.jpg)
កុមារដែលជាសិស្សញ៉ាំអាហារព្រឹក ដែលឧបត្ថម្ភ ដោយអង្គការ WFP ដល់សាលារៀននៅខេត្តកំពង់ឆ្នាំង។ រូបថត WFP Cambodia
ភ្នំពេញៈ រុស្ស៊ីផ្តល់ថវិកាចំនួន ២,៨ លានដុល្លារអាមេរិក ដែលជាផ្នែកមួយ នៃការរួមចំណែក ដល់មូលនិធិ របស់កម្មវិធីស្បៀងអាហារពិភពលោក សម្រាប់ជាការចំណាយដល់ការអនុវត្តគម្រោងអភិវឌ្ឍន៍ប្រព័ន្ធស្បៀងអាហារ នៅសាលារៀន ប្រកបដោយនិរន្តរភាពនៅកម្ពុជា។
សេចក្តីប្រកាសព័ត៌មានស្ថានទូតរុស្ស៊ីប្រចាំកម្ពុជា បញ្ជាក់ នាថ្ងៃទី១៩ មករា ថា៖«យោងទៅតាមសេចក្តីសម្រេច របស់រដ្ឋាភិបាល នៃសហព័ន្ធរុស្ស៊ី ចុះថ្ងៃទី២៥ ខែធ្នូ ឆ្នាំ២០២១ នៅចុងឆ្នាំ២០២១ សហព័ន្ធរុស្ស៊ីបានផ្តល់ថវិកាចំនួន២,៨លានដុល្លារអាមេរិក ជាផ្នែកមួយ នៃការរួមចំណែកគោលដៅ ដល់មូលនិធិ របស់កម្មវិធីស្បៀងអាហារពិភពលោក របស់អង្គការសហប្រជាជាតិ ដើម្បីផ្តល់ហិរញ្ញប្បទាន ដល់ការចំណាយទាក់ទងនឹងការអនុវត្តគម្រោង ដែលមានគោលបំណងអភិវឌ្ឍន៍ប្រព័ន្ធស្បៀងអាហារ នៅសាលារៀនប្រកបដោយនិរន្តរភាព នៅក្នុងរាជាណាចក្រកម្ពុជា»។
សេចក្តីប្រកាសព័ត៌មាននេះបញ្ជាក់ថា វិធានការនេះ សំដៅលើការពង្រឹងកិច្ចសហប្រតិបត្តិការ ជាផលប្រយោជន៍នៃការស្តារឡើងវិញ ក្រោយជំងឺកូវីដ១៩ និងការអភិវឌ្ឍន៍ប្រកបដោយចីរភាព។
កាលពីថ្ងៃទី១៥ ខែតុលា ឆ្នាំ២០២១ ស្ថានទូតរុស្ស៊ីនៅកម្ពុជា រួមជាមួយក្រុមហ៊ុនរុស្ស៊ី Bio Building Co. ក្រុមហ៊ុនកម្ពុជា Leasure Asia Corporation eBiodis SGU Import Export Co. Ltd. ព្រមទាំងសាកលវិទ្យាល័យអង្គរ និងសមាគមពាណិជ្ជកម្មកម្ពុជា-រុស្ស៊ី បានរៀបចំសកម្មភាពមនុស្សធម៌ នៅមន្ទីរពេទ្យមិត្តភាពខ្មែរ-សូវៀត។
ក្នុងពិធីនោះលោកអាណាតូលី បូរ៉ូវីក (Anatoly Borovik) ឯកអគ្គរដ្ឋទូតរុស្ស៊ីប្រចាំនៅកម្ពុជា បានប្រគល់ជូនលោកងី ម៉េង នាយកមន្ទីរពេទ្យមិត្តភាពខ្មែរ-សូវៀត នូវឧបករណ៍ប្រមូលផ្តុំអុកស៊ីហ្ស៊ែន ថ្នាំសម្លាប់មេរោគអេឡិចត្រូលីត eBiodis៥២០លីត្រ ថ្នាំសម្លាប់មេរោគអាល់កុល៨៧០លីត្រ ម៉ាស់៦០០ប្រអប់ វីតាមីន១០ប្រអប់ ឧបករណ៍វាស់ជាតិស្ករក្នុងឈាម និងម៉ាស៊ីនបាញ់ថ្នាំ។
កាលពីខែធ្នូ ឆ្នាំ២០២១ លោកអាណាតូលី បូរ៉ូវីក បានជួបជាមួយលោកស្រី Alissar Chaker តំណាងអចិន្ត្រៃយ៍នៃកម្មវិធីអភិវឌ្ឍន៍អង្គការសហប្រជាជាតិប្រចាំរាជធានីភ្នំពេញនៅឯស្ថានទូតរុស្ស៊ី។ ក្នុងអំឡុងពេលនៃកិច្ចប្រជុំនេះ ភាគីទាំង២បានពិភាក្សាអំពីគម្រោងសង្គមនិងមនុស្សធម៌ ដែលត្រូវបានអនុវត្តនៅកម្ពុជា ដោយកម្មវិធីអភិវឌ្ឍន៍អង្គការសហប្រជាជាតិប្រចាំរាជធានីភ្នំពេញ រួមទាំងគម្រោងដែលបានធ្វើឡើងក្រោមការគាំទ្ររបស់រុស្ស៊ី។
កាលពីខែធ្នូ ឆ្នាំ២០២១ដដែលនេះ លោក Nikolai Patrushev លេខាធិការក្រុមប្រឹក្សាសន្តិសុខរុស្ស៊ី បានមកបំពេញទស្សនកិច្ចនៅកម្ពុជា ដោយបានជជែកជាមួយលោកនាយករដ្ឋមន្ត្រីហ៊ុន សែន អំពីផែនការបន្ថែមទៀត សម្រាប់កិច្ចសហប្រតិបត្តិការកម្ពុជា-រុស្ស៊ី ក្នុងវិស័យនយោបាយ ពាណិជ្ជកម្ម-សេដ្ឋកិច្ច វិទ្យាសាស្ត្រ-បច្ចេកទេស និងមនុស្សធម៌ ព្រមទាំងលើបញ្ហាសន្តិសុខ។
ក្នុងកិច្ចប្រជុំកំពូលរុស្ស៊ី-អាស៊ាន កាលពីចុងខែតុលា ឆ្នាំ២០២១ មេដឹកនាំអាស៊ាន បានពិចារណា លើមធ្យោបាយពង្រីកទំនាក់ទំនងក្នុងវិស័យនយោបាយ សេដ្ឋកិច្ច និងមនុស្សធម៌ ព្រមទាំងបានផ្លាស់ប្តូរទស្សនៈអំពីស្ថានភាពនៅក្នុងតំបន់អាស៊ីប៉ាស៊ីហ្វិក និងបានពិភាក្សាអំពីបញ្ហា នៃការងើបឡើងវិញ នៃសេដ្ឋកិច្ច ក្នុងតំបន់អាស៊ីប៉ាស៊ីហ្វិក និងការពុះពារ លើផលវិបាកនៃជំងឺកូវីដ១៩។
រុស្ស៊ីធ្លាប់ប្រកាសថា ប្រទេសនេះតែងតែនៅតែជាមិត្ដដ៏ជិតស្និទ្ធ និងជាដៃគូគួរឱ្យទុកចិត្តរបស់កម្ពុជា ដែលប្តេជ្ញាចិត្តពង្រឹងទំនាក់ទំនងទ្វេភាគី និងកិច្ចសហប្រតិបត្តិការ ព្រមទាំងការពារសន្តិភាពស្ថិរភាព និងវិបុលភាពរបស់ប្រជាជនកម្ពុជា៕
