សៀមរាបៈ អាជ្ញាធរជាតិអប្សរារដ្ឋបាលព្រៃឈើ និងអង្គការសង្គ្រោះ និងថែរក្សាសត្វព្រៃសហការគ្នាដោះលែងសត្វស្លាប ៣ ប្រភេទចំនួន ២០ ក្បាល និងទោចមកុដ ១ គូ បន្ថែមទៀត ទៅក្នុងព្រៃធម្មជាតិនៃឧទ្យានអង្គរ ខណៈមន្ត្រីចាត់ទុកថា សត្វទាំងនេះបានចូលរួមចំណែកយ៉ាងសំខាន់ដល់វិស័យទេសចរណ៍ និងធនធានធម្មជាតិ។
លោក ឡុង កុសល អ្នកនាំពាក្យអាជ្ញាធរជាតិអប្សរាប្រាប់ភ្នំពេញប៉ុស្តិ៍នៅថ្ងៃទី ២០ មករាថា នេះមិនមែនជាលើកទី ១ នោះទេ ដែលស្ថាប័នទាំង ៣ បានសហការគ្នា ដោះលែងសត្វព្រៃឱ្យទៅរស់នៅក្នុងព្រៃធម្មជាតិនៃឧទ្យានអង្គរ ដែលកន្លងទៅ មានសត្វព្រៃជាច្រើនក៏ត្រូវបានដោះលែងផងដែរ បន្ទាប់ពីបន្សាំពួកគេជាមួយនឹងធម្មជាតិបានជោគជ័យ។ ក្រុមការងារ បានបន្សាំពួកគេរយៈពេល ១ ខែដើម្បីអាចឱ្យពួកគេសុំាទៅនឹងជីវិតរស់នៅបែបធម្មជាតិឡើងវិញនៅក្នុងតំបន់អង្គរនេះ។
លោកបញ្ជាក់ថា៖ «អ្វីដែលយើងបានធ្វើ គឺយើងបន្សាំសត្វទាំងអស់ហ្នឹងឱ្យវាអាចរស់នៅជាមួយស្ថានភាពព្រៃនៅក្នុងតំបន់ហ្នឹងសិន។ យើងរៀបចំជាលក្ខណៈលួចផ្តល់ចំណីឱ្យវាទៅតាមលក្ខណៈបែបធម្មជាតិ។ យើងមានវិធីរបស់យើង ក្នុងការផ្តល់ចំណីដល់វា ដើម្បីឱ្យវាអាចផ្សាំជីវិតរបស់វានៅទីកន្លែងនេះបាន»។ បន្ថែមពីនេះ លោក ឡុង កុសល បានលើកឡើងដែរថា ការដែលធ្វើឱ្យមានជីវិតសត្វព្រៃត្រឡប់មកវិញ នៅក្នុងតំបន់អង្គរនេះ គឺបន្ថែមពីលើអ្វីដែលអាជ្ញាធរជាតិអប្សរាបានរៀបចំឱ្យមានការរស់នៅរបស់មនុស្សជុំវិញប្រាសាទ ដែលទាំងនេះត្រូវបានចាត់ទុកជាសម្បត្តិអរូបីឱ្យស្របទៅនឹងសម្បត្តិរូបីនៅក្នុងឧទ្យានអង្គរ។ ទ្រព្យសម្បត្តិទាំងនេះ គឺត្រូវតែមានការផ្តល់គុណតម្លៃឱ្យគ្នាទៅវិញទៅមក ដោយមានទាំងការរស់នៅរបស់មនុស្ស សត្វព្រៃ ធម្មជាតិ និងប្រាសាទដែលជាគោលបំណងសំខាន់របស់អាជ្ញាធរជាតិអប្សរា។
លោកបានបញ្ជាក់ថា៖ «នេះ គឺជាការចួលរួមចំណែកក្នុងវិស័យទេសចរណ៍ ព្រោះថា ភ្ញៀវទេសចរ គាត់មកអង្គរ មិនមែនមកមើលថ្មប្រាសាទតែ ១ មុខទេ គឺគាត់មកមើលគុណតម្លៃនៃស្នាដៃបង្កើតរបស់មនុស្ស ជាពិសេសបុព្វបុរសខ្មែរ ដែលបានបង្កើតស្នាដៃស្ថាបត្យកម្មដ៏អស្ចារ្យ។ អ៊ីចឹងបន្ថែមលើនេះដែលយើងអាចនឹងផ្តល់ឱ្យភ្ញៀវទេសចរមានអារម្មណ៍ខិតកៀកទៅនឹងធម្មជាតិជាងហ្នឹងថែមទៀត ដែលអាចមកទស្សនាសត្វព្រៃទាំងអស់នេះ»។ ជាមួយនឹងការដោះលែងសត្វព្រៃទាំងនេះ លោក ឡុង កុសល អះអាងថា បច្ចុប្បន្ននេះ គឺពុំមានបទល្មើសសត្វព្រៃអ្វីកើតឡើង គួរឱ្យកត់សម្គាល់ទៀតនោះទេ ដោយសារតែមានកិច្ចការពារបានត្រឹមត្រូវរបស់មន្ត្រីពាក់ព័ន្ធក្នុងព្រៃធម្មជាតិនៃឧទ្យានអង្គរ។
លោក Nick Mark នាយកអង្គការសង្គ្រោះ និងថែរក្សាសត្វព្រៃបានថ្លែងថា សត្វស្លាបចំនួន ២០ ក្បាលនោះ គឺមានសត្វកេងកង សត្វប្រវឹក សត្វក្ងោក ហើយក្នុងនោះ សត្វទោចមកុដ ចំនួន ១ គូ ក៏ត្រូវបានដោះលែងផងដែរ។ ជាមួយនឹងការដោះលែងនេះ លោក Nick បង្ហាញពីក្តីសប្បាយរីករាយ ដែលអាជ្ញាធរជាតិអប្សរាបានផ្តល់ទីកន្លែង និងចូលរួមអភិរក្សសត្វព្រៃក្នុងតំបន់ឧទ្យានជាតិអង្គរ ខណៈតំបន់អង្គរគឺជាតំបន់បេតិកភណ្ឌធម្មជាតិដែលសមស្របសម្រាប់អភិរក្សសត្វព្រៃ។ លោកបញ្ជាក់ថា៖ «ខ្ញុំ សុំអរគុណដល់អ្នកដែលបានឱ្យសត្វប្រវឹក សត្វក្ងោក។ យើងអរគុណគេ ដែលបានឱ្យសត្វទាំងនេះមកយើង ព្រោះយើងសប្បាយនឹងឱ្យសត្វមានសេរីភាពនៅក្នុងព្រៃអង្គរ។ យើងសង្ឃឹមថា សត្វដែលយើងដោះលែង សុខសប្បាយ និងសំណាងល្អ មានសេរីភាពក្នុងព្រៃអង្គរ។ ខ្ញុំសុំអ្នកទាំងអស់ ចូលរួមអភិរក្សសត្វព្រៃនៅស្រុកខ្មែរ»។
បើតាមលោក ជូ រ៉ាឌីណា អនុប្រធាននាយកដ្ឋានព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរាបានឱ្យដឹងថា គម្រោងដោះលែងសត្វព្រៃក្នុងឧទ្យានជាតិអង្គរនេះ គឺជាគម្រោងមួយដែលមានកិច្ចសហការរវាងអាជ្ញាធរជាតិអប្សរា រដ្ឋបាលព្រៃឈើ និងអង្គការសង្គ្រោះ និងថែរក្សាសត្វព្រៃ។ លោកបានឱ្យដឹងដែរថា កន្លងមក ក្រុមការងារបានដោះលែងសត្វព្រៃជាច្រើនប្រភេទ ដោយក្នុងនោះ មានដូចជាឈ្លូស សត្វទោច និងឆ្មាដាវជាដើម ខណៈថ្មីៗនេះក៏មានការដោះលែងសត្វកេងកងតូចផងដែរ៕