ភ្នំពេញៈ តុលាការកំពូលនៅថ្ងៃទី ១៩ មករា បានប្រកាសសាលដីកាសម្រេចបង្វិលសំណុំរឿងបណ្តឹងមោឃភាពនីតិវិធីរបស់អតីតឧត្តមសេនីយ៍ទោយោធាផ្កាយ ២ ម្នាក់ទៅសាលាឧទ្ធរណ៍ឱ្យធ្វើការជំនុំជម្រះឡើងវិញពាក់ព័ន្ធបទចោទប្រើហិង្សាលើអ្នកកាន់កាប់អចលនវត្ថុដោយសុចរិត និងបរិហារកេរ្តិ៍ជាសាធារណៈ បន្ទាប់ពីបានជំនុំជម្រះកាលពីថ្ងៃទី ១២ មករា ឆ្នាំ ២០២២។
លោកចៅក្រម និល ណុន ប្រធានក្រុមប្រឹក្សាជំនុំជម្រះបានអានសាលដីកាក្នុងបន្ទប់សវនាការនៅចំពោះមុខជនត្រូវចោទនៅថ្ងៃទី ១៩ មករាថា សំណុំរឿងនេះមានជនជាប់ចោទឈ្មោះ សូយ ចាន់សឿន ភេទ អាយុ ៤៨ឆ្នាំ។ តុលាការកំពូលបានបើកសវនាការកាលពីថ្ងៃទី ១២ មករាឆ្នាំ ២០២២។
លោកថ្លែងថា ក្រោយពីបានស្តាប់សេចក្តីសន្និដ្ឋានរបស់តំណាងមហាអយ្យការ និងក្រោយពីបានស្តាប់ការសន្និដ្ឋានរបស់មេធាវីការពារសិទ្ធិឱ្យជនត្រូវចោទឈ្មោះ សូយ ចាន់សឿន និងចម្លើយរបស់ជនត្រូវចោទមកក្រុមប្រឹក្សាជំនុំជម្រះតុលាការកំពូលបានសម្រេចជាឯកច្ឆន្ទថា៖ «បណ្តឹងសារទុក្ខរបស់ជននេះ តុលាការកំពូលបដិសេធចោល និងបង្វិលសំណុំរឿងទៅសាលាឧទ្ធរណ៍ភ្នំពេញ ដើម្បីជំនុំជម្រះឡើងវិញ។ ការបង្វិលទៅសាលាឧទ្ធរណ៍ភ្នំពេញវិញនេះ ដោយសារនៅមានចំណុចខ្វះខាតមួយចំនួននៃការសម្រេចសេចក្តី»។
បើតាម លោក ឈឺន សុខា ជាមេធាវីការពារសិទ្ធិឱ្យជនត្រូវចោទបានថ្លែងនៅក្នុងសវនាការកាលពីថ្ងៃទី ១២ មករាថា កូនក្តីរបស់លោកឈ្មោះ សូយ ចាន់សឿន បានទិញដីទំហំ ៤ ហិកតាចូលគ្នាជាមួយឈ្មោះ ស៊ុន ប៊ុនឡា នៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល។ ប៉ុន្តែក្រោយមកឈ្មោះ ស៊ុន ប៊ុនឡា បានមានទំនាស់ជាមួយឈ្មោះ កើត ខេង ពាក់ព័ន្ធដីខាងលើនេះ។
លោកបន្តថា ក្នុងទំនាស់នោះឈ្មោះ កើត ខេង បានប្តឹងកូនក្តីរបស់លោកដែរ ទៅសាលាដំបូងខេត្តកណ្តាលពាក់ព័ន្ធសំណុំរឿងរដ្ឋប្បវេណីហើយឈ្មោះ កើត ខេង ក៏បានប្តឹងកូនក្តីរបស់លោកមកសាលាដំបូងរាជធានី-ភ្នំពេញជារឿងព្រហ្មទណ្ឌមួយទៀតក្នុងសំណុំរឿងតែមួយដូចគ្នា។ បន្ទាប់មកត្រូវបានតំណាងអយ្យការចោទប្រកាន់ពីបទប្រើហិង្សាទៅលើអ្នកកាន់កាប់អចលនវត្ថុ ដោយសុចរិត និងបរិហាកេរ្តិ៍ជាសាធារណៈ។
លោកថ្លែងប្រាប់ចៅក្រមថា៖ «រឿងក្តីមួយតែមានបណ្តឹងដល់ទៅ ២។ ហេតុនេះហើយទើបកូនក្តីរបស់ខ្ញុំប្តឹងមោឃភាពទៅនឹងដីកាសម្រេចនេះ។ ខ្ញុំស្នើសុំឱ្យតុលាការពិចារណាលើការប្តឹងមោឃភាពនីតិវិធីរបស់កូនក្តីខ្ញុំផង ព្រោះសភាព្រហ្មទណ្ឌឧទ្ធរណ៍ភ្នំពេញក៏តម្កល់សាលដីកាតាមសាលក្រមដែរនៅថ្ងៃ ១៦ សីហាឆ្នាំ ២០២១»។
គួរបញ្ជាក់ថា ជនត្រូវចោទឈ្មោះ សូយ ចាន់សឿន មានតួនាទីជានាយរងទីចាត់ការអភិវឌ្ឍន៍អគ្គបញ្ជាការដ្ឋាននៃក្រសួងការពារជាតិ។ ជនរូបនេះ ត្រូវរងបណ្តឹង ១ ករណីទៀត ដោយសារមិត្តស្រីរបស់ខ្លួនឈ្មោះ ឌួង ម៉ាលីស ប្តឹងតុលាការខេត្តកំពង់ស្ពឺពាក់ព័ន្ធវាយស្ត្រីរងគ្រោះ នៅក្នុងរថយន្តពីក្រុងតាខ្មៅ ខេត្តកណ្តាលរហូតដល់ស្រុកភ្នំស្រួច ខេត្ត កំពង់ស្ពឺ កាលពីថ្ងៃទី ២២ មករា ឆ្នាំ ២០២១។
ជនត្រូវចោទ សូយ ចាន់សឿន ត្រូវនគរបាលខេត្តកំពង់ស្ពឺចាប់ខ្លួនកាលពីថ្ងៃទី ៣០ កក្កដា ឆ្នាំ ២០២១ ហើយត្រូវបានតុលាការខេត្តចោទប្រកាន់ពីបទហិង្សាដោយចេតនាមានស្ថានទម្ងន់ទោស និងបង្ខាំងមនុស្សដោយខុសច្បាប់តាមមាត្រា ២១៨ និងមាត្រា ២៥៣ នៃក្រមព្រហ្មទណ្ឌ។ បច្ចុប្បន្នជនត្រូវចោទរូបនេះត្រូវបានឃុំខ្លួននៅពន្ធនាគារខេត្តកំពង់ស្ពឺ៕