ភ្នំពេញៈ ដំណើរការនៃការចាក់វ៉ាក់សាំងបង្ការកូវីដ ១៩ នៅប្រទេសកម្ពុជាមានវឌ្ឍនភាពល្អប្រសើរទាំងការចាក់ដូសមូលដ្ឋានដូសទី ៣ និងដូសទី ៤ ដោយ ប្រជាពលរដ្ឋបានមកទទួលការចាក់ជាបន្តបន្ទាប់ ដើម្បីបង្ការពីការឆ្លងមេរោគនេះ ពិសេសមេរោគបំប្លែងថ្មីប្រភេទអូមីក្រុង។ ក្នុងរយៈពេល ៤ ថ្ងៃនៃយុទ្ធនាការចាក់វ៉ាក់សាំងដូសទី ៤ មនុស្សជិត ១០ ម៉ឺននាក់ បានទទួលការចាក់វ៉ាក់សាំងនេះ។
អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លោកស្រី ឱ វណ្ណឌីន បានលើកឡើងថា បន្ទាប់ពីលោកនាយករដ្ឋមន្ត្រី ហ៊ុន សែន ប្រកាសឱ្យមានការចាក់វ៉ាក់សាំងដូសទី៤ ប្រជាពលរដ្ឋជាច្រើនបាននាំគ្នាទៅចាក់វ៉ាក់សាំងនៅតាមទីតាំងផ្សេងៗគ្នា។ ទីតាំងដែលប្រជាពលរដ្ឋអាចចាក់វ៉ាក់សាំងដូសទី ៤ បាន មានដូចជា មន្ទីរពេទ្យកាល់ម៉ែត មជ្ឈមណ្ឌលជាតិគាំពារមាតា និងទារក មន្ទីរពេទ្យព្រះអង្គឌួង មន្ទីរពេទ្យកុមារជាតិ មន្ទីរពេទ្យព្រះកុសុមៈ ក៏ដូចជាមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពទាំងអស់នៅក្នុងរាជធានីភ្នំពេញ។
លោកស្រីថ្លែងថា៖ «ខ្ញុំសង្កេតឃើញថា ប្រជាពលរដ្ឋយើងជាច្រើនមានការសប្បាយរីករាយក្នុងការមកទទួលយកនូវការចាក់វ៉ាក់សាំងកូវីដ ១៩ ដូសទី ៤ នេះ។ ខ្ញុំជឿថា ពួកគាត់មានការយល់ច្បាស់ ហើយគាត់យល់ពីតម្រូវការនៃការចាក់ដូសទី ៤ នេះ»។
អ្នកនាំពាក្យរូបនេះបញ្ជាក់ថា ក្រៅពីក្រុមគោលដៅដែលក្រសួងបានកំណត់ សម្រាប់ការចាក់វ៉ាក់សាំងកូវីដ ១៩នេះ ក៏មានលោកតា លោកយាយ ដែលមានវ័យចំណាស់ ក៏មកទទួលវ៉ាក់សាំងដូសជំរុញនេះផងដែរ។
ការរាតត្បាត និងការវាយលុកនៃវីរុសកូវីដ ១៩ មិនទាន់ចប់នៅឡើយទេ ហើយវីរុសនេះមានលទ្ធភាពបំប្លែងខ្លួនថ្មីៗទៀត។ លោកស្រី ឱ វណ្ណឌីន នៅតែបន្តធ្វើការអំពាវនាវដល់ប្រជាពលរដ្ឋបង្កើនការប្រុងប្រយ័ត្ននូវការចម្លងពីបុគ្គលមួយទៅបុគ្គលមួយ ហើយត្រូវពង្រឹងនូវវិធានការការពារ ដោយមិនត្រូវភ្លេចខ្លួន ឬសន្តិភាពនិយមជាមួយនឹងវីរុសកូវីដ ១៩ នោះឡើយ។
លោកស្រីថ្លែងថា៖ «ដើម្បីឱ្យការរស់នៅធម្មតា ក្នុងប្រក្រតីភាពថ្មីរបស់យើងមាននិរន្តរភាពតទៅមុខទៀត ហើយបងប្អូនមិនចង់បកមកឆ្លងកាត់ឡើងវិញនូវរបៀបរបបនៃការបិទខ្ទប់ ឬការហាមប្រាម ហាមឃាត់មិនឱ្យមានការធ្វើដំណើរ និងការជួបជុំគ្នា យើងត្រូវរួមគ្នាទប់ស្កាត់ការឆ្លងនូវវីរុសកូវីដ ១៩»។
យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី ១៧ ខែមករា ឆ្នាំ ២០២២ ប្រជាពលរដ្ឋចំនួនជាង ៤,៦ លាននាក់ បានចាក់វ៉ាក់សាំងកូវីដ ១៩ ដូសទី ៣ និងជិត ១០ ម៉ឺននាក់បានទទួលការចាក់ដូសទី ៤។
ដោយឡែក ក្រសួងការពារជាតិ បានចាប់ផ្តើមចាក់វ៉ាក់សាំងបង្ការកូវីដ ១៩ ដូសទី ៤ ជូនយោធិន និងគ្រួសារនាថ្ងៃទី ១៧ មករា នៅមន្ទីរពេទ្យព្រះកេតុមាលា ហើយក៏ជាថ្ងៃ បើកចាក់ផង និងសាកល្បងផង។
លោក ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិយុទ្ធនាការចាក់វ៉ាក់សាំងកូវីដ ១៩ នៃក្រសួងការពារជាតិបានឱ្យដឹងថា គោលគំនិតបើកចាក់លើកដំបូង និងបើកចាក់ផង សាកល្បងផងនេះ គឺដើម្បីឱ្យគ្រប់បណ្តាអង្គភាពទាំងអស់មកមើលដើម្បីរៀនសូត្រតាមពីការចាក់នេះ។
លោកថ្លែងថា៖ «យើងបើកការចាក់សាកល្បងនេះដែរ ដោយសារការចាក់វ៉ាក់សាំងប្រភេទ Pfizer វាខុសប្លែកពីការចាក់វ៉ាក់សាំងប្រភេទស៊ីណូហ្វាម និងស៊ីណូវ៉ាក់។ ស៊ីណូវ៉ាក់ និងស៊ីណូហ្វាមមានរបៀបថែទាំ ងាយស្រួលជាង វ៉ាក់សាំង Pfizer»។
លោក ឥត សារ៉ាត់ បញ្ជាក់ថា៖ «ស៊ីណូវ៉ាក់ និងស៊ីណូហ្វាម យើងយកថ្នាំទៅចាក់មនុស្ស ប៉ុន្តែបើចាក់ Pfizer គឺយកមនុស្សទៅចាក់វ៉ាក់សាំងវិញ ព្រោះវាត្រូវមានលក្ខណៈថែទាំលក្ខណៈនៃការចាក់ឱ្យត្រឹមត្រូវតាមបច្ចេកទេសដើម្បីធានាឱ្យបាននូវប្រសិទ្ធភាពរបស់វ៉ាក់សាំង»។
ដោយទទួលបានបទបញ្ជាពីរាជរដ្ឋាភិបាល ប្រគល់ភារកិច្ចឱ្យគណៈកម្មការចំពោះកិច្ចក្រសួងការពារជាតិ ធ្វើការចាក់ឱ្យមន្ត្រីជួរមុខក្នុងនោះក៏មានកងយោធពលខេរភូមិន្ទ យោធិន និងគ្រួសារ អតីតយុទ្ធជន ដែលសរុបទាំងអស់ជាង ៣១ ម៉ឺននាក់។ នេះបើតាមលោក ឥត សារ៉ាត់។
លោកបន្តថា បន្ទាប់ពីការចាក់សាកល្បងនេះហើយ ក្រុមការងារចាក់វ៉ាក់សាំងនឹងចាប់ផ្តើមពង្រីកចាក់ទៅដល់ទីតាំងផ្សេងៗទៀតក្នុងកងយោធពលខេមរភូមិន្ទ ក្នុងក្រសួងការពារជាតិ អគ្គបញ្ជាការកងទ័ពជើងគោក ជើងទឹក ជើងអាកាស អាវុធហត្ថ និងបញ្ជាការដ្ឋានអង្គរក្ស ដែលនឹងពង្រីកក្នុងពេលឆាប់ៗនេះ។
លោក ឥត សារ៉ាត់ បន្ថែមថា បើតំបន់ណា ឬទីតាំងណាដែលគ្មានលក្ខណៈថែទាំឱ្យបានតាមលក្ខណបច្ចេកទេសតាមវ៉ាក់សាំងទេត្រូវប្រមូលផ្តុំកងទ័ព និងគ្រួសារមកនៅកន្លែងណាដែលជិតបំផុត មានលក្ខណៈថែទាំតាមលក្ខណបច្ចេកទេសគឺចាក់នៅទីនោះតែម្តង៕
វីដេអូ៖