.jpg)
កិច្ចប្រជុំក្រុមការងារ ឧត្តមមន្ត្រីច្បាប់ពីថ្ងៃទី ១៨ មករា។ រូបថត ក្រសួងយុត្តិធម៌
ភ្នំពេញៈ ក្រុមការងារឧត្តមមន្ត្រីច្បាប់ និងយុត្តិធម៌អាស៊ាននៃក្រសួងយុត្តិធម៌បានបើកកិច្ចប្រជុំ លើកដំបូងពិនិត្យលើការស្នើសុំនានារបស់លេខាធិការដ្ឋានអាស៊ាន ដើម្បីឆ្លើយតបទាន់ពេលវេលា និងពិនិត្យលើលទ្ធភាពក្នុងការលើកសំណើគម្រោងមួយចំនួន ដែលចាំបាច់ដាក់ទៅលេខាធិការដ្ឋានអាស៊ាន ខណៈប្រទេសកម្ពុជា កំពុងធ្វើជាប្រធានអាស៊ានក្នុងឆ្នាំ ២០២២ នេះ។
បើតាមក្រសួងយុត្តិធម៌ កិច្ចប្រជុំលើកដំបូងរបស់ក្រុមការងារឧត្តមមន្ត្រីច្បាប់ និងយុត្តិធម៌អាស៊ានកាលពីថ្ងៃទី ១៨ ខែមករា ក្រុមការងារបានពិនិត្យ និងរៀបចំរបៀបរបបការងារ ការបែងចែកភារកិច្ច និងការទទួលខុសត្រូវ និងទិសដៅការងារបន្តរបស់ក្រុមការងារ។
ក្នុងនោះក្រុមការងារបានពិនិត្យលើយន្តការការងារដែលមានស្រាប់ និងរៀបចំយន្តការថ្មីពាក់ព័ន្ធទៅនឹងវិស័យច្បាប់ និងយុត្តិធម៌អាស៊ាននៃក្រសួងយុត្តិធម៌។ ពិនិត្យលើសំណើសុំនានារបស់លេខាធិការដ្ឋានអាស៊ាន ដើម្បីឆ្លើយតបបានរហ័ស និងទាន់ពេលវេលា និងព្រមទាំងពិនិត្យលើលទ្ធភាពក្នុងការលើកសំណើគម្រោងមួយចំនួនដែលចាំបាច់របស់ក្រសួងយុត្តិធម៌ដាក់ជូនលេខាធិការដ្ឋានអាស៊ានក្នុងដំណាក់កាលដែលប្រទេសកម្ពុជាធ្វើជាប្រធានអាស៊ានក្នុងឆ្នាំ ២០២២ នេះ។
លោក ជិន ម៉ាលីន រដ្ឋលេខាធិការ និងជាប្រធានឧត្តមមន្ត្រីច្បាប់ និងយុត្តិធម៌អាស៊ាននៃក្រសួងយុត្តិធម៌ថ្លែងប្រាប់ភ្នំពេញប៉ុស្ដិ៍នៅថ្ងៃទី ១៩ មករាថា ក្រុមការងារឧត្តមមន្ត្រីច្បាប់ និងយុត្តិធម៌អាស៊ាននេះ គឺបង្កើតឡើងដើម្បីពង្រឹងនូវកិច្ចសហប្រតិបត្ដិការរវាងប្រទេសកម្ពុជាជាមួយបណ្ដាប្រទេសអាស៊ានដទៃទៀតក្នុងតំបន់ទៅលើវិស័យច្បាប់ និងយុត្ដិធម៌ ជាពិសេសពង្រឹងកិច្ចសហប្រតិបត្ដិការក្នុងការអនុវត្ដច្បាប់ និងកិច្ចសហប្រតិបត្ដិការរវាងតុលាការនៅក្នុងប្រទេសដែលជាសមាជិកអាស៊ាន។
ការបង្កើតក្រុមការងារនេះក៏ដើម្បីត្រៀមលក្ខណៈសម្រាប់ឆ្នាំ ២០២២ នេះ ដែលកម្ពុជាធ្វើជាប្រធានអាស៊ាន ហើយកម្ពុជាត្រូវដឹកនាំកិច្ចការអាស៊ាននេះនៅលើគ្រប់វិស័យក្នុងនោះមានវិស័យច្រើនពាក់ព័ន្ធនឹងកិច្ចសហប្រតិបត្ដិការក្នុងតំបន់ ហើយក៏មានកិច្ចសហប្រតិបត្ដិការក្នុងវិស័យច្បាប់ និងយុត្ដិធម៌ផងដែរ។ លោកបន្តថា៖ «ក្នុងនោះក៏មានកិច្ចប្រជុំឧត្ដមមន្ដ្រីវិស័យច្បាប់ និងយុត្ដិធម៌ កិច្ចប្រជុំរដ្ឋមន្ដ្រីវិស័យច្បាប់ និងយុត្តិធម៌ និងកិច្ចប្រជុំក្រុមការងារបច្ចេកទេសក្នុងវិស័យច្បាប់ និងយុត្តិធម៌នេះជាច្រើនទៀតដែលត្រូវធ្វើ»។
លោកបញ្ជាក់ថា៖ «អ៊ីចឹងនៅក្នុងកិច្ចប្រជុំនេះយើងបានធ្វើការពិនិត្យថា តើអ្វីដែលយើងបានធ្វើនាពេលកន្លងមកក្នុងវិស័យច្បាប់ និងយុត្តិធម៌ ដែលជាកិច្ចសហប្រតិបត្ដិការនៅក្នុងតំបន់ ហើយអ្វីដែលយើងមិនទាន់បានធ្វើ និងអ្វីដែលយើងមានគម្រោងនឹងធ្វើទៅថ្ងៃខាងមុខពាក់ព័ន្ធដល់កិច្ចសហប្រតិបត្ដិការក្នុងតំបន់លើវិស័យច្បាប់ និងយុត្តិធម៌នេះ»។
បើតាមលោក ជិន ម៉ាលីន កិច្ចប្រជុំនេះក៏បានលើកឡើងផងដែរថា តើក្នុងពេលដែលកម្ពុជាធ្វើជាប្រធានអាស៊ាននៅឆ្នាំ ២០២២ កម្ពុជាមានកម្មវិធីអ្វីដែលអាចស្នើហើយធ្វើការដឹកនាំ។ អាចមានគម្រោង ឬមួយកម្មវិធីកិច្ចសហប្រតិបត្ដិការក្នុងវិស័យច្បាប់ និងយុត្តិធម៌អ្វីខ្លះ ដែលកម្ពុជាអាចស្នើហើយដឹកនាំការងារនោះតែម្ដង។
លោកបញ្ជាក់ថា៖ «ក្នុងកិច្ចប្រជុំនេះ យើងពិនិត្យមើលទៅលើអ្វីដែលបានធ្វើនាពេលកន្លងមកពាក់ព័ន្ធទៅនឹងវិស័យច្បាប់ និងយុត្តិធម៌ក្នុងក្របខ័ណ្ឌកិច្ចសហប្រតិបត្តិការក្នុងតំបន់ពាក់ព័ន្ធទៅនឹងអ្វីដែលយើងមិនទាន់បានធ្វើ និងអ្វីដែលយើងត្រូវធ្វើជាពិសេសគម្រោង និងកម្មវិធីអ្វីខ្លះ ដែលមានសារៈសំខាន់ សម្រាប់វិស័យច្បាប់ និងយុត្តិធម៌កម្ពុជាដែលយើងអាចស្នើឡើង និងរៀបចំតែម្ដង»។
លោក កើត រិទ្ធ រដ្ឋមន្ដ្រីក្រសួងយុត្តិធម៌កាលពីថ្ងៃទី ១៧ ខែធ្នូ ឆ្នាំ ២០២១ បានបង្កើតក្រុមការងារឧត្តមមន្ត្រីច្បាប់ និងយុត្តិធម៌អាស៊ាននៃក្រសួងយុត្តិធម៌ ដែលមានលោក ជិន ម៉ាលីន ជាប្រធានក្រុមការងាររួមនឹងមន្ដ្រីចំណុះក្រសួងចំនួន ១២ រូបទៀតជាអនុប្រធាន និងសមាជិក។ ក្រុមការងារនេះមានភារកិច្ច សម្របសម្រួលកិច្ចការអាស៊ានដែលពាក់ព័ន្ធនឹងវិស័យច្បាប់ និងយុត្តិធម៌។ សម្របសម្រួល និងសហការជាមួយលេខាធិការដ្ឋានអាស៊ាន-កម្ពុជា និងលេខាធិការដ្ឋានអាស៊ានពាក់ព័ន្ធនឹងវិស័យច្បាប់ និងយុត្តិធម៌។ សម្របសម្រួល និងសហការជាមួយអង្គភាពជំនាញរបស់ក្រសួងយុត្តិធម៌លើការរៀបចំឯកសារច្បាប់ និងឯកសារនានាពាក់ព័ន្ធនឹងកម្មវិធីសហប្រតិបត្តិការច្បាប់ និងយុត្តិធម៌អាស៊ាន៕
