.jpg)
លោក ប៊ិន ឈិន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។ ហេង ជីវ័ន
ភ្នំពេញៈ កម្ពុជាបញ្ជាក់ជាថ្មីថា «មិត្តភាពដែកថែប» រវាងកម្ពុជា និងចិន គ្មាននរណាអាចបំបែកបាននោះទេ ព្រោះមិត្តភាពនេះបានឆ្លងកាត់ការសាកល្បង និងការលំបាកជាច្រើនក្នុងប្រវត្តិសាស្ត្រ ហើយរយៈពេលប៉ុន្មានឆ្នាំចុងក្រោយនេះ ប្រទេសទាំង ២ បានពង្រឹងនូវកិច្ចសហប្រតិបត្តិការលើគ្រប់វិស័យទៀតផង។
លោក ប៊ិន ឈិន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីថ្លែងក្នុងកិច្ចសន្ទនាលើកទី ២ ស្តីពីការផ្លាស់ប្តូរ និងការស្វែងយល់ពីអរិយធម៌រវាងប្រទេសចិន និងកម្ពុជាកាលពីថ្ងៃទី ១០ ខែមករា ថា៖ «ក្នុងនាមជាប្រទេសជិតខាង និងជាដៃគូជិតស្និទ្ធ កម្ពុជា និងចិនបានបង្កើតនិងថែរក្សាចំណងមិត្តភាពដែកថែប ដែលមិនអាចបំបែកបានដែលឆ្លងកាត់ការសាកល្បង និងការលំបាកផ្សេងៗជាច្រើនក្នុងប្រវត្តិសាស្ត្រ»។
លោកបន្តថា៖ «ទំនាក់ទំនងដ៏រឹងមាំរវាងប្រជាជន និងប្រជាជននៃប្រទេសយើងទាំង ២ បង្កើតបានជាមូលដ្ឋានដ៏រឹងមាំសម្រាប់ការរីកចម្រើនជាបន្តបន្ទាប់នៃកិច្ចសហប្រតិបត្តិការជាមិត្តភាពរវាងកម្ពុជា និងចិន។ ក្នុងរយៈពេលប៉ុន្មានឆ្នាំចុងក្រោយនេះ កិច្ចសហប្រតិបត្តិការកម្ពុជា-ចិនត្រូវបានពង្រឹងលើគ្រប់វិស័យ»។ តាមរយៈសុន្ទរកថា ដែលបានផ្សព្វផ្សាយនាថ្ងៃទី ១៩ ខែមករាលោក ប៊ិន ឈិន ដែលជាឧបនាយករដ្ឋមន្ត្រីប្រចាំការដែរនោះ រំឭកថា ប្រទេសកម្ពុជា និងចិនមានប្រវត្តិទំនាក់ទំនងជាមួយគ្នាជាយូរលង់ណាស់មកហើយ។ ប្រទេសទាំង ២ មានវប្បធម៌ និងអរិយធម៌ស្រដៀងគ្នា ហើយចំពោះការប្រាស្រ័យទាក់ទងគ្នា ដោយមេត្រីភាពរវាងប្រទេសទាំង ២ មានប្រវត្តិជាង ១ ០០០ ឆ្នាំមកហើយ។ លោកបានលើកជាភ័ស្តុតាងថា ចម្លាក់លើជញ្ជាំងប្រាសាទបាយ័នបានបង្ហាញពីទិដ្ឋភាពដ៏រស់រវើកនៃការប្រាស្រ័យទាក់ទងគ្នារវាងពាណិជ្ជករចិន និងប្រជាជនកម្ពុជាកាលពីសម័យបុរាណ។ ចាប់តាំងពីឆ្នាំ ១៩៥៨ មក ទំនាក់ទំនងកម្ពុជា-ចិន គឺជា «បងប្អូនល្អជាអ្នកជិតខាងល្អ និងជាដៃគូល្អ»។ ជានិច្ចកាលកម្ពុជា និងចិនតែងតែគាំទ្រគ្នាទៅវិញទៅមក ហើយមានកិច្ចសហការល្អ។ លោក ប៊ិន ឈិន លើកឡើងនូវកំណាព្យបុរាណចិន ១ ឃ្លាដែលពោលថា «ភ្នំទាំងឡាយទោះនៅឆ្ងាយពីគ្នា តែស្រស់បំព្រងក្រោមដំណក់ទឹកភ្លៀងរួមគ្នា ដូច្នេះយើងនៅឃ្លាតឆ្ងាយពីគ្នាយ៉ាងម៉េចកើត បើយើងទទួលពន្លឺព្រះចន្ទតែ ១?»។
លោកបានធៀបន័យកំណាព្យនេះថា៖ «ដូចគ្នានឹងប្រជាជនកម្ពុជាតែងនិយាយថា យើងត្រូវរួមវាសនាជាមួយគ្នា ព្រោះយើងរស់ក្រោមដំបូលមេឃតែ ១ ស្រូបយកខ្យល់អុកស៊ីហ្ស៊ែនពីលម្ហអាកាសតែ ១ និងផឹកទឹកទន្លេមេគង្គ ជាមួយគ្នា»។
ពាក់ព័ន្ធនឹងកីឡាអូឡាំពិករដូវរងានៅទីក្រុងប៉េកាំង ដែលប្រទេសចិនជាម្ចាស់ផ្ទះលោក ប៊ិន ឈិន ប្រកាសថា កម្ពុជា បាននិងកំពុងការពារស្មារតីអូឡាំពិក រក្សាភាពបរិសុទ្ធនៃចលនាអូឡាំពិក គាំទ្រការរួបរួម និងមិត្តភាព ហើយប្រឆាំងនឹងចលនាបំបែកបំបាក់ និងនិន្នាការប្រឆាំងស្មារតីអូឡាំពិក។
លោកថ្លែងថា៖ «យើងនឹងបន្តប្រឆាំងរាល់ទម្រង់នៃនយោបាយនីយកម្មអូឡាំពិក និងនយោបាយនីយកម្មកីឡា ហើយយើងទន្ទឹងរង់ចាំជោគជ័យទាំងស្រុងនៃកីឡាអូឡាំពិក»។
លោក ហេង គីមគង់ អ្នកស្រាវជ្រាវជាន់ខ្ពស់នៃមជ្ឈមណ្ឌលអភិវឌ្ឍន៍កម្ពុជា ប្រាប់ភ្នំពេញប៉ុស្តិ៍នាថ្ងៃទី ១៩ មករាថា វាពិតជាល្អណាស់ ដែលកម្ពុជាបានបង្កើតទំនាក់ទំនងរឹងមាំជាមួយប្រទេសចិន ជាពិសេសនៅក្នុងបរិបទនៃការរះឡើងរបស់ប្រទេសចិន។ លោកថ្លែងថា៖ «ទោះបីជាយ៉ាងណាក៏ដោយក្នុងពេលជាមួយគ្នានេះ កម្ពុជាចាំបាច់ត្រូវធានាថា ការចងសម្ព័ន្ធភាពជិតស្និទ្ធរបស់ខ្លួនជាមួយប្រទេសចិននឹងមិនប៉ះពាល់ដល់ទំនាក់ទំនងរបស់ខ្លួនជាមួយប្រទេសផ្សេងទៀត នៅក្នុងតំបន់ និងប្រទេសដែលជាតួអង្គសំខាន់នៅក្នុងឥណ្ឌូប៉ាស៊ីហ្វិក ដូចជាប្រទេសជប៉ុន និងសហរដ្ឋអាមេរិក»។
ដោយឡែកពាក់ព័ន្ធនឹងលទ្ធិប្រជាធិបតេយ្យវិញលោក ប៊ិន ឈិន លើកឡើងថា គ្មានប្រទេសណាមួយមានកម្មសិទ្ធិផ្តាច់មុខលើលក្ខណវិនិច្ឆ័យនៃលទ្ធិប្រជាធិបតេយ្យនោះទេ ហើយក៏មិនអាចកម្រិតសិទ្ធិរបស់ប្រជាជនក្នុងការស្វែងរក និងការជ្រើសរើសគំរូប្រជាធិបតេយ្យនោះដែរ។ ការវិនិច្ឆ័យថា តើប្រទេសមួយមានប្រជាធិបតេយ្យឬអត់ គួរធ្វើឡើងដោយប្រជាជននៃប្រទេសនោះ មិនមែនដោយមនុស្ស ១ ក្តាប់តូចណានោះទេ៕
