុចាប់ផ្ដើមក្ដៅហួតហែងខ្លាំងខុសពីធម្មតា។
អ្នកស្រី ប៊ុណ្ណារី បាននិយាយថា៖ «កាលពីដើមសប្ដាហ៍មុន លោកមេឃុំបានប្រាប់យើងខ្ញុំថា កុំបារម្ភ ២-៣ ថ្ងៃទៀត ទឹកនឹងមកដល់ហើយ ប៉ុន្តែមកទល់ពេលនេះ គ្មានទឹកក្នុងប្រឡាយសូម្បីតែ ១ដំណក់ គឺរីងស្ងួតអស់ហើយ»។
ចំណែកប្រជាកសិករម្នាក់ទៀតនៅភូមិគោកទៀម ឃុំទឹកជោរ លោក កៅ សាញ់ អាយុ ៤៥ ឆ្នាំបានប្រាប់ភ្នំពេញ-ប៉ុស្តិ៍ថា ក្រោយប្រមូលផលស្រូវបង្កើនរដូវ គាត់បានសម្រេចមិនធ្វើស្រូវប្រាំងនោះទេ ប៉ុន្តែគាត់ក៏មិនទុកដីស្រែ ៥ ហិកតារបស់គាត់ឱ្យនៅទំនេរឥតប្រយោជន៍ដែរ គឺ គាត់បានសម្រេចចិត្តដាំឪឡឹក ជំនួសការធ្វើស្រូវប្រាំង ព្រោះដំណាំឪឡឹកប្រើពេលប្រមាណពី ៤៥ ថ្ងៃទៅ ៦០ ថ្ងៃ ប៉ុណ្ណោះអាចប្រមូលផលបានហើយ។ ចំណែកដំណាំស្រូវ គឺត្រូវប្រើពេល ពី ៨៥ ទៅ ១០៥ ថ្ងៃ ទើបអាចប្រមូលផលបាន។
លោក សាញ់ ដែលបារម្ភពីកង្វះទឹកស្រោចស្រពដំណាំឪឡឹករបស់គាត់ផងដែរនោះបាននិយាយថា៖ «ឥឡូវនេះទឹកបឹង និងទឹកប្រឡាយត្រូវគោករីងអស់ទៅហើយ។ ពួកវា [ដំណាំឪឡឹក] នឹងងាប់ ប្រសិនបើគ្មានការបើកបង្ហូរទឹកមកជួយសង្គ្រោះទាន់ពេលវេលាទេនោះ»។
ជុំវិញករណីនេះ លោក លុច ផ មេឃុំទឹកជោរនៃស្រុកព្រះនេត្រព្រះបានប្រាប់ភ្នំពេញ-ប៉ុស្តិ៍ថា គាត់បានដាក់លិខិតស្នើសុំកិច្ចអន្តរាគមន៍លើបញ្ហានេះ ទៅមន្ទីរធនធានទឹកខេត្តបន្ទាយមានជ័យតាំងពីថ្ងៃទី ៨ ខែមករា ២០២២ ហើយកាលពីថ្ងៃចន្ទដើមសប្ដាហ៍មុន ខាងមន្ទីរធនធានទឹកបានផ្ដល់ដំណឹងថា បានបើកបង្ហូរទឹកពីទំនប់អាងស្ទាក់ទឹក ស្ទឹងអាតោក្នុងខេត្តឧត្តរមានជ័យមកហើយ ប៉ុន្តែចម្ងាយផ្លូវវាឆ្ងាយ ហើយមានកសិករនៅផ្នែកខាងលើ គេបូមដាក់ដីស្រែសង្គ្រោះស្រូវប្រាំងគេដែរ ទើបមកទល់ពេលនេះ ទឹកនៅពុំទាន់ហូរមកដល់។
លោក លុច ផ បាននិយាយថា៖ «ក្រោយពីប្រមូលស្រូវបង្កើនរដូវ អាជ្ញាធរយើង បានប្រាប់ហើយថាកុំធ្វើស្រូវប្រាំងច្រើនពេក ប្រយ័ត្នខ្វះទឹក ប៉ុន្តែពួកគាត់មិនស្ដាប់តាមយើងទេ ឥឡូវគ្រាន់តែ ២ ភូមិនាំគ្នាផលិតស្រូវប្រាំងរហូតដល់ជាង ៣០០ ហិកតា ហើយ ២ ភូមិទៀត នាំគ្នាដាំឪឡឹក ដែលមានផ្ទៃដីសរុបជាង ១០០ ហិកតា។ ទាំងស្រូវ និងឪឡឹកវាមានផ្ទៃដីរហូតដល់ ៥០០ ហិកតាទៅហើយ អ៊ីចឹងទេវាមិនមានតុល្យភាពទៅនឹងធនធានទឹក ដែលមាននៅក្នុងប្រឡាយ និងត្រពាំងតូចៗ ដែលពួកគាត់មាននោះទេ»។
យ៉ាងណាក៏ដោយ លោកមេឃុំរូបនេះបានស្នើសុំឱ្យប្រជាកសិករក្នុងតំបន់ដែលខ្វះខាតទឹកទាំងនោះ មេត្តាអត់ធ្មត់រង់ចាំក្នុងរយៈពេល ២-៣ ថ្ងៃបន្ថែមទៀត ទឹកនឹងហូរធ្លាក់មកដល់ក្នុងប្រព័ន្ធប្រឡាយមេហើយ។
ជាមួយគ្នានេះ លោក ឡាយ ពុ អនុប្រធានមន្ទីរធនធានទឹក និងឧតុនិយម ខេត្តបន្ទាយមានជ័យបានប្រាប់ភ្នំពេញ-ប៉ុស្តិ៍ថា លោកបានទាក់ទងសុំកិច្ចអន្តរាគមន៍ ទៅមន្ទីរធនធានទឹកនៅខេត្តឧត្តរមានជ័យឱ្យជួយបើកបង្ហូរទឹកពីទំនប់អាងស្ទាក់ទឹកស្ទឹងអាតោមកហើយ ប៉ុន្តែ ការបើកនោះ គឺគេបើកមានកម្រិត ហើយពីស្ទឹងអាតោមកដល់ស្ទឹងក្រឡាញ់ គឺមានរយៈចម្ងាយប្រមាណជិត ៦០ គីឡូម៉ែត្រ និងមានការបូមស្ទាក់របស់ប្រជាកសិករនៅផ្នែកខាងលើនៃដងស្ទឹងនេះបានធ្វើឱ្យរំហូរទឹកមានភាពយឺតយ៉ាវ។
លោកថ្លែងថា៖ «បើតាមការពិនិត្យអង្កេតពីរំហូរទឹកដែលធ្លាក់មកនាពេលនេះ គឺនៅចន្លោះ ៤-៥ ថ្ងៃទៀតយ៉ាងយូរ ទឹកនឹងធ្លាក់មកដល់ដងស្ទឹងក្រឡាញ់ ហើយហូរចូលមកក្នុងប្រព័ន្ធប្រឡាយមេរបស់យើងហើយ ដូច្នេះសូមបងប្អូនកុំបារម្ភពីបញ្ហាខ្វះទឹកឱ្យសោះ ព្រោះនៅដើមរដូវប្រាំងនេះយើងនៅមានទឹកគ្រប់គ្រាន់ក្នុងអាងស្តុកសម្រាប់ការផ្គត់ផ្គង់»។
ថ្វីបើយ៉ាងដូច្នេះក្ដី លោក ឡាយ ពុទ្ធី បានអំពាវនាវដល់ប្រជាកសិករដែលនៅតំបន់ឆ្ងាយដាច់ស្រយាលពីប្រភពទឹក សូមកុំព្យាយាមធ្វើការដាំដុះដំណាំស្រូវក្នុងរដូវប្រាំងនេះឱ្យសោះ បើពុំនោះ វានឹងរងការខាតបង់ជាពុំខាន៕
