.jpg)
អង្គសវនាការនៃគណៈកម្មាធិការជាតិរៀបចំការបោះឆ្នោត។ ហ៊ាន រង្សី
ភ្នំពេញៈ បន្ទាប់ពីបើកសវនាការជាសាធារណៈអសរ់យៈពេល ៣ម៉ោង លើបណ្តឹង ០០១ គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចតម្កល់សេចក្តីសម្រេចរបស់ ក្រុមប្រឹក្សាប្រជុំសម្រេចសង្កាត់ផ្សារចាស់ រាជធានីភ្នំពេញ ដែលបានលុបឈ្មោះពលរដ្ឋចេញពីបញ្ជីបោះឆ្នោត ដោយសំអាងទៅអង្គហេតុ និងអង្គច្បាប់។
គណៈកម្មាធិការជាតិរៀបចំការបោះឆ្នោត នៅរសៀលថ្ងៃទី១៨ ខែមករា ឆ្នាំ២០២២នេះ បានចាប់ផ្តើមបើកសវនាការជាសាធារណៈ ដើម្បីជំនុំជម្រះលើបណ្ដឹង/សំណុំរឿងលេខ ០០១ ចុះថ្ងៃទី១៥ ខែមករា ឆ្នាំ២០២២ នៅទីស្ដីការ គ.ជ.ប។ បណ្តឹងខាងលើនេះ មានកម្មវត្ថុប្ដឹងតវ៉ានឹងសេចក្ដីសម្រេចលេខ ០០១/២២ ចុះថ្ងៃទី១៣ ខែមករា ឆ្នាំ២០២២ របស់ក្រុមប្រឹក្សាប្រជុំសម្រេចសង្កាត់ផ្សារចាស់ ខណ្ឌដូនពេញ រាជធានីភ្នំពេញ ដែលមានដើមបណ្ដឹងផ្ទាល់ឈ្មោះ ដួង វិចិត្រ និងជាតំណាងប្រជាពលរដ្ឋចំនួន ៤រូប។
យោងសេចក្តីសម្រេច គ.ជ.ប បានតកម្កល់សេចក្តីសម្រេចខាងលើរបស់ ក្រុមប្រឹក្សាប្រជុំសម្រេចសង្កាត់ផ្សារចាស់ ខណ្ឌដូនពេញ រាជធានីភ្នំពេញ ទុកជាបានការពេញទាំងមូល។
គ.ជ.ប បន្តថា សេចក្តីសម្រេចនេះ អង្គជំនុំជម្រះ ប្រកាសជាសាធារណៈ នៅថ្ងៃទី១៨ ខែមករា ឆ្នាំ ២០២២ នៅចំពោះមុខដើមបណ្តឹង និងបើកផ្លូវតវ៉ាទៅក្រុមប្រឹក្សាធម្មនុញ្ញតាមកំណត់ច្បាប់។
អ្នកនាំពាក្យ គ.ជ.ប លោក ហង្ស ពុទ្ធា បានថ្លែងប្រាប់អ្នកសារព័ត៌មានក្រោយបញ្ចប់សវនាកាថា មូលហេតុដែល ក្រុមប្រឹក្សាជំនុំជម្រះនៃ គ.ជ.ប សម្រេច តម្កល់ទុក ការសម្រេច របស់ក្រុមប្រឹក្សាប្រជុំសម្រេចសង្កាត់ផ្សារចាស់ ទុកជាបានការ ដោយសារបុគ្គលនោះបានប្លាស់ប្តូរទីលំនៅរួចទៅហើយ។
លោកថា៖« សម្រាប់ក្រុមប្រឹក្សាជំនុំជម្រះបាន ពិភាក្សាគ្នាដោយផ្អែកទៅលើច្បាប់ មាត្រាលេខ ៦១ មាត្រា ៤៦ហើយនិង ៥១ នៃច្បាប់នៃច្បាប់បោះឆ្នោតជ្រើសតាំងតំណាងរាស្ត្រ »។
ច្បាប់នេះតម្រូវឱ្យបងប្អូនប្រជាពលរដ្ឋដែលមានឈ្មោះក្នុងបញ្ជី ទាល់តែមានអាស័យដ្ឋានក្នុងឃុំសង្កាត់ដែលសាម៉ីខ្លួន ត្រូវបោះឆ្នោត ប៉ុន្តែជាក់ស្តែង សាម៉ីខ្លួន លោកបានប្លាស់ទីលំនៅពីសង្កាត់ផ្សារចាស់ ទៅរស់នៅសង្កាត់ស្ទឹងមានជ័យ ១ អីចឹងបានក្រុមប្រឹក្សាជំនុំជម្រះ សម្រេចិត្ត រក្សាទុកការសម្រេចរបស់ក្រុមប្រឹក្សាសង្កាត់ផ្សារចាស់នេះនៅដដែលទុកជាបានការ»។
លោកបានបន្តទៀតថា មូលហេតុដែលមិនទុកឈ្មោះនៅក្នុងបញ្ជីបោះឆ្នោតនៅសង្កាត់ផ្សារចាស់ ដោយសារ សាម៉ីខ្លួន មិនមានអាស័យដ្ឋាននៅក្នុងឃុំសង្កាត់ ឬទីសំណាក់នៅឃុំសង្កាត់ដែល សាម៉ីខ្លួនសុំរក្សាឈ្មោះនៅក្នុងបញ្ជីបោះឆ្នោតទេ។
លោក ហង្ស ពុទ្ធា បានគូសបញ្ជាក់ថា ការចល័ត ឬការប្តូរអាស័យដ្ឋាន ប្រជាពលរដ្ឋពីទីកន្លែងមួយទៅទីកន្លែងមួយ គឺសិទ្ធិស្របច្បាប់ពលរដ្ឋ ហើយមិនធ្វើឱ្យប៉ះពាល់ដល់ដំណើរការនៃការបោះឆ្នោតទេ។
បើតាមលោក ហង្ស ពុទ្ធា បណ្តឹងមានលក្ខណៈដូចគ្នាច្រើន ជាពិសេសគឺមានលក្ខណៈពីរប្រភេទ ទី១ការខុសអក្ខរាវិរុទ្ធ ដែល គ.ជ.ប ធ្វើការកត់សម្គាល់ ហើយបណ្តឹងទី ២ គឺពាក់ព័ន្ធការប្លាស់ប្តូរទីលំនៅ។
សូមជម្រាបថា គ.ជ.ប បានទុក រយៈពេល ៥០ថ្ងៃចាប់តាំងពីថ្ងៃទី១២ខែតុលារហូតដល់ថ្ងៃទី ៣០ ខែវិច្ឆិកា ឆ្នាំ ២០២១ ដើម្បីឱ្យបងប្អូនប្រជាពលរដ្ឋលោកអញ្ជើញទៅពិនិត្យបញ្ជីឈ្មោះផង ទៅចុះឈ្មោះបោះឆ្នោតផង៕
