The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ប្រកាស​បញ្ចប់​ការផ្តល់ប្រាក់​ឧបត្ថម្ភ​ដល់​កម្មករ​ដែល​ព្យួរ​កិច្ចសន្យា​ការងារ​ក្នុង​វិស័យ​វាយនភណ្ឌ ក្រោយពី​វិបត្តិ​កូ​វីដ វិល​មករក​ភាពប្រសើរ​វិញ

ក្រសួង​ប្រកាស​បញ្ចប់​ការផ្តល់ប្រាក់​ឧបត្ថម្ភ​ដល់​កម្មករ​ដែល​ព្យួរ​កិច្ចសន្យា​ការងារ​ក្នុង​វិស័យ​វាយនភណ្ឌ ក្រោយពី​វិបត្តិ​កូ​វីដ វិល​មករក​ភាពប្រសើរ​វិញ

Content image - Phnom Penh Post
កម្មករ​ត្រូវបាន​វាស់​កម្តៅ​មុន​ចូលធ្វើការ​ក្នុង​រោងចក្រ​នៅ​ខណ្ឌ​ពោធិ៍សែនជ័យ កាលពី​ឆ្នាំ​ ២០២១​។ ហេង ជីវ័ន

ក្រសួង​ប្រកាស​បញ្ចប់​ការផ្តល់ប្រាក់​ឧបត្ថម្ភ​ដល់​កម្មករ​ដែល​ព្យួរ​កិច្ចសន្យា​ការងារ​ក្នុង​វិស័យ​វាយនភណ្ឌ ក្រោយពី​វិបត្តិ​កូ​វីដ វិល​មករក​ភាពប្រសើរ​វិញ

ភ្នំពេញៈ ក្រសួង​ការងារ និង​បណ្តុះបណ្តាល​វិជ្ជាជីវៈ​ប្រកាស​បញ្ចប់​ការផ្តល់ប្រាក់​ឧបត្ថម្ភ សម្រាប់​កម្មករនិយោជិត​ដែល​ព្យួរ​កិច្ចសន្យាការងារ​ក្នុង​វិស័យ​វាយនភណ្ឌ កាត់ដេរ ផលិត​ស្បែកជើង ផលិត​ផលិតផល​ធ្វើដំណើរ និង​កាបូប​ដែល​ពួកគេ​រងគ្រោះ​ ដោយសារ​វិបត្តិ​នៃ​ជំងឺ​កូវីដ​ ១៩ ក្រោយពី​ជំងឺ​នេះ​ត្រូវ​បាន​គ្រប់គ្រង​ដោយ​ប្រសិទ្ធភាព ហើយ​កម្មករ​ជាង​ ៣២ ​ម៉ឺន​នាក់​ក្នុង​រោងចក្រ​ជាង​ ៥៥០​ ទទួល​បាន​អត្ថប្រយោជន៍​។

សេចក្តី​ជូនដំណឹង​របស់​ក្រសួង​ការងារ ចុះ​ថ្ងៃទី​ ១៨ ​មករា បានឱ្យដឹងថា ការបញ្ចប់​ការផ្តល់​ប្រាក់ឧបត្ថម្ភ​នេះ ដោយសារ​ការឆ្លង​រីករាលដាល​នៃ​ជំងឺ​កូវីដ​ ១៩ នៅតាម​រោងចក្រ សហគ្រាស ត្រូវបាន​គ្រប់គ្រង​ប្រកបដោយ​ប្រសិទ្ធភាព​ខ្ពស់ ដែល​ធ្វើឱ្យ​រោងចក្រ សហគ្រាស ភាគច្រើន​បានចាប់ផ្តើម​ដំណើរការ​ជា​ប្រក្រតី​ឡើងវិញ​។

ក្រសួង​បាន​បញ្ជាក់ថា​៖ «​រាជ​រដ្ឋាភិបាល​បាន​សម្រេច​បញ្ចប់​ការអនុវត្ត​វិធានការ​រាជរដ្ឋាភិបាល​ក្នុង​ការ​ផ្តល់ប្រាក់​ឧបត្ថម្ភ​ចំនួន​ ៤០​ដុល្លារ​អាមេរិក ក្នុង​ ១​ ខែ សម្រាប់​កម្មករ និយោជិត​ដែល​ព្យួរ​កិច្ចសន្យា​ការងារ​ក្នុង​វិស័យ​វាយនភណ្ឌ កាត់ដេរ ផលិត​ស្បែកជើង និង​ផលិត​ផលិតផល​ធ្វើដំណើរ និង​កាបូប​គិត​ចាប់ពី​ខែមករា ឆ្នាំ​ ២០២២ ​តទៅ​»​។

ទន្ទឹមនឹង​នេះ ក្រសួង​ការងារ និង​បណ្តុះបណ្តាល​វិជ្ជាជីវៈ​ក៏បាន​ប្រកាស​ដែរ​ថា សម្រាប់​បងប្អូន​កម្មករ​និយោជិត ដែល​ព្យួរ​កិច្ចសន្យា​ការងារ​ក្នុង​វិស័យ​ទេសចរណ៍ គឺ​នៅតែ​ទទួលបាន​ប្រាក់ឧបត្ថម្ភ​ដដែល រហូត​ដល់​វិស័យនេះ​មាន​សភាព​ធូរស្បើយ​ជាង​នេះ​។

ក្រសួង​បញ្ជាក់ថា​៖ «​ចាប់​ពីថ្ងៃ​ជូនដំណឹង​នេះ​តទៅ ម្ចាស់ ឬ​នាយក​រោងចក្រ សហគ្រាស ក្នុង​វិស័យ​វាយនភណ្ឌ កាត់ដេរ ផលិត​ស្បែកជើង និង​ផលិត​ផលិតផល​ធ្វើដំណើរ និង​កាបូប​ត្រូវអនុវត្ត​ការព្យួរ​កិច្ចសន្យាការងារ ស្របតាម​ខ្លឹមសារ​មាត្រា​ ៧១ និង​ ៧២ ​នៃ​ច្បាប់​ស្ដីពី​ការងារ ឬ​តាម​ការព្រមព្រៀង​គ្នា​រវាង​និយោជក និង​កម្មករនិយោជិត​»​។

លោក​ ហេង សួរ អ្នកនាំពាក្យ​ក្រសួង​ការងារ និង​បណ្តុះបណ្តាល​វិជ្ជាជីវៈ​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ១៩ មករា​ថា គិត​ចាប់ពី​ត្រីមាស​ទី​ ២ ឆ្នាំ​ ២០២០ ដល់​ថ្ងៃទី​ ៣១ ខែធ្នូ ឆ្នាំ ២០២១ រោងចក្រ សហគ្រាស​ក្នុង​វិស័យ​វាយនភណ្ឌ កាត់ដេរ ផលិត​ស្បែកជើង ផលិត​ផលិតផល​ធ្វើដំណើរ និង​កាបូប​ដែល​បាន​ព្យួរ​ផ្នែក​ខ្លះ​នៃ​កិច្ចសន្យា​ការងារ មាន​ចំនួន​ ៥៥២ ​រោងចក្រ​។

លោក​បាន​ថ្លែងថា​៖ «​ក្នុងការ​ផ្តល់ប្រាក់​ឧបត្ថម្ភ​ក្នុងអំឡុង​ពេល​ព្យួរការងារ ដោយសារ​វិបត្តិ​កូវីដ​ ១៩ ​កន្លងមកនេះ គឺមាន​កម្មករនិយោជិត​ចំនួន​ ៣២៩ ៦៩៤ ​នាក់​បានទទួល​ប្រាក់​អត្ថប្រយោជន៍​នេះ ខណៈ​រដ្ឋាភិបាល​បាន​ចំណាយ​ប្រាក់​ឧបត្ថម្ភ​សរុប​ចំនួន​ ៩២ ៤៩៥ ៤៩៥ ៨១០ ​រៀល ​(​ស្មើ​ជាង​ ២៣ ​លាន​ដុល្លារ​)»​។

លោក​ អាត់ ធន់ ប្រធាន​សហភាព​ការងារ​កម្ពុជា​ថ្លែងថា តាម​ការ​សង្កេតឃើញ​របស់​លោក​ក្នុង​ពេលនេះ ស្ថានភាព​ក្នុង​វិស័យ​វាយនភណ្ឌ កាត់ដេរ ផលិត​ស្បែកជើង និង​ផលិត​ផលិតផល​ធ្វើដំណើរ និង​កាបូប​ចាប់ផ្តើម​មានដំណើរ​ការ​ល្អ​ប្រសើរ​ឡើងវិញ​ហើយ ខណៈ​កម្មករ​ក្នុង​វិស័យនេះ​ក៏​ទទួល​បាន​ការងារ​ធ្វើជា​បណ្តើរៗ​ឡើងវិញ​អស់​ដែរ​។

បើតាម​លោក​ អាត់ ធន់ ការបញ្ចប់​ការផ្តល់​ប្រាក់ឧបត្ថម្ភ​ដល់​កម្មករ​ក្នុង​វិស័យនេះ គឺ​មិន​ទាស់​ខុស​អ្វី​នោះទេ ប៉ុន្តែ​លោក​គាំទ្រ​ឱ្យ​ក្រសួង​ការងារ​បន្ត​ផ្តល់ប្រាក់​ឧបត្ថម្ភ​ដល់​កម្មករនិយោជិត ដែល​ព្យួរ​កិច្ចសន្យាការងារ​ក្នុង​វិស័យ​ទេសចរណ៍​នេះ​បន្តទៀត ព្រោះ​ស្ថានភាព​បច្ចុប្បន្ន​របស់​កម្មករ​ក្នុង​វិស័យនេះ គឺ​នៅតែ​កំពុង​ជួបប្រទះ​នឹង​ការលំបាក​។

លោក​បញ្ជាក់ថា​៖ «​កម្មករ​នៅ​វិស័យ​ទេសចរណ៍ និង​ភោជនីយដ្ឋាន​ជាច្រើន​នៅ​បិទ​នៅឡើយ​ទេ ដែល​ពួកគាត់​អត់​មាន​ការងារ​ធ្វើ​នៅឡើយ ហើយ​ពួកគាត់​ត្រូវការ​លុយ ដើម្បី​យកទៅ​ដោះស្រាយ​បញ្ហា​បន្តិចបន្តួច​។ អ៊ីចឹង បើសិនជា​គាត់​មិនអាច​រក​ការងារ​ថ្មី​បានទេ គាត់​មានការ​លំបាក​»​។

ចំពោះ​ស្ថានភាព​ក្នុងពេល​ខាងមុខ លោក​ អាត់ ធន់ បង្ហាញ​ក្តីបារម្ភ​ថា ការឆ្លង​រីករាលដាល​ជំងឺ​កូវីដ ​១៩ គឺអាច​នៅតែ​ជា​បញ្ហា បើ​ក្នុង​ករណី​វីរុស​ប្រភេទ​ថ្មី​ឆ្លង​ចូល​សហគមន៍ ដែល​អាច​នឹង​បន្ត​ប៉ះពាល់​ដល់​ផ្នែក​សេដ្ឋកិច្ច ជាពិសេស​គឺ​វិស័យ​ទេសចរណ៍ ដែល​អាច​នឹងត្រូវ​បន្ត​អូសបន្លាយ​ពេល​នៃ​ការបិទ​អាជីវកម្ម​ទាំងនេះ​។

លោក​បាន​ថ្លែងថា​៖ «​ក្នុង​រយៈពេល​ខ្លី​នេះ វិស័យ​ទេសចរណ៍​មិនអាច​ដំណើរការ​បាន​ស្រួល​ទេ ព្រោះ​វិស័យ​មួយចំនួន​ដែល​យើង​ដឹង គឺ​បើកនៅ​ខែ​ ៦ ក្នុងករណី​គ្មាន​អូមីក្រុង​។ តែបើ​ករណី​មាន​អូមីក្រុង​កើតឡើង​ទៀត គឺ​មិនអាច​ដោះស្រាយ​ក្នុង​រយៈពេល​ខ្លី​បានទេ ហើយ​អូមីក្រុង​នេះ បើ​គ្រប់គ្រង​មិនបាន​នឹង​បន្ត​ប៉ះពាល់​ដល់​វិស័យ​ទេសចរណ៍​»៕

វីដេអូ៖

អត្ថបទគួរចាប់អារម្មណ៍