.jpg)
លោក Anoulak Kittikhoun សញ្ជាតិឡាវ ដែលជានាយកប្រតិបត្តិថ្មីនៃ MRC។ រូបថត MRC
ភ្នំពេញៈ លោក អានុឡាក់ គិធិឃួន (Anoulak Kittikhoun) បានចូលកាន់តំណែងជានាយកប្រតិបត្តិថ្មីនៃលេខាធិការដ្ឋាន គណៈកម្មការទន្លេមេគង្គ (MRC) ដែលមានមូលដ្ឋាននៅទីក្រុងវៀងចន្ទន៍ប្រទេសឡាវ ហើយលោកក៏នឹងដឹកនាំមជ្ឈមណ្ឌលគ្រប់គ្រងទឹកជំនន់ និងគ្រោះរាំងស្ងួតនៅរាជធានីភ្នំពេញក្នុងអាណត្តិ ៣ ឆ្នាំរបស់លោកចាប់ពីឆ្នាំ ២០២២-២០២៤ ផងដែរ។
មានសញ្ជាតិឡាវ លោក អានុឡាក់ ដែលបានចូលកាន់តំណែងនេះនាថ្ងៃទី ១៧ ខែមករា គឺជាអ្នកជំនាញផ្នែកអភិវឌ្ឍន៍អន្តរជាតិ ដែលមានបទពិសោធ និងជំនាញផ្នែកកិច្ចការទន្លេមេគង្គ។ លោកមានបទពិសោធ ២០ ឆ្នាំក្នុងតួនាទី ជាអ្នកដឹកនាំជាន់ខ្ពស់នៅលេខាធិការដ្ឋាន MRC អង្គការសហប្រជាជាតិ (UN) និងអង្គភាពពាក់ព័ន្ធនានា រួមមានតួនាទីជាប្រធានការិយាល័យក្នុងផ្នែកអាស៊ី និងប៉ាស៊ីហ្វិក។ លោកជាបុគ្គលិកអន្តរជាតិដំបូងគេមកពីប្រទេសឡាវដែលបានទៅបម្រើការនៅទីស្នាក់ការកណ្តាលរបស់ UN។
សេចក្តីប្រកាសព័ត៌មានរបស់លេខាធិការដ្ឋាន MRC បញ្ជាក់នាថ្ងៃទី ១៧ មករា ថា លោក គឺជា នាយកប្រតិបត្តិទី ១ មកពីប្រទេសឡាវក្នុងប្រវត្តិសាស្ត្រ ២៥ ឆ្នាំរបស់ MRC។ ការតែងតាំងរូបលោកត្រូវបានគាំទ្រដោយក្រុមប្រឹក្សាថ្នាក់រដ្ឋមន្ត្រីរបស់ MRC កាលពីខែវិច្ឆិកា ឆ្នាំ ២០២១ បន្ទាប់ពីគណៈកម្មាធិការចម្រុះ MRC សម្រេច ជ្រើសរើសលោកជាឯកច្ឆន្ទ។
ក្រុមប្រឹក្សាថ្នាក់រដ្ឋមន្ត្រី គឺជាស្ថាប័នអភិបាលកិច្ចខ្ពស់បំផុតនៃអង្គការនេះ ដោយមានសមាជិកភាពជារដ្ឋមន្ត្រីក្រសួងធនធានទឹក និងបរិស្ថានមកពីប្រទេសកម្ពុជា ឡាវ ថៃ និងវៀតណាម។
តាមសេចក្តីប្រកាសព័ត៌មាន លោក អានុឡាក់ ដែលជានាយកប្រតិបត្តិថ្មីទី ៣ និងវ័យក្មេងបំផុតថ្លែងថា៖ «ខ្ញុំពិតជាមានកិតិ្តយសយ៉ាងខ្លាំងចំពោះមុខតំណែងដ៏ខ្ពង់ខ្ពស់នេះ។ ក្នុងរយៈពេល ៣ ឆ្នាំខាងមុខនេះ ខ្ញុំនឹងជួយសម្រួលកិច្ចសហប្រតិបត្តិការក្នុងចំណោមប្រទេសតាមដងទន្លេមេគង្គលើបញ្ហាប្រឈមសំខាន់ៗរបស់អាងទន្លេមេគង្គ និងកាលានុវត្តន៍ផ្សេងៗ បន្តលើកកម្ពស់ MRC ជាអង្គការអាងទន្លេកម្រិតពិភពលោក ព្រមទាំងថែរក្សា និងបង្កើតដៃគូថ្មីៗគាំពារដល់កិច្ចប្រឹងប្រែងទាំង ២ ខាងលើនេះ»។
ក្នុងអាណត្តិរបស់ខ្លួនលោកនាយកប្រតិបត្តិថ្មីរូបនេះប្តេជ្ញាគ្រប់គ្រងការអនុវត្តយុទ្ធសាស្ត្រអភិវឌ្ឍន៍អាងទន្លេមេគង្គឆ្នាំ ២០២១-២០៣០ និងផែនការយុទ្ធសាស្ត្រ MRC ឆ្នាំ ២០២១-២០២៥ ខណៈអាងនេះប្រឈមនឹងបញ្ហា ដែលមិនធ្លាប់កើតមាន ដោយសារការប្រែប្រួលអាកាសធាតុ និងលំហូរទឹកមិនទៀងទាត់។
សេចក្តីប្រកាសព័ត៌មានបន្តថា មុខតំណែងចុងក្រោយជាប្រធានផ្នែកយុទ្ធសាស្ត្រ និងភាពជាដៃគូ របស់ MRC ចាប់ពីឆ្នាំ ២០១៦ រហូតដល់ការតែងតាំងជានាយកប្រតិបត្តិធ្វើឱ្យលោកឈរយ៉ាងរឹងមាំក្នុងតួនាទីថ្មីនេះ ដើម្បីជួយឱ្យមានការចូលរួមកាន់តែស៊ីជម្រៅរវាងប្រទេសជាសមាជិក MRC ដៃគូសន្ទនា ដៃគូអភិវឌ្ឍន៍ និងភាគីពាក់ព័ន្ធផ្សេងទៀត។
ចាប់ពីឆ្នាំ ២០១២-២០១៦ លោក អានុឡាក់ បានបម្រើការជាប្រធានក្រុមនៃអតីតកម្មវិធីផែនការអភិវឌ្ឍន៍អាងទន្លេនៅលេខាធិការដ្ឋាន MRC ដោយដឹកនាំបុគ្គលិកជំនាញមកពីប្រទេស ជាសមាជិក ក៏ដូចជាបុគ្គលិករដ្ឋបាល និងទីប្រឹក្សាអន្តរជាតិដែលបានអនុវត្តកម្មវិធីក្នុងថវិកាប្រមាណ ១៤ លានដុល្លារអាមេរិក។
សេចក្តីប្រកាសព័ត៌មានបញ្ជាក់ថា៖ «កិច្ចការរបស់លោក ត្រូវបានទទួលស្គាល់ដោយពានរង្វាន់ជាសកល និងការដឹកនាំថ្នាក់តំបន់ ឬការជ្រើសរើសជាច្រើនទៀត រួមមានវេទិកាសេដ្ឋកិច្ចសកល និងក្រសួងការបរទេសបារាំង»។
លោកបានបញ្ចប់ការសិក្សាថ្នាក់បរិញ្ញាបត្រផ្នែកទំនាក់ទំនងអន្តរជាតិ ពាណិជ្ជកម្ម និងហិរញ្ញវត្ថុពីសាកលវិទ្យាល័យជាតិអូស្ត្រាលី ប្រទេសអូស្ត្រាលី ថ្នាក់បរិញ្ញាបត្រជាន់ខ្ពស់ផ្នែកវិទ្យាសាស្ត្រនយោបាយ និងបណ្ឌិតផ្នែកអភិវឌ្ឍន៍នយោបាយ និងសេដ្ឋកិច្ចពីសាកលវិទ្យាល័យស៊ីធីទីក្រុងញូវយ៉ក សហរដ្ឋអាមេរិក។
លោកក៏ជាសហនិពន្ធសៀវភៅចំនួន ២ ក្បាលអំពីអង្គការអាងទន្លេនៅក្នុងកិច្ចការទូតទឹក (River Basin Organizations in Water Diplomacy) និងប្រទេសតូច ការទូតទូលំទូលាយ (Small Countries, Big Diplomacy) ក៏ដូចជាអត្ថបទជាច្រើន ស្តីពីការទូតទឹកនិងទំនាក់ទំនងអន្តរជាតិពីទន្លេមេគង្គអាស៊ាន និង កិច្ចការអង្គការសហប្រជាជាតិ។
លោក អានុឡាក់ បានរៀបអាពាហ៍ពិពាហ៍ មានកូនប្រុសម្នាក់ និងស្រីម្នាក់។ លោកបន្តតំណែងពីនាយកប្រតិបត្តិទី ២ ដែលមកពីប្រទេសសមាជិក MRC ដូចគ្នា គឺលោក អាន ពេជ្រហត្ថដា សញ្ជាតិខ្មែរ ដែលបានបញ្ចប់អាណត្តិកាលពីសប្តាហ៍មុន។
លោក សូ សុភ័ទ្ទ អគ្គលេខាធិការគណៈកម្មាធិការជាតិទន្លេមេគង្គ-កម្ពុជាមិនអាចទាក់ទងសុំអត្ថាធិប្បាយបានទេពីថ្ងៃទី ១៨មករា៕
