ស្វាយរៀងៈ លោក ម៉ែន វិបុល អភិបាលនៃគណៈអភិបាលខេត្តស្វាយរៀង បានថ្លែងនូវការអរគុណចំពោះអង្គការ USAID របស់សហរដ្ឋអាមេរិក ដែលកន្លងមក បានចូលរួមជួយគាំទ្រលើការអនុវត្តគម្រោងលើកកម្ពស់អនាម័យជនបទ និងបានបង្ហាញនូវការគាំទ្រចំពោះគម្រោងប្រតិបត្តិរបស់អង្គការនេះ ទាក់ទងនឹងការងារអប់រំ ការងារប្រយុទ្ធប្រឆាំងអំពើជួញដូរមនុស្សនាពេលខាងមុខ។
ការជួយរបស់ USAID គឺជាផ្នែកមួយរួមចំណែកជាមួយសមាសភាពពាក់ព័ន្ធផ្សេងទៀត ធ្វើឱ្យខេត្តស្វាយរៀង សម្រេចបានជាខេត្តទី១ គំរូ ក្នុងប្រទេសកម្ពុជាក្នុងការសម្រេចបាននូវការបញ្ឈប់បន្ទោរបង់ពាសវាលពាសកាល ។ នេះបើតាមរដ្ឋបាលខេត្តស្វាយរៀង។
លោក ម៉ែន វិបុល បានថ្លែងបែបនេះ ក្នុងពេលដែលលោកបានអនុញ្ញាតឱ្យលោកស្រី ណែនស៊ី ជែ អ៊ីសលិក (Nancy J. Eslick) នាយិកាបេសកកម្មនៃទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ (USAID) ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារអំពីការគាំទ្រដល់គម្រោងអភិវឌ្ឍន៍នានា នៅក្នុងខេត្តស្វាយរៀង នៅថ្ងៃទី២០ ខែមករា ឆ្នាំ ២០២២ នៅសាលប្រជុំរំដួល អគារ ក សាលាខេត្តស្វាយរៀង។
ក្រៅពីបានជម្រាបជូនខ្លះៗអំពីស្ថានភាពភូមិសាស្ត្រ ការអភិវឌ្ឍខេត្ត ការងារប្រយុទ្ធប្រឆាំងជំងឺកូវីដ១៩ ការងារចាក់វ៉ាក់សាំងបង្ការជំងឺកូវីដ១៩ ក៏ដូចជា ការងារធានានូវប្រក្រតីភាពជីវភាពសង្គមនៅក្នុងបរិបទកូវីដ ក្នុងនាមអាជ្ញាធរខេត្ត ស្វាយរៀង លោក ម៉ែន វិបុល ក៏បានបង្ហាញនូវការគាំទ្រចំពោះគម្រោងប្រតិបត្តិដែល USAID គ្រោងអនុវត្តនៅក្នុងខេត្តស្វាយរៀង នាពេលខាងមុខ លើការងារសុខភាព និង អនាម័យជនបទ ការងារអប់រំ ការងារប្រយុទ្ធប្រឆាំងអំពើជួញដូរមនុស្ស ជាដើម ដែលសុទ្ធសឹងជាការងារគាំទ្រដល់ការលើកកម្ពស់គុណភាពជីវិត និងការរស់នៅរបស់ប្រជាពលរដ្ឋនៅមូលដ្ឋាន។
បន្ថែមពីនេះ លោកអភិបាលខេត្ត បានស្នើដល់ USAID ពិនិត្យលទ្ធភាពជួយគាំទ្រលើការងារសុខាភិបាល និងការងារអភិវឌ្ឍន៍ សមត្ថភាពដល់មន្ត្រីរាជការនៅថ្នាក់ក្រុង ស្រុក ក៏ដូចជា ថ្នាក់ឃុំ សង្កាត់ ដែលជាតម្រូវការដ៏សំខាន់ក្នុងការចូលរួមអនុវត្ត កំណែទម្រង់វិមជ្ឈការ និងវិសហមជ្ឈការ នៅថ្នាក់ក្រោមជាតិឱ្យកាន់តែមានប្រសិទ្ធភាពថែមទៀត៕