ភ្នំពេញៈ មន្ត្រីជាន់ខ្ពស់នៃគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) នៅតែបន្តជំរុញឱ្យមានការនាំយកវ៉ាក់សាំងកូវីដទៅចាក់ជូនពលរដ្ឋនៅតាមគេហដ្ឋាន ឬទីតាំងដែលលំបាកទទួលវ៉ាក់សាំង ប៉ុន្តែមន្ត្រីនៃ គ.វ.ក-១៩ ក៏ស្នើឱ្យក្រុមគ្រូពេទ្យប្រើប្រាស់វ៉ាក់សាំងបានត្រឹមត្រូវតាមបច្ចេកទេសផងដែរ ដើម្បីចៀសវាងការខូចខាតវ៉ាក់សាំង។
នេះជាការលើកឡើងពីសំណាក់លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធាន គ.វ.ក-១៩ ក្នុងពេលលោកស្រីចុះពិនិត្យទីតាំងចាក់វ៉ាក់សាំងក្នុងខេត្តតាកែវកាលពីថ្ងៃទី ១៨ ខែមករា ឆ្នាំ ២០២២។
លោកស្រីបានថ្លែងថា លោកស្រីបានណែនាំរួចហើយ ដោយសុំឱ្យរដ្ឋបាលខេត្តក៏ដូចជា មន្ទីរសុខាភិបាលខេត្តទាំងអស់ យកចិត្តទុកដាក់ក្នុងការស្ពាយវ៉ាក់សាំងទៅចាក់ជូនពលរដ្ឋដល់ផ្ទះសម្រាប់អ្នកដែលគាត់ខ្វះលទ្ធភាពធ្វើដំណើរមកកាន់កន្លែងចាក់វ៉ាក់សាំង។
លោកស្រី មានប្រសាសន៍ថា៖ «ការងារជំរុញឱ្យមានការចាក់នៅតាមទីតាំងនីមួយៗនេះ យើងនឹងមានការរៀបចំជាបន្តបន្ទាប់ទៀត អាស្រ័យទៅតាមស្ថានភាពជាក់ស្តែង ប៉ុន្តែអ្វីដែលជាចំណុចសំខាន់អ្នកដែលមិនមានលទ្ធភាពមកទទួលយកវ៉ាក់សាំង គឺយើងបានជំរុញរួចហើយ ដោយការនាំវ៉ាក់សាំងទៅចាក់ឱ្យដល់ពួកគាត់តែម្តង ដែលការងារនេះ យើងបានធ្វើតាំងពីឆ្នាំមុនមកម៉្លេះ»។
លោកស្រីបានបន្តថា ការចាក់វ៉ាក់សាំងនេះនឹងមានល្បឿនលឿនអាស្រ័យលើការកៀរគរពលរដ្ឋឱ្យមកចាក់ ហើយខាងក្រុមការងារនៃ គ.វ.ក-១៩ នឹងពិនិត្យទៅតាមរដ្ឋបាលខេត្តនីមួយៗលើការងារនេះ។
លោកស្រីបញ្ជាក់ទៀតថា៖ «ប្រសិនបើការកៀរគរពលរដ្ឋមកចាក់វ៉ាក់សាំងនេះមានការលំបាកយើងនឹងធ្វើការពិនិត្យតាមលទ្ធភាពជាក់ស្តែងទៅតាមភូមិ ឬឃុំដោយអាចប្រមូលផ្តុំមនុស្សមកចាក់តែម្តង។ យើងត្រូវដឹងថា វ៉ាក់សាំងនៅពេលយកទៅចាក់ នៅពេលដែលបើកហើយ យើងមិនអាចយកមកវិញបានទេ ហើយវ៉ាក់សាំងមួយចំនួន ១ ដបអាចចាក់មនុស្សបាន ៦ នាក់ ឬ ១០ នាក់ ហើយមានវ៉ាក់សាំង ១ ទៀត ១ ដបចាក់បានរហូត ២៨ នាក់»។
ចំណុចនេះ គ.វ.ក-១៩ បានណែនាំច្បាស់លាស់ហើយទៅដល់រដ្ឋបាលខេត្ត ជាពិសេសអ្នកជំនាញមន្ទីរសុខាភិបាលខេត្ត អ្នកទទួលខុសត្រូវលើការងារចាក់វ៉ាក់សាំងកូវីដ ១៩ ដើម្បីធ្វើយ៉ាងណាឱ្យការប្រើប្រាស់វ៉ាក់សាំងនេះត្រឹមត្រូវតាមបច្ចេកទេសផង និងចៀសវាងការខាតបង់វ៉ាក់សាំងផង។
នៅពេលចុះពិនិត្យការចាក់វ៉ាក់សាំងក្នុងខេត្តតាកែវនេះដែរ លោកស្រី ឱ វណ្ណឌីន ក៏បានជំរុញឱ្យរដ្ឋបាលខេត្តធ្វើការជាមួយខាងរោងចក្រក្នុងការរៀបចំការចាក់វ៉ាក់សាំងជូនកម្មករនៅតាមរោងចក្រតែម្តង។
លោកស្រីបានថ្លែងថា៖ «ខ្ញុំបានស្នើទៅមន្ទីរសុខាភិបាលខេត្តដើម្បីរៀបចំក្រុមគ្រូពេទ្យដើម្បីចូលទៅចាក់នៅតាមរោងចក្រតែម្តងដែលនេះជាការបោះជំហាន ១ ទៀតក្នុងការគ្របដណ្តប់ឱ្យបានទូលំទូលាយ»។
យ៉ាងណាមិញ រដ្ឋបាលក្រុងដូនកែវ ខេត្តតាកែវ ក៏បានរៀបចំក្រុមការងារដើម្បីចុះចាក់វ៉ាក់សាំងដល់សាលារៀនផងដែរ ដែលសិស្សត្រូវដល់វេនចាក់ដូសជំរុញ ឬដូសទី ៣។ ចំណុចនេះ លោកស្រី ឱ វណ្ណឌីន រំពឹងទុកថា ជាការបង្កើនបាននូវល្បឿននៃការចាក់វ៉ាក់សាំងនេះ។
ដោយឡែក ក្នុងពិធីបើកវេទិកាទេសចរណ៍អាស៊ាននៅខេត្តព្រះសីហនុកាលពីល្ងាចថ្ងៃទី ១៨ ខែមករា លោកនាយករដ្ឋមន្ត្រី ហ៊ុន សែន បានប្រកាសគាំទ្រចំពោះលោកនាយករដ្ឋមន្ត្រីនៃប្រទេសអេស្ប៉ាញដែលបានអំពាវនាវឱ្យមានការទទួលស្គាល់ថា ជំងឺកូវីដ ១៩ ជាជំងឺផ្តាសាយធម្មតា។
លោកថា៖ «ខ្ញុំហាក់មាននិន្នាការគាំទ្រជាមួយនឹងដំណើរវិវឌ្ឍដើម្បីរស់នៅជាមួយកូវីដ ១៩ ប៉ុន្តែត្រូវតែមានការប្រុងប្រយ័ត្ន ត្រូវតែចាក់វ៉ាក់សាំងឱ្យបានគ្រប់គ្រាន់សម្រាប់ការពារនូវជំងឺនេះ បើទោះបីជាចាត់ទុកវាគ្រាន់តែជាប្រភេទជំងឺផ្តាសាយធម្មតាក៏ដោយ»។
លោក ហ៊ុន សែន បានបន្តថា ការចាក់វ៉ាក់សាំង កិច្ចការពារខ្លួនដូចដែលគ្រប់គ្នាកំពុងតែធ្វើ ដូចជា ពាក់ម៉ាស់ លាងដៃ និងរក្សាគម្លាតជាការរស់នៅក្នុងបរិបទថ្មី។
តាមរបាយការណ៍ក្រសួងសុខាភិបាល គិតត្រឹមថ្ងៃទី ១៨ ខែមករា បានឱ្យដឹងថា ប្រជាពលរដ្ឋជិត ៤ លាននាក់បានទទួលនូវការចាក់ដូសទី ៣ ឬដូសជំរុញ ខណៈដែលប្រជាពលរដ្ឋជាង ១២ ម៉ឺននាក់បានចាក់វ៉ាក់សាំងដូសទី ៤៕