សៀមរាបៈ រដ្ឋបាលស្រុកបន្ទាយស្រីកំពុងស្វែងរកការគាំទ្រជាថ្មីពីម្ចាស់ស្រែនៅក្នុងឃុំព្រះដាក់ ដើម្បីខ្ចីដីស្រែ [ដោយគិតឈ្នួល] ពីពួកគាត់ ១ រដូវទុកសម្រាប់រៀបចំគម្រោងស្រែសង្គមជុំទី ២ ក្នុងគោលបំណងផលិតជាស្រូវអង្ករយកទៅជួយប្រជាពលរដ្ឋទីទ័លក្រនៅក្នុងស្រុកនេះ ជាពិសេសអ្នកដែលរងផលប៉ះពាល់ផ្នែកសេដ្ឋកិច្ចដោយសារការរីករាលដាលនៃជំងឺកូវីដ ១៩។
លោក ឃឹម ហ្វីណង់ អភិបាលស្រុកបន្ទាយស្រីថ្លែងនៅថ្ងៃទី ១៩ ខែមករាថា លោកកំពុងតែស្វែងរកការគាំទ្រពីប្រជាពលរដ្ឋ ដើម្បីខ្ចីដីស្រែរបស់ពួកគាត់ ១ រដូវកាលសម្រាប់រៀបចំគម្រោងស្រែសង្គមជុំទី ២ បន្ទាប់ពីធ្វើលើកដំបូងកាលពីឆ្នាំមុនទទួលបានជោគជ័យលើផ្ទៃដី ៤០ ហិកតា ដោយមានពលរដ្ឋ ៨៨ គ្រួសារ បានផ្តល់ដីឱ្យធ្វើស្រែរយៈពេល ៧ ខែ។
លោកអភិបាលស្រុកបន្តថា ឆ្នាំថ្មី ២០២២ នេះ លោកបានស្នើសុំទៅបងប្អូនប្រជាពលរដ្ឋនៅទីនោះបន្តទៀត ប៉ុន្តែបានផ្ទៃដីតែប្រមាណពាក់កណ្តាលប៉ុណ្ណោះ ដោយសារមានប្រជាពលរដ្ឋមួយចំនួនមិនបន្តផ្តល់ឱ្យព្រោះចង់ទុកធ្វើខ្លួនឯង។ យ៉ាងណាក្ដី លោក ឃឹម ហ្វីណង់ ប្រាប់ថា គម្រោងស្រែសង្គមនេះនៅតែធ្វើ ប៉ុន្តែមិនទាន់ដឹងថាត្រូវធ្វើលើផ្ទៃដីប៉ុន្មានហិកតានោះទេ។
លោកថ្លែងថា៖ «អ្នកខ្លះទៀតគាត់ឃើញប្រយោជន៍ត្រង់ថា គាត់ជួយមកឱ្យរដ្ឋបាលស្រុកខ្ចីដី គាត់អាចយកពេលវេលា ដែលសល់ហ្នឹងទៅដើរស៊ីឈ្នួលគេ ធ្វើអ៊ីចឹងទៅគាត់បានចំណូលឌុប ប៉ុន្តែអ្នកខ្លះទៀតគាត់ថាគាត់មិនដឹងធ្វើអីដែរ អ៊ីចឹងគាត់ទំនេរចង់ធ្វើខ្លួនឯង»។
បើតាមលោក ឃឹម ហ្វីណង់ ដីសម្រាប់រៀបចំគម្រោងស្រែសង្គមនេះត្រូវតែរកទីតាំងដែលនៅជុំគ្នាមិនអាចនៅដាច់ដោយឡែកពីគ្នាឡើយ ហើយក៏មិនអាចយកដីទូទៅបានដែរ ពោលយកដីដែលធ្វើស្រែបាន មិនខ្ពស់ពេក មិនទាបពេក ងាយស្រួលធ្វើ និងមានទិន្នផលខ្ពស់។
លោកថ្លែងថា៖ «ទី ១ បើដីខ្ពស់ពេក វាអត់មានទឹកត្រាំទេ ស្រែតែអត់ទឹក មិនអាចធ្វើបានទេ មិនមែនឱ្យតែមានដី ដឹងតែធ្វើបានទេ អ៊ីចឹងយើងរើសទីតាំងបន្តិច ហើយគោលដៅនោះគឺយើងចង់បានកន្លែងណាមួយដែលជឿជាក់ថា មិនបរាជ័យហើយបានទិន្នផលខ្ពស់ ព្រោះយើងមិនចង់យកលុយគេជួយទៅខ្ចីស្រែទូទាត់ ទៅឱ្យ អ្នកស្រុក ហើយទីបំផុត ទិន្នផលអត់បាននោះទេ»។
លោក ហ្វីណង់ បានប្រាប់ទៀតថា គោលដៅដែលយកលុយជំនួយសប្បុរសជនទៅបង្កើតជាគម្រោងស្រែសង្គមនេះ គឺដើម្បីបង្កើនផលឱ្យបានកាន់តែច្រើន សម្រាប់ចែកជូនដល់អ្នកទីទ័លក្រ ជាពិសេសដោយសារបញ្ហាជំងឺកូវីដ ១៩។ លោកថា បើជំនួយមាន ១ ម៉ឺនដុល្លារយកទៅធ្វើស្រែ ត្រូវតែបានផលយ៉ាងតិចក៏បាន ១ ទ្វេជា ២ ទើបសមនឹងកម្លាំងដែលខិតខំធ្វើ។
លោកថ្លែងថា៖ «គម្រោងនេះយើងសុំគេបាន ១ ម៉ឺនដុល្លារហើយយើងយកទៅធ្វើស្រែប្រមូលផលទៅទំហំវាបានឡើងដល់ ២ ទៅ ៣ម៉ឺនដុល្លារ អ៊ីចឹងឃើញពីសូន្យទៅដល់ ៣ ម៉ឺនដុល្លារ តាមរយៈការធ្វើបំប្លែងជារូបភាពបែបនេះជារឿងដែលយើងគិតថា បើយើងធ្វើបានល្អជារឿងដែលគួរតែបន្តដែរ។ បើនៅសុខៗយើងទៅដើរសុំលុយគេយកមកបរិច្ចាគជូនអ្នកអត់ យើងពិបាកសុំ ប៉ុន្តែបើយើងយកមកធ្វើទម្រង់ស្រែសង្គមនេះ គឺយើងងាយស្រួលនៅក្នុងការសុំ»។
លោក ហ្វីណង់ បានឱ្យដឹងដែរថា កាលពីឆ្នាំមុនមានប្រជាពលរដ្ឋ ក្រីក្រ ១ ក្រីក្រ ២ ចាស់ជរា និងជនពិការជិត ២ ០០០ គ្រួសារបានទទួលអង្ករក្នុង ១ គ្រួសារ ចន្លោះប្រមាណ ២០ ទៅ ៣០ គីឡូក្រាម ប៉ុន្តែអ្នកទាំងអស់នេះ ក៏នៅក្នុងគោលដៅដែលរដ្ឋាភិបាលជួយផងដែរ។ លោកថា នៅឆ្នាំថ្មីនេះ មិនទាន់អាចកំណត់ដឹងថាត្រូវជួយប៉ុន្មានទេ ព្រោះអាចមានពលរដ្ឋក្រីក្រខ្លះមិនប៉ះពាល់ខ្លាំងទៀតទេ។
លោកថា៖ «បើយកតែក្រីក្រ ១ ចំនួននេះ ប្រហែលជាទាបជាងទេ យើងកំពុងពិចារណាមើលដែរពីព្រោះ ជួនកាលកន្លែងខ្លះក្រីក្រ ២ ហាក់ដូចជាមិនមានផលប៉ះពាល់ខ្លាំងទេ កាលលើកមុននោះ ១ គ្រួសារយើងផ្តល់ជាអង្គរបានប្រហែល ៣០ គីឡូ អ៊ីចឹងបើបង្រួមចំនួនអ្នកចែក ហើយទិន្នផលយើងនៅដដែល យើងអាចបង្កើនគ្រួសារបានច្រើន ប៉ុន្តែបើយើងពង្រីកចំនួនអ្នកចែកច្រើនគឺបានម្នាក់តិចៗទេ»។
លោក ហ្វីណង់ បានបន្ថែមថា ក្នុងឆ្នាំកន្លងទៅ «គម្រោងស្រែសង្គម» គឺជាច្រកចេញមួយដ៏ប្រសើរ ដើម្បីជួយរំលែកការលំបាករបស់ប្រជាពលរដ្ឋតាមរយៈរូបភាពចូលរួមយ៉ាងទូលំទូលាយទាំងពីសំណាក់ម្ចាស់ស្រែ សប្បុរសជន យុវជនស្ម័គ្រចិត្ត និងអាជ្ញាធរមូលដ្ឋានដោយរួមកម្លាំង រួមធនធាន រួមមធ្យោបាយ ដោះស្រាយបញ្ហារួមគ្នា។ រាល់ការចំណាយត្រូវបានរ៉ាប់រងដោយសប្បុរសជន ចំណែកឯទិន្នផលដែលនៅសេសសល់នឹងត្រូវបានយកទៅប្រើប្រាស់ក្នុងប្រយោជន៍មនុស្សធម៌ទាំងស្រុង។
លោកបានរំឭកថា កាលពីឆ្នាំ ២០២០ ស្មារតីចូលរួមនៃគម្រោងស្រែសង្គមផលិតបានជាស្រូវជាង ៨០ តោនសម្រាប់យកទៅបែងចែកដល់អ្នកមានជីវភាពក្រីក្រនៅទូទាំងស្រុកបន្ទាយស្រី។ ប្រសិនបើគម្រោងនេះ ពិតជាអាចលេចរូបរាងជាថ្មីមែននៅក្នុងឆ្នាំនេះ លោកសង្ឃឹមថា សប្បុរសជន និងកម្លាំងស្ម័គ្រចិត្តទាំងអស់នឹងនៅតែបន្តចូលរួមជួយគាំទ្រគម្រោងនេះជាថ្មីទៀត ដើម្បីបុព្វហេតុប្រយោជន៍រួមមួយនេះ។
លោកថ្លែងថា៖ «រឿងក្រុមការងារអនុវត្តគម្រោង យើងមានហើយ ចំណែកអ្នកជួយក៏មិនពិបាកស្វែងរកដែរ ព្រោះសប្បុរសជនធម្មតាគាត់ស្រាក់គ្នា គ្រឿងចក្រដោយគ្រឿងចក្រ ពូជដោយពូជ កម្លាំងដោយកម្លាំង ថវិកាដោយថវិកាទៅ ភាគច្រើនយើងគួរតែធ្វើបាន ចំណែកម្ចាស់ស្រែ តាមពិតខ្ចីនេះយើងមិនមែនខ្ចីទទេទេ គឺយើងទូទាត់ជូនគាត់» ។
ថ្លែងប្រាប់ភ្នំពេញប៉ុស្តិ៍នៅថ្ងៃទី ២០ ខែមករា លោក រឿន សារ័ត្ន អ្នកគ្រប់គ្រងអង្គការសប្បុរសធម៌កម្ពុជកុលបុត្របានសម្តែងការគាំទ្រ និងលើកទឹកចិត្តឱ្យមានការជួយសង្គមដូចដែលរដ្ឋបាលស្រុកបន្ទាយស្រីបានធ្វើនេះ។
ទន្ទឹមនឹងនេះ លោកក៏ចង់ឃើញការចូលរួមក្នុងការងារសង្គមបែបនេះឱ្យបានកាន់តែច្រើននៅទីកន្លែងផ្សេងទៀត។
លោកថា នេះគឺជាគម្រោងល្អមួយដែលជួយទៅដល់កសិករផង និងបានជួយទៅដល់អ្នកទីទ័លក្រផង។
លោកថ្លែងថា៖ «មានន័យថាយើងជួយបានទាំង ២ គឺបានទាំងពលរដ្ឋដែលមានដីស្រែទំនេរ គាត់អត់មានលទ្ធភាពធ្វើដោយខ្វះកម្លាំងពលកម្ម អ៊ីចឹងទៅបានខាងរដ្ឋបាលស្រុករៀបចំធ្វើអ៊ីចឹងទៅ ដល់ពេលផលហ្នឹងបានទៅម្ចាស់ស្រែបានហូបផង ហើយក៏បានកម្រៃ យើងចែកជូនដល់បងប្អូនប្រជាពលរដ្ឋដែលក្រីក្រហ្នឹងផង» ៕
វីដេអូ៖