ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ និងភាគីពាក់ព័ន្ធមួយចំនួនបានរៀបចំនូវសិក្ខាសាលាមួយ ដើម្បីពិភាក្សាយោបល់ទាក់ទងនឹងបញ្ហាប្រឈមនៃគ្រោះថ្នាក់ការងារក្នុងវិស័យសំណង់ និងវិសាលភាពបេឡាជាតិសន្តិសុខសង្គម សម្រាប់កម្មករនិយោជិតក្នុងវិស័យនេះ។
សិក្ខាសាលាពិគ្រោះយោបល់នេះត្រូវបានរៀបចំឡើងនាថ្ងៃទី ១៩ ខែមករាឆ្នាំ ២០២២ ដោយមានការចូលរួមពីភាគីពាក់ព័ន្ធមួយចំនួនរួមមានអង្គការអន្តរជាតិខាងការងារ (ILO), សមាគមអ្នកសាងសង់កម្ពុជា (CCA), សហព័ន្ធវិស័យសំណង់អន្តរជាតិ (BWI) និងសហព័ន្ធសហជីពកម្មករសំណង់ និងព្រៃឈើកម្ពុជា (BWTUC)។
យោងតាមការលើកឡើងរបស់ក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា ការពិគ្រោះយោបល់នេះធ្វើឡើងក្នុងគោលបំណងសំខាន់ចំនួន ៦ ចំណុចដើម្បីបង្កើនការយកចិត្តទុកដាក់លើសុវត្ថិភាពការងារក្នុងវិស័យសំណង់។
ក្រសួងបានបញ្ជាក់ថា «ជំរុញឱ្យភាគីពាក់ព័ន្ធត្រូវពង្រឹងការអនុវត្តស្តង់ដាសុខភាព និងសុវត្ថិភាពនៅកន្លែងការងារឱ្យមានប្រសិទ្ធភាព ដើម្បីកាត់បន្ថយអត្រាគ្រោះថ្នាក់នៅកន្លែងការងារ។ ការពង្រីកវិសាលភាពបេទ្បាជាតិសន្តិសុខសង្គម (ប.ស.ស) គ្របដណ្តប់ឱ្យបានពេញលេញសម្រាប់វិស័យសំណង់នៅថ្ងៃអនាគតដ៏ខ្លី»។
ប្រភពដដែលបានបន្តថា ការពិគ្រោះយោបល់ដើម្បីស្វែងរក និងកំណត់នូវបញ្ហាប្រឈមជាអាទិភាព និងសុំកិច្ចសហការដើម្បីជំរុញឱ្យការអនុវត្តមានប្រសិទ្ធភាពក្នុងការលើកកម្ពស់សុវត្ថិភាពការងារសម្រាប់កម្មករនិយោជិតក្នុងវិស័យសំណង់។
ការផ្សព្វផ្សាយពីផលប៉ះពាល់នៃសារធាតុអាសបេស្តូសឱ្យបានទូលំទូលាយ និងបញ្ឈប់ការប្រើប្រាស់សារធាតុនេះនៅពេលអនាគត និងបង្កើនទំនាក់ទំនងវិជ្ជាជីវៈ និងកិច្ចសហប្រត្តិបត្តិការក្នុងគោលបំណងជំរុញក្របខ័ណ្ឌគោលនយោបាយជាតិសម្រាប់ការលើកកម្ពស់លក្ខខណ្ឌការងារសម្រាប់កម្មករនិយោជិតនៅក្នុងវិស័យសំណង់ឱ្យមានភាពល្អប្រសើរទ្បើង។
នាឱកាសនោះផងដែរ លោក ស៊ុំ សោភ័ណ រដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈបានលើកឡើងថាផ្អែកតាមផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈឆ្នាំ ២០១៩-២០២៣ ក្រសួងកំពុងជំរុញការផ្តោតការយកចិត្តទុកដាក់បន្តទៀតទៅលើវិស័យសន្តិសុខសង្គម។
លោកបានថ្លែងថា៖ «ក្រសួងកំពុងបន្តជំរុញការអភិវឌ្ឍរបបសន្តិសុខសង្គមដល់កម្មករនិយោជិត និងមន្ត្រីសាធារណៈអតីតមន្ត្រីរាជការ និងអតីតយុទ្ធជនដោយបន្តការពង្រឹង និងពង្រីកការអនុវត្តរបបសន្តិសុខសង្គមផ្នែកហានិភ័យការងារ ការបន្តពង្រឹង និងពង្រីកការអនុវត្តរបបសន្តិសុខសង្គមផ្នែកថែទាំសុខភាព ការជំរុញការរៀបចំនិងដាក់ឱ្យដំណើរការរបបប្រាក់សោធន»។
រដ្ឋលេខាធិការរូបនេះបានបញ្ជាក់ទៀតថា ក្រសួងក៏ពង្រឹងការអនុវត្តរបបសន្តិសុខសង្គមលើវិស័យសេដ្ឋកិច្ចក្រៅប្រព័ន្ធ ព្រមទាំងការអភិវឌ្ឍសមត្ថភាពដើម្បីបង្កើនប្រសិទ្ធភាពការផ្តល់សេវា សំដៅលើកកម្ពស់សុខុមាលភាព និងសាមគ្គីភាពសង្គម ព្រមទាំងចូលរួមចំណែកកាត់បន្ថយភាពក្រីក្រជាអតិបរមាផងដែរ។
ជាមួយគ្នានោះ លោក ស៊ុំ សោភ័ណ ក៏បានផ្តល់ជាអនុសាសន៍មួយចំនួនផងដែរ ដោយបានជំរុញឱ្យការពិភាក្សានេះត្រូវផ្តោតឱ្យមានកិច្ចសហការជាមួយក្រសួងការងារដែលមានបេឡាជាតិរបបសន្តិសុខសង្គមដែលអនុវត្តលើអនាម័យការងារ និងសុវត្ថិភាពការងារ។
លោកថា ការពិភាក្សាត្រូវផ្តោតឱ្យមានកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ពីយន្តការកិច្ចសហការពាក់ព័ន្ធការអនុញ្ញាតសិទ្ធិសាងសង់ ចាំបាច់ត្រូវមានបញ្ជាក់អំពីការទិញធានារ៉ាប់រង ពិសេសគ្រោះថ្នាក់ការងារស្របតាមច្បាប់ស្តីពីសំណង់។
អគ្គលេខាធិការនៃសហព័ន្ធសហជីពកម្មករសំណង់និងព្រៃឈើកម្ពុជា (BWTUC) លោក យ៉ាន់ ធី បានប្រាប់ភ្នំពេញប៉ុស្តិ៍ថា កម្មករនិយោជិតក្នុងវិស័យសំណង់នៅតែប្រឈមនឹងគ្រោះថ្នាក់ការងារដដែល ប៉ុន្តែជាគ្រោះថ្នាក់ស្រាល ឬតូចៗប៉ុណ្ណោះដែលកើតឡើងសឹងតែជាប្រចាំតែម្តង។
លោកបានថ្លែងថា៖ «យើងឃើញថា គ្រោះថ្នាក់ការងារធំៗមិនមានកើតឡើងក្នុងរយៈពេលចុងក្រោយនេះ ដូចជា ការបាក់រលំអគារជាដើម ប៉ុន្តែគ្រោះថ្នាក់នៅកន្លែងធ្វើការ និងតាមផ្លូវធ្វើដំណើរទៅធ្វើការនៅតែកើតមានឡើងដដែល»។
គ្រោះថ្នាក់ការងារដែលកម្មករនិយោជិតតែងតែជួបប្រទះនោះមានដូចជា ធ្លាក់ពីលើទីខ្ពស់ ឆក់ខ្សែភ្លើង ការធ្លាក់វត្ថុផ្សេងៗលើ និងការមុតដៃជើង។
ទាក់ទងនឹងការទទួលបាននូវបេឡាជាតិរបបសន្តិសុខសង្គម (ប.ស.ស) សម្រាប់កម្មករនិយោជិត លោក យ៉ាន់ធី បានប្រាប់ថា មានកម្មករតិចតួចប៉ុណ្ណោះដែលទទួលបាននូវកិច្ចគាំពារសង្គម ហើយខាងសហជីពរបស់លោកក៏បានស្នើទៅ ប.ស.ស ដើម្បីស្នើសុំនូវបណ្ណមូលនិធីសមធម៌ដល់កម្មករសំណង់ ដែលមិនទាន់ទទួលបានកាលពីចុងឆ្នាំ ២០២១ ផងដែរ។
លោកបានបញ្ជាក់ថា៖ «ជាការឆ្លើយតបពី ប.ស.ស. គឺពួកគាត់មិនអាចទទួលបានទេដោយតម្រូវឱ្យមានលក្ខខណ្ឌមួយចំនួនដូចជា លិខិតបញ្ជាក់មុខរបរពីឃុំ-សង្កាត់ ដែលនេះហើយជាឧបសគ្គសម្រាប់ពួកគាត់ដោយសារពួកគាត់ធ្វើការចល័តពី ១ កន្លែងទៅ ១ កន្លែង»។
បើយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ឱ្យដឹងថា បច្ចុប្បន្ននេះ កម្មករនិយោជិតផ្នែកសំណង់នៅក្នុងប្រទេសកម្ពុជាមានប្រមាណពី ២០ ទៅ ២៥ ម៉ឺននាក់៕
វីដេអូ៖