.jpg)
កូនកាំបិតចុងស្រួច និងពូថៅ ដែលពួកគេប្រើសម្រាប់កាប់ចាក់គ្នា នៅក្នុងជម្លោះ បន្ទាប់ពីពួកគេផឹកស្រវឹង ពីថ្ងៃទី១៩មករា។ រូបថត ហ្វេសប៊ុក
កំពង់ស្ពឺៈនគរបាលស្រុកគងពិសី នៅថ្ងៃទី២០ មករា បានកំពុងបន្តឃ្លាំមើលជនដៃដល់ម្នាក់ ដែលរងរបួសធ្ងន់កំពុងដេកព្យាបាលនៅមន្ទីរពេទ្យ បន្ទាប់ពីបានចាក់បុរសជាបងថ្លៃម្នាក់ស្លាប់ ក្រោយបញ្ជូនដល់មន្ទីរពេទ្យកាលពីថ្ងៃទី១៩ មករា ក្នុងទំនាស់គ្នាពេលផឹកស៊ី ប្រព្រឹត្តនៅភូមិអណ្តូងច្រុះ ឃុំ ស្នំក្រពើ ស្រុក គងពិសី។
លោក ឃឹម សុផាន់រ៉ា អធិការនគរបាលស្រុក គងពិសី ឱ្យដឹងនៅថ្ងៃទី២០ មករា ថា ជនបង្កឈ្មោះង៉ែត សុខសាន្ត ភេទ ប្រុស អាយុ២៩ឆ្នាំ។ ចំណែកឯជនរងគ្រោះឈ្មោះ វ៉ែន វ៉ាន់ ភេទ ប្រុស អាយុ ៤០ឆ្នាំ ពួកគេជាកសិកររស់នៅក្នុងភូមិ អណ្តូងច្រុះឃុំ ស្នំក្រពើ ។
លោកប្រាប់ថា៖«រហូតដល់ថ្ងៃនេះ(ថ្ងៃទី២០មករា)ជនដៃដល់ កំពុងដេកពេទ្យសង្គ្រោះបន្ទាន់។ ប៉ុន្តែជនសង្ស័យក៏មិនអាចរត់គេចខ្លួនទៅណារួចដែរ ព្រោះកម្លាំងយើង ឃ្លាំមើលគាត់។ ជនសង្ស័យ ត្រូវជនរងគ្រោះយកពូថៅកាប់របួសធ្ងន់ ហើយមិនដឹងថា មានជីវិតរស់ឬយ៉ាងណាទេ»។
លោក នៅ វណ្ណា នាយនគរបាលប៉ុស្តិ៍ឃុំ ស្នំក្រពើ បានរៀបរាប់ប្រាប់តាមសម្តីសាក្សីនៅកន្លែងកើតហេតុនៅថ្ងៃទី២០ មករា ថា រវាងជនរងគ្រោះ និង ជនសង្ស័យជាបងប្អូនថ្លៃនឹងគ្នា ហើយក៏មានផ្ទះនៅក្បែរគ្នាដែរ។
កាលពីវេលាម៉ោងជាង៩យប់ ថ្ងៃទី១៩ មករា គេបានឃើញអ្នកទាំង២នាក់នាំគ្នាផឹកស្រា ហើយមួយសន្ទុះក្រោយមក ក៏មានទំនាស់ពាក្យសម្តីគ្នា ហើយស្រាប់តែវាយតប់គ្នាតែម្តង។
លោកបន្តថា នៅពេលនោះ គេបានឃើញឈ្មោះង៉ែត សុខសាន្ត កាន់កូនកាំបិតចិតបន្លែទៅចាក់ត្រូវបុរសឈ្មោះវ៉ែន វ៉ាន់ ១កាំបិតចំដៃ និងក្រោមដោះខាងស្តាំ១កាំបិតលិចជ្រៅ។
រីឯជនរងគ្រោះប្រហែលជានៅមានកម្លាំងបានយកពូថៅកាប់ជនបង្កត្រូវចំនួន៣កន្លែងត្រង់ស្មាខាងស្តាំ ដៃ និងដងខ្លួន បណ្តាលឱ្យរងរបួសធ្ងន់ ត្រូវបានក្រុមគ្រួសារបញ្ជូនទៅមន្ទីរពេទ្យ។
លោកបញ្ជាក់ថា៖«ជនល្មើសដែលចាក់បងថ្លៃគាត់ស្លាប់ ក៏របួសធ្ងន់ដែរ ឥឡូវនៅដេកពេទ្យលោកសង្ឃ(មន្ទីរពេទ្យព្រះកុសុមៈ)។ ស្ថានភាពរបួសរបស់គាត់ធ្ងន់ដែរហ្នឹង មិនដឹងថា ស្លាប់ឬរស់យ៉ាងណាទេ»។
លោកបន្ថែមថា បទល្មើសឧក្រិដ្ឋដែលបង្កឱ្យមានមនុស្សស្លាប់នេះ ប្រសិនបើខាងក្រុមគ្រួសាររបស់ជនរងគ្រោះស្លាប់មិនប្តឹងក៏ដោយ ក៏ប៉ុន្តែបណ្តឹងអាជ្ញា វាបានកើតឡើង ស្របពេលជាមួយគ្នានឹងបទល្មើសរួចទៅហើយ។ ហេតុដូច្នេះជនសង្ស័យឈ្មោះង៉ែត សុខសាន្ត មិនអាចគេចផុតពីច្បាប់ឡើយ ប្រសិនបើគាត់មិនស្លាប់។ «ប៉ុន្តែខាងបងប្អូនសពបានដាក់ពាក្យបណ្តឹងហើយ»៕
