កំពតៈ អាជ្ញាធរខេត្តកំពតនៅថ្ងៃទី ១៨ ខែមករា ឆ្នាំ ២០២២ បានសម្រេចដុតបំផ្លាញចោលនូវផលិតផលគ្រឿងសមុទ្រចំនួន ៦,១ តោនក្នុងចំណោមផលិតផលគ្រឿងសមុទ្រ ១២ តោន ដែលនាំចូលពីប្រទេសវៀតណាមដោយគ្មានលិខិតអនុញ្ញាត និងក្រោយពីរកឃើញមានផ្ទុកនូវសារធាតុគីមី ដែលបង្កគ្រោះថ្នាក់ដល់សុខភាព។
លោក ង៉ែត សាវឿន ប្រធានច្រកទ្វារព្រំដែនអន្តរជាតិព្រែកចាកបានប្រាប់ភ្នំពេញប៉ុស្តិ៍ថា បង្គា និងគ្រឿងសមុទ្រសរុបប្រមាណ ១២ តោនត្រូវបានកម្លាំងសមត្ថកិច្ចជំនាញបង្ក្រាបចាប់បានកាលពីយប់ថ្ងៃទី ១៦ និង ព្រឹកថ្ងៃទី១ ៧ ខែមករា បន្ទាប់ពីរកឃើញមានផ្ទុកនូវសារធាតុ ចាហួយ និងសារធាតុគីមីមួយចំនួនទៀត ដែលបង្កផលប៉ះពាល់ដល់សុខភាពអ្នកបរិភោគ។
លោក សាវឿន បានថ្លែងថា៖ «ផលិតផលគ្រឿងសមុទ្រដែលរួមមាន បង្គា ក្ដាម មឹក អយស្ទ័រ និងក្រែងឈាមសរុបចំនួន ៣៦៤ កេសមានទម្ងន់ ៦,១ តោន ក្នុងចំណោមផលិតផលគ្រឿងសមុទ្រសរុបចំនួន ៦១០ កេសឬ មានទម្ងន់សរុបប្រមាណ ១២ តោន ដែលមានផ្ទុកនូវសារធាតុគីមី [ម្សៅចាហួយ] និងសារធាតុគីមីផ្សំសំយោគមួយចំនួនទៀត ត្រូវបានដុតបំផ្លាញចោលនៅរសៀលថ្ងៃទី ១៨ ខែមករា»។
បើតាមលោក សាវឿន ផលិតផលគ្រឿងសមុទ្រប្រមាណជិត ៦ តោនទៀតដែលគ្មានផ្ទុកនូវសារធាតុគីមីពុល ឬម្ស៉ៅចាហួយ ដើម្បីក្លែងបន្លំភ្នែកជញ្ជីង និងដែលត្រូវបានរកឃើញថា មានការនាំចូលពីប្រទេសវៀតណាមដោយគ្មានលិខិតអនុញ្ញាតពីមន្ត្រីជំនាញពាក់ព័ន្ធនោះត្រូវបានបញ្ជូនទៅឱ្យមន្ត្រីរដ្ឋបាលជលផលដើម្បីធ្វើការផាកពិន័យអន្តរការណ៍ទៅតាមនីតិវិធីច្បាប់។
ជុំវិញករណីនេះ លោក ស សូរិន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត បានប្រាប់ភ្នំពេញប៉ុស្តិ៍ថាផលិតផលគ្រឿងសមុទ្រប្រមាណ ៣៤៦ កេស និង មានទម្ងន់ប្រមាណជិត ៦ តោនដែលរកឃើញមិនមានជាប់ពាក់ព័ន្ធនូវសារធាតុគីមីពុល ឬម្សៅចាហួយដែលធ្វើឱ្យប៉ះពាល់ដល់សុខភាពអ្នកបរិភោគនេះត្រូវបានធ្វើការផាកពិន័យអន្តរការណ៍តាមច្បាប់ស្ដីពីជលផល។
លោក សូរិន បានបញ្ជាក់ថា៖ «យើងបានពិន័យអន្តរការណ៍ចំពោះអ្នកនាំចូលនូវផលិតផលគ្រឿងសមុទ្រដែលត្រូវបាននាំចូលពីប្រទេសវៀតណាមប្រមាណជិត ៦ តោន រួមមាន ក្ដាមប្រៃ បង្គា និង មឹក ដោយគ្មានលិខិតអនុញ្ញាតនូវទឹកប្រាក់ជាង ៤ លានរៀល។ ប្រាក់ពិន័យទាំងនេះត្រូវបានដាក់បញ្ចូលទៅក្នុងសួយសាររបស់រដ្ឋ»។
បើតាមលោក ស សូរិន ក្រៅពីពិន័យអន្តរការណ៍ មន្ត្រីជំនាញរដ្ឋបាលជលផលខេត្តកំពត បានធ្វើការអប់រំណែនាំដល់ម្ចាស់អាជីវកម្ម និងអ្នកដឹកជញ្ជូនឱ្យធ្វើកិច្ចសន្យាបញ្ឈប់ការនាំចូលនូវផលិតផលគ្រឿងសមុទ្រដោយខុសច្បាប់ ឬ ប្រើលិខិតអនុញ្ញាតការនាំចូលហួសសុពលភាព ដែលបង្កឱ្យមានបញ្ហាប្រឈមលើមុខជំនួញអាជីវកម្ម។
យ៉ាងណាក៏ដោយ ទាំងលោក ង៉ែត សាវឿន និង លោក ស សូរិន មិនបានបង្ហាញអំពីអត្តសញ្ញាណអាជីវករដែលបានធ្វើការនាំចូលផលិតផលគ្រឿងសមុទ្រពីប្រទេសវៀតណាម ដោយគ្មានការអនុញ្ញាតនោះ ដើម្បីឱ្យសាធារណជនបានដឹងនោះទេ ដោយអះអាងថា កំហុសឆ្គងទាំងនោះមិនមែនជាចេតនារបស់ពាណិជ្ជករខ្មែរនោះទេ។
ដូចគ្នានេះដែរ លោក សុទ្ធ ណារឿន ប្រធានសាខា ការពារអ្នកប្រើប្រាស់ និងកិច្ចការប្រកួតប្រជែង (ក.ប.ប) ខេត្តកំពតបានប្រាប់ភ្នំពេញប៉ុស្តិ៍ថា តាមការបំភ្លឺរបស់អ្នកបើកបរ និងម្ចាស់ទំនិញ ផលិតផលគ្រឿងសមុទ្រទាំងនោះ ពួកគេមិនបានចាក់បញ្ចូលនូវសារធាតុគីមី ឬ ម្សៅចាហួយ ដែលអាចបង្កផលប៉ះពាល់ដល់សុខភាពអ្នកបរិភោគនោះទេ។ ពួកគេបានសារភាពថា ពួកគេមិនមានការយល់ដឹងអំពីវិធីសាស្ត្រនៃការការប្រើប្រាស់នូវសារធាតុគីមីផ្សំ ឬការចាក់បញ្ចូលនូវសារធាតុចាហួយនោះទៅក្នុងបង្គា ឬគ្រឿងសមុទ្រផ្សេងទៀត ដើម្បីរក្សាពណ៌សម្បុរ ឬបង្កើនភ្នែកជញ្ជីងនោះទេ។ លោក ណារឿន បញ្ជាក់ថា៖ «តាមការអះអាងរបស់ពាណិជ្ជករខ្មែរ ដែលនាំចូលផលិតផលគ្រឿងសមុទ្រពីប្រទេសវៀតណាម ដែលសមត្ថកិច្ចជំនាញយើងបង្ក្រាបបាន វិធីសាស្ត្រដ៏អាក្រក់ទាំងនោះ គឺប្រជានេសាទ និងពាណិជ្ជករវៀតណាមទេជាអ្នកប្រព្រឹត្តមិនមែនជាកំហុស ឬជាចេតនារបស់ពាណិជ្ជករខ្មែរនោះឡើយ»។
បើតាមលោក ណារឿន ម្សៅចាហួយ និងសារធាតុគីមីផ្សំសម្រាប់រក្សាពណ៌សម្បុរនូវផលិតផលគ្រឿងសមុទ្រទាំងនោះឱ្យមើលទៅស្រស់ថ្លា ដូចទើបនេសាទ ឬចាប់បានថ្មីៗនោះ មានបង្កប់នូវប្រភេទបាក់តេរីមួយចំនួនដែលអាចបង្កជាហានិភ័យជាច្រើនទៅដល់សុខភាពរបស់អ្នកបរិភោគ ដូចជាប៉ះពាល់ដល់ប្រព័ន្ធរំលាយអាហារ ប៉ះពាល់ថ្លើម និងបង្កជារោគសញ្ញាធ្វើឱ្យពុលចំណីអាហារ ដូចជាធ្វើឱ្យក្អួតចង្អោរ ឈឺក្បាល ចុកពោះ និង រាករូសជាដើម៕
វីដេអូ៖