ភ្នំពេញៈ ក្រសួងពាក់ព័ន្ធជួបពិភាក្សាគ្នាពីយុទ្ធសាស្ត្រកែទម្រង់ការគ្រប់គ្រងសហគ្រាសសាធារណៈដែលយុទ្ធសាស្ត្រនេះនឹងនាំឱ្យមានការបង្កើតអនុក្រឹត្យបន្ថែម និងការកែសម្រួលច្បាប់ពាក់ព័ន្ធសម្រាប់រៀបចំក្រមសីលធម៌របស់សហគ្រាសទាំងនោះក្នុងការបំពេញការងារប្រចាំថ្ងៃប្រកបដោយតម្លាភាព សុចរិតភាព និងគណនេយ្យភាព។
កាលពីថ្ងៃទី ១៩ មករា មន្ត្រីមកពីក្រសួងសេដ្ឋកិច្ច ក្រសួងសាធារណការ និងដឹកជញ្ចូន និងមានការចូលរួមពីមន្ត្រីជំនាញនានាបានជួបពិភាក្សាគ្នាក្នុងកិច្ចប្រជុំស្តីពីយុទ្ធសាស្ត្រកែទម្រង់ការគ្រប់គ្រងសហគ្រាសសាធារណៈតាមប្រព័ន្ធវីដេអូពីចម្ងាយ។
លោកស្រី ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូនដែលបានដឹកនាំក្រុមការងារជំនាញពាក់ព័ន្ធរបស់ក្រសួងចូលរួមពិភាក្សាបានឱ្យដឹងថា កិច្ចប្រជុំនេះផ្តោតសំខាន់លើការសិក្សាអំពីបញ្ហាប្រឈមនានាក៏ដូចជាចំណុចខ្លាំង និងចំណុចខ្សោយនៃការអនុវត្តការគ្រប់គ្រងសហគ្រាសសាធារណៈដើម្បីដាក់ទិសដៅសម្រាប់កែទម្រង់សហគ្រាសសាធារណៈក្នុងពេលខាងមុខ។
ជាមួយគ្នានោះ លោកស្រីបានឱ្យដឹងបន្តថា ភាគីពាក់ព័ន្ធក៏បានពិភាក្សាលើវិធានការអនុវត្តយុទ្ធសាស្ត្រកែទម្រង់សម្រាប់ជាមូលដ្ឋានក្នុងការរៀបចំសេចក្តីព្រាងយុទ្ធសាស្ត្រកែទម្រង់សហគ្រាសសាធារណៈឱ្យស្របតាមឧត្តមានុវត្តន៍ជាអន្តរជាតិ និងស្របតាមបរិការណ៍ជាក់ស្តែងរបស់កម្ពុជា ដើម្បីដាក់ជូនរាជរដ្ឋាភិបាលពិនិត្យ និងសម្រេចផងដែរ។
លោកស្រីបានបញ្ជាក់ថា៖ «វិធានការចំពោះមុខក្នុងការអនុវត្តយុទ្ធសាស្ត្រកែទម្រង់ការគ្រប់គ្រងសហគ្រាសសាធារណៈ គឺត្រូវរៀបចំធ្វើការកែសម្រួលសេចក្តីព្រាងច្បាប់ស្តីពីលក្ខន្តិកៈទូទៅនៃសហគ្រាសសាធារណៈមកជាសេចក្តីព្រាងច្បាប់ស្តីពីការគ្រប់គ្រងសហគ្រាសសាធារណៈ និងរៀបចំសេចក្តីព្រាងអនុក្រឹត្យមួយចំនួនសម្រាប់អនុវត្តច្បាប់ស្តីពីការគ្រប់គ្រងសហគ្រាសសាធារណៈ និងគោលការណ៍សំខាន់សម្រាប់រៀបចំក្រមសីលធម៌ក្នុងការបំពេញការងារប្រចាំថ្ងៃប្រកបដោយតម្លាភាព សុចរិតភាព និងគណនេយ្យភាព»។
លោក អៀង ស៊ុនលី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារបច្ចេកទេសកែទម្រង់សហគ្រាសសាធារណៈនេះ មិនអាចទាក់ទងសុំការអត្ថាធិប្បាយបន្ថែមបានទេកាលពីថ្ងៃទី ២០ មករា។
សហគ្រាសសាធារណៈគឺជាសហគ្រាសដែលមានដើមទុនទាំងអស់ ឬភាគច្រើនជារបស់រដ្ឋដែលមានបេសកកម្មបង្កលក្ខណៈដល់ការអភិវឌ្ឍសេដ្ឋកិច្ច និងសង្គមក្នុងការបង្កើនតម្លៃធនធានធម្មជាតិ និងបង្កើតអាជីព។ នេះបើយោងតាមច្បាប់ស្តីពីលក្ខន្តិកៈទូទៅនៃសហគ្រាសសាធារណៈ។ តាមច្បាប់ដដែលនេះបានកំណត់ថា សហគ្រាសសាធារណៈគឺជានីតិបុគ្គលដែលមានស្វ័យភាពហិរញ្ញវត្ថុ ដែលអាចជាគ្រឹះស្ថានសាធារណៈមានលក្ខណៈសេដ្ឋកិច្ច ឬក្រុមហ៊ុនរដ្ឋ ឬក្រុមហ៊ុនចម្រុះដែលក្នុងនោះរដ្ឋកាន់កាប់ដោយផ្ទាល់ ឬដោយប្រយោលលើសពី ៥១ ភាគរយនៃដើមទុនក្រុមហ៊ុន ឬសិទ្ធិបោះឆ្នោត។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានលើកឡើងថា ជាការពិតណាស់ សហគ្រាសសាធារណៈក៏មានតួនាទីសំខាន់ដែរ ក្នុងការអភិវឌ្ឍសង្គមជាតិ។ ប៉ុន្តែលោកមើលឃើញថា សហគ្រាសសាធារណៈនៅកម្ពុជាហាក់នៅមានកម្រិតនៅឡើយ ជាពិសេសគឺការរីកចម្រើន និងការគ្រប់គ្រងព័ត៌មាន។
លោកបានបង្ហាញការយល់ឃើញថា៖ «ការធ្វើវិសោធនកម្មច្បាប់សម្រាប់គ្រប់គ្រងសហគ្រាសសាធារណៈនឹងក្លាយទៅជាយន្តការមួយដែលនាំឱ្យមានការធ្វើកំណែទម្រង់ការគ្រប់គ្រង និងដំណើរប្រព្រឹត្តទៅនៃសហគ្រាសសាធារណៈដើម្បីឱ្យស្ថាប័នទាំងនេះ បំពេញតួនាទីរបស់ខ្លួនឱ្យបានត្រឹមត្រូវហើយដំណើរការនៃការគ្រប់គ្រងសហគ្រាសសាធារណៈ និងមានតម្លាភាព មានគណនេយ្យភាព និងមានអភិបាលកិច្ចល្អ ដើម្បីឆ្លើយតបទៅនឹងតម្រូវការរបស់សង្គមយើងផងដែរ»៕