.jpg)
ពិធីសំណេះសំណាលរបស់កងកម្លាំងមួកខៀវនាពេលកន្លងមក។ រូបថត មជ្ឈមណ្ឌលជាតិរក្សាសន្តិសុខ UN
ភ្នំពេញៈ កម្ពុជាគ្រោងនឹងបញ្ជូនកងទ័ពមួកខៀវចំនួន ៤០៣ នាក់ទៅកាន់សាធារណរដ្ឋលីបង់ និងអាហ្វ្រិកកណ្តាល នៅខែកុម្ភៈខាងមុខនេះ ដើម្បីចូលរួមបេសកកម្មរក្សាសន្តិភាព ក្រោមឆត្ររបស់អង្គការសហប្រជាជាតិ។ នេះបើតាមការប្រាប់ឱ្យដឹងពីមន្ត្រីនាំពាក្យនៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពកាលពីរសៀលថ្ងៃអង្គារ។
លោកស្រី កុសល ម៉ាលីដា អ្នកនាំពាក្យ មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបានប្រាប់ភ្នំពេញប៉ុស្តិ៍ថា កងកម្លាំងមួកខៀវកម្ពុជា ដែលនឹងត្រូវបំពេញបេសកកម្មប្ដូរវេននៅប្រទេសលីបង់ និងអាហ្វ្រិកកណ្ដាលក្រោមឆត្រអង្គការសហប្រជាជាតិ នាពេលខាងមុខទាំង ៤០៣ នាក់នេះ គឺមកពីអង្គភាពចំនួន ២ រួមមាន អង្គភាពកងវិស្វកម្មពហុជំនាញលេខ ៨២៩ និងកងវិស្វកម្មសំណង់លេខ ៤៣២ ក្នុងនោះមានកងកម្លាំងជាស្ត្រីចំនួន ៥២ នាក់។
លោកស្រី ម៉ាលីនដា បានបញ្ជាក់ថា៖ «បើគ្មានអ្វីប្រែប្រួលទេនោះ កងកម្លាំងមួកខៀវកម្ពុជាចំនួន ១៨៤ នាក់នឹងត្រូវហោះហើរទៅកាន់ប្រទេសលីបង់នៅដើមសប្ដាហ៍ទី ១ នៃខែកុម្ភៈ ឆ្នាំ ២០២២ ខាងមុខនេះ ហើយនៅដើមសប្ដាហ៍ទី ៣ ខែកុម្ភៈ កងកម្លាំងមួកខៀវរបស់យើងចំនួន ២១៩ នាក់ទៀតនឹងចាកចេញទៅកាន់អាហ្វ្រិកកណ្ដាល»។
បើតាមលោកស្រី ម៉ាលីនដា កងកម្លាំងមួកខៀវកម្ពុជាដែលត្រូវបំពេញបេសកកម្មរក្សាសន្តិភាពនៅអាហ្វ្រិកកណ្ដាល ក្រោមឆត្រអង្គការសហប្រជាជាតិនាប៉ុន្មានឆ្នាំកន្លងមកនេះមានចំនួនត្រឹមតែ ២០៤ នាក់ប៉ុណ្ណោះ ប៉ុន្តែសម្រាប់ឆ្នាំនេះ អង្គការសហប្រជាជាតិបានស្នើសុំកម្លាំងចំនួន ១៥ នាក់បន្ថែមទៀត ជាពិសេសកម្លាំងស្ត្រី ដែលជាកងកម្លាំងមួកខៀវដែលត្រូវបំពេញបេសកកម្ម រក្សាសន្តិភាពនៅអាហ្វ្រិកកណ្ដាលឆ្នាំនេះកើនឡើង ដល់ ២១៩ នាក់។
លោកស្រីបានប្រាប់ឱ្យដឹងទៀតថា៖ «កិច្ចការងារជាកាតព្វកិច្ចដែលកងកម្លាំងមួកខៀវកម្ពុជាយើងត្រូវបំពេញក្នុងបេសកកម្មក្រោមឆត្រអង្គការសហប្រជាជាតិក្នុងប្រទេសលីបង់ និងអាហ្វ្រិកកណ្ដាលនាពេលខាងមុខនេះ គឺជាកិច្ចការពហុជំនាញដែលក្នុងនោះបូកបញ្ចូល ទាំងកិច្ចការបោសសម្អាតមីន និងការងារសាងសង់ហេដ្ឋារចនាសម្ព័ន្ធ»។
លោកស្រីបានបន្តថា ដើម្បីជាការលើកទឹកចិត្តដល់កងកម្លាំងមួកខៀវកម្ពុជាទាំងនោះ កាលពីព្រឹកថ្ងៃទី ១៨ ខែមករា ឆ្នាំ ២០២២ លោក សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាពបានចុះសួរសុខទុក្ខ និងសំណេះសំណាលជាមួយកងវិស្វកម្ម-ពហុជំនាញលេខ ៨២៩ ដែលកំពុងហ្វឹកហ្វឺនបន្ថែមលើមុខជំនាញឯកទេស ដើម្បីត្រៀមចេញទៅបំពេញបេសកកម្មអង្គការសហប្រជាជាតិនៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ខេត្តកំពង់ស្ពឺ។ បច្ចុប្បន្នសាលាហ្វឹកហ្វឺនកងកម្លាំងរក្សាសន្តិភាពពហុជាតិ ខេត្តកំពង់ស្ពឺ បានធ្វើការបណ្ដុះបណ្ដាលដល់កងកម្លាំងត្រៀមប្តូរវេនចេញបំពេញបេសកកម្មនៅសាធាណរដ្ឋលីបង់ និងអាហ្វ្រិកកណ្តាលតាមកម្មវិធីជាក់ស្តែងលើជំនាញវិស្វកម្ម មានសំណង់ផ្ដេក និងបញ្ឈរ ផ្នែកសុខាភិបាលជំនាញបច្ចេកទេសបើកបររថយន្ត គ្រឿងចក្រ រថយន្តពន្លត់អគ្គិភ័យ និងជួសជុលគ្រឿងយន្តកម្រិតស្រាលជំនាញបោសសម្អាតមីនដោយដៃ ដោយគ្រឿងចក្រកម្ទេចយុទ្ធភណ្ឌមិនទាន់ផ្ទុះ (EOD, IEDS) និងក្បួនយុទ្ធវិធីទ័ព។ នេះបើតាមសម្ដី លោក ហួត គឹមសាន អគ្គនាយករង និងជានាយកសាលាហ្វឹកហ្វឺនកងកម្លាំងរក្សាសន្តិភាពពហុជាតិ។
លោក ហួត គឹមសាន បានបញ្ជាក់ថា៖ «សិក្ខាកាមដែលកំពុងសិក្សា និងហ្វឹកហ្វឺននូវគ្រប់ជំនាញខាងលើនឹងត្រូវត្រៀមប្តូរវេនចេញបំពេញបេសកកម្មរបស់ អ.ស.ប នៅសាធារណរដ្ឋលីបង់ និងអាហ្វ្រិកកណ្តាល នាពេលឆាប់ៗខាងមុខនេះមានសិក្ខាកាមសរុបចំនួន ៤០៣ នាក់»។
ប្រតិបត្តិការសន្តិភាពរបស់អង្គការសហប្រជាជាតិ គឺជាគោលការណ៍សកលបាននិងកំពុងដើរតួនាទីយ៉ាងសំខាន់តាមរយៈការចូលរួមពីគ្រប់មជ្ឈដ្ឋានជាតិ និងអន្តរជាតិ ប្រតិបត្តិការរួមគ្នាក្នុងការជួយដល់បណ្តាប្រទេសដែលរងការហែកហួរដោយសារភ្លើងសង្គ្រាម និងចូលរួមជាមួយសាមីប្រទេសក្នុងការស្តារនីតិសម្បទាសន្តិភាព ស្ថិរភាព និងការអភិឌ្ឍ ស្របតាមគោលការណ៍អង្គការសហប្រជាជាតិ ដើម្បីកសាងមាគ៌ាឆ្ពោះទៅកាន់ពិភពលោកមួយដែលមានសន្តិភាព និងវឌ្ឍនភាព។
គិតចាប់តាំងពីឆ្នាំ ២០០៦ រហូតមកទល់ពេលនេះ កម្ពុជាបានបញ្ជូនកងកម្លាំងរក្សាសន្តិភាពជាង ៧ ០០០ នាក់ទៅបំពេញបេសកកម្មមនុស្សធម៌ជាមួយអង្គការសហប្រជាជាតិនៅក្នុងប្រទេសចំនួន ៩ រួមមាន ប្រទេសស៊ូដង់ ស៊ូដង់ខាងត្បូង ឆាដ លីបង់ ស៊ីរី ម៉ាលី អាហ្វ្រិកកណ្តាល សាយប្រឺស និងយេម៉ែន។
បច្ចុប្បន្នកម្ពុជាមានកម្លាំងរក្សាសន្តិសុខអង្គការសហប្រជាជាតិ កងទ័ពមួកខៀវកម្ពុជាជិត ៨០០ នាក់ក្នុងនោះមាននារីជិត ៨០ នាក់ បាននិងកំពុងបំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិនៅប្រទេសលីបង់ ស៊ូដង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រិកកណ្តាល៕
