.jpg)
រណ្តៅដីនៅឃុំពុកឫស្សីដែលក្រុមហ៊ុនបានជីកលើសអាជ្ញាបណ្ណ។ រូប រដ្ឋបាលខេត្តកណ្តាល
កណ្តាលៈ ក្រុមគណៈកម្មការចម្រុះនៃរដ្ឋបាលខេត្តកណ្ដាលបានផ្អាកសកម្មភាពអាជីវកម្មជីកអាចម៍ដីលក់ដ៏ធំមួយកន្លែងរបស់ក្រុមហ៊ុន មហារដ្ឋា ត្រេដឌីង បន្ទាប់ពីរកឃើញថា ក្រុមហ៊ុននេះបានលួចធ្វើអាជីវកម្មជីកកាយអាចម៍ដី លើសពីទំហំ និងបរិមាណដែលបានស្នើសុំនៅក្នុងអាជ្ញាប័ណ្ណពី ១ ហិកតា រហូតដល់ ១៥ ហិកតា។
លោក ណុប ដារ៉ា អភិបាលរងខេត្តកណ្ដាលប្រាប់ភ្នំពេញប៉ុស្តិ៍នៅថ្ងៃទី ២០ ខែមករាថា កាលពីរសៀលថ្ងៃទី ១៩ ខែមករា លោកបានដឹកនាំក្រុមការងារនៃគណៈបញ្ជាការឯកភាពខេត្តកណ្ដាលចុះត្រួតពិនិត្យទីតាំងការដ្ឋានអាជីវកម្មជីករណ្ដៅដីមួយកន្លែងរបស់ក្រុមហ៊ុន មហារដ្ឋា ត្រេដឌីង នៅចំណុចអាងមេទឹកប្រមូលខ្លា នៅភូមិអញ្ច្រែងក្រោម ឃុំពុកឫស្សី ស្រុកខ្សាច់កណ្ដាល ហើយក្នុងជំហានបឋម ក្រុមមន្ត្រីជំនាញបានរកឃើញថា ក្រុមហ៊ុននេះបានធ្វើប្រតិបត្តិការអាជីវកម្ម ជីកកាយអាចម៍ដីលើសពីទំហំ និងបរិមាណដែលបានស្នើសុំនៅក្នុងអាជ្ញាប័ណ្ណ ដែលចេញដោយរដ្ឋបាលខេត្តកណ្ដាល។
លោកថា៖ «នៅក្នុងអាជ្ញាប័ណ្ណផ្ទៃដីដែលបានអនុញ្ញាតឱ្យធ្វើអាជីវកម្មជីកកាយយកអាចម៍ដីនោះ គឺមានទំហំ ១ ហិកតា ប៉ុន្តែក្រុមហ៊ុននេះបានធ្វើអាជីវកម្មជីកកាយដីរហូតដល់ ១៥ ហិកតា ហើយអាជ្ញាប័ណ្ណនោះទៀតសោត គឺបានផុតសុពលភាពតាំងពីចុងខែធ្នូ ឆ្នាំ ២០២១ មកម្ល៉េះ»។ ក្រោយពីពិនិត្យឃើញមិនមានភាពអនុលោមតាមច្បាប់ក្រុមការងារក៏បានសម្រេចផ្អាកសកម្មភាពអាជីវកម្មរបស់ក្រុមហ៊ុននេះជាបណ្ដោះអាសន្ន ដើម្បីឱ្យម្ចាស់ក្រុមហ៊ុនចូលខ្លួនមកដោះស្រាយទៅតាមផ្លូវច្បាប់។
បើតាមលោក ដារ៉ា គ្រឿងចក្រអេស្កាវ៉ាទ័រ ២ គ្រឿង និងរថយន្តដឹកដី ៨ គ្រឿង ដែលបម្រើឱ្យការងារអាជីវកម្មជីកកាយ និងដឹកជញ្ជូនអាចម៍ដី ដែលរំលោភលើអាជ្ញាប័ណ្ណអាជីវកម្មរ៉ែត្រូវបានក្រុមការងារចាប់រឹបអូសយកមករក្សាទុកជាបណ្ដោះអាសន្ននៅអធិការដ្ឋាននគរបាលស្រុកខ្សាច់កណ្ដាល។
ទន្ទឹមនឹងនេះលោកបានអំពាវនាវឱ្យម្ចាស់ក្រុមហ៊ុនមហារដ្ឋា ត្រេដឌីង ប្រមូលឯកសារពាក់ព័ន្ធនានាមកបង្ហាញជូនក្រុមការងារចម្រុះដោយមិនឱ្យហួសរយៈពេល ១៥ ថ្ងៃគិតចាប់ពីថ្ងៃចុះពិនិត្យនេះតទៅ។
លោក ដារ៉ា បានឱ្យដឹងទៀតថា ក្រុមពាណិជ្ជករមួយចំនួនដែលប្រកបមុខរបរលើវិស័យជីកដឹកជញ្ជូនអាចម៍ដីនេះបានលួចបន្លំធ្វើអាជីវកម្មដោយខុសច្បាប់ ដោយមានការគប់គិតពីមន្ត្រីមូលដ្ឋានមួយចំនួនដែលការណ៍នេះបានធ្វើឱ្យបាត់បង់ចំណូលសួយសារជូនរដ្ឋរាប់ពាន់លានរៀលក្នុងឆ្នាំ។
លោកបានបញ្ជាក់ថា៖ «កន្លងមកមានមន្ត្រីដៃរហ័សខ្លះបានលួចគប់គិតជាមួយពាណិជ្ជករមួយចំនួន ក្នុងវិស័យជីកកាយរណ្ដៅដី ដោយគ្មានអាជ្ញាប័ណ្ណអាជីវកម្មរ៉ែ ដែលចេញដោយសមត្ថកិច្ចជំនាញ ហើយករណីនេះយើងត្រូវទទួលស្គាល់ការពិត ហេតុដូច្នេះទើបបច្ចុប្បន្ន ក្រុមការងារយើងបានពង្រឹងការចុះស្រាវជ្រាវ និងបង្ក្រាបលើករណីនេះ ដើម្បីប្រមូលសួយសារជូនរដ្ឋ»។
កាលពីម្សិលមិញ ភ្នំពេញ-ប៉ុស្តិ៍បានព្យាយាមទាក់ទងទៅក្រុមហ៊ុនរណ្ដៅដី មហារដ្ឋា ត្រេដឌីង ដើម្បីស្នើសុំការពន្យល់ជុំវិញករណីនេះ ប៉ុន្តែមិនអាចទាក់ទងបានដោយទូរស័ព្ទចូលគ្មានអ្នកទទួល។
យ៉ាងណាក៏ដោយ លោក ជា សារិទ្ធ ប្រធានមន្ទីររ៉ែ និងថាមពល ខេត្តកណ្ដាល បានប្រាប់ភ្នំពេញប៉ុស្តិ៍ថា អាជ្ញាប័ណ្ណ ដែលក្រុមហ៊ុនទទួលបានពីរដ្ឋបាលខេត្តកណ្ដាលសម្រាប់ធ្វើអាជីវកម្មជីកកាយរណ្ដៅដីនៅចំណុចអាងមេទឹកប្រមូលខ្លា ក្នុងឃុំពុកឫស្សី គឺមានផ្ទៃដី ១ ហិកតា តែក្រុមហ៊ុនបានជីកកាយរហូតដល់ ១៥ ហិកតា។
លោក សារិទ្ធ មានប្រសាសន៍ថា៖ «កន្លងមក មន្ត្រីជំនាញយើង ផាកពិន័យគិតជាប្រាក់ ១ ដុល្លារ ក្នុង ១ ម៉ែត្រគុបដី ចំពោះអ្នកធ្វីអាជីវកម្មធនធានរ៉ែ ដោយគ្មានអាជ្ញាប័ណ្ណ ដែលចេញដោយសមត្ថកិច្ចជំនាញ។ ប៉ុន្តែសម្រាប់ករណីនេះ ក្រុមការងារគណៈកម្មការចម្រុះខេត្តបានសម្រេចធ្វើការផាកពិន័យអន្តរការណ៍ទៅលើម្ចាស់ហ៊ុនអាជីវកម្មរណ្ដៅដី មហារដ្ឋា ត្រេដឌីង តាមមាត្រា ៣៥ ថ្មីនៃច្បាប់ស្ដីពីការគ្រប់គ្រង និងធ្វើអាជីវកម្មធនធានរ៉ែ»។
យោងមាត្រា ៣៥ ថ្មីនៃច្បាប់ស្ដីពីការគ្រប់គ្រង និងធ្វើអាជីវកម្មធនធានរ៉ែ ម្ចាស់ក្រុមហ៊ុនអាជីវកម្មរណ្ដៅដី មហារដ្ឋា ត្រេដឌីងនឹងត្រូវផាកពិន័យជាប្រាក់ដោយក្រសួងទទួលបន្ទុកវិស័យរ៉ែចំនួនស្មើនឹង ២ ដងនៃតម្លៃ ប៉ាន់ស្មានលើផលិតផលរ៉ែ តាមរយៈពេលដែលផលរ៉ែត្រូវបានជីកយកដោយផ្អែកលើទំហំឧបករណ៍ គ្រឿងចក្រមកផលិតកម្មប្រើប្រាស់ និងបរិមាណរ៉ែដែលមានក្នុងទីតាំងនោះ ឬត្រូវផាកពិន័យជាប្រាក់ ១,៥ លានរៀលក្នុង ១ ថ្ងៃដោយគិតចាប់ពីថ្ងៃដែលបុគ្គលនោះប្រព្រឹត្តខុសរហូតដល់ថ្ងៃដែលសកម្មភាពប្រតិបត្តិការជីកយករ៉ែនោះត្រូវបានបញ្ឈប់។
បើតាមច្បាប់នេះ ម្ចាស់ក្រុមហ៊ុននេះក៏នឹងត្រូវប្រឈមការផ្តន្ទាទោសជាប់ពន្ធនាគារពី ១ ឆ្នាំ ទៅ ៥ ឆ្នាំផងដែរ ក្នុងករណីរកឃើញថា ក្រុមហ៊ុននេះ នៅតែបន្តលួចលាក់ធ្វើសកម្មភាពបំពាននឹងបម្រាមរបស់សមត្ថកិច្ចជំនាញ៕
