.jpg)
មណ្ឌលគីរីៈ ប្រជាពលរដ្ឋចំនួន ៤៧ គ្រួសារ រស់នៅភូមិស្រែខ្ទង់ ខេត្តមណ្ឌលគិរី នឹងទទួលបានទឹកស្អាតប្រើប្រាស់ចាប់ពីខែកុម្ភៈ ឆ្នាំ២០២២ ខាងមុខនេះតទៅ ក្រោយពីសហគមន៍សម្រេចដកថវិកាមូលនិធិយកទៅប្រើប្រាស់ ដើម្បីបញ្ចប់ការសាងសង់ប្រព័ន្ធផ្គត់ផ្គង់ទឹកសហគមន៍។ នេះបើយោងតាមគម្រោងរេដបូកកែវសីមា(Keo Seima REDD+ Project)
គម្រោងរេដបូកកែវសីមាបានឱ្យដឹងថា ក្នុងកិច្ចប្រជុំដែលសម្របសម្រួលដោយក្រុមការងារគម្រោងរេដបូកកែវសីមាកាលពីសប្តាហ៍កន្លងទៅ សហគមន៍ភូមិស្រែខ្ទង់ បានឯកភាពសម្រេចស្នើសុំដកថវិកាចំនួន ៨ ០០០ ដុល្លារ ពីមូលនិធិបែងចែកផលប្រយោជន៍នៃគម្រោងរេដបូកកែវសីមា ដែលភូមិពួកគាត់ទទួលបាន ដើម្បីយកទៅចំណាយបញ្ចប់ការងារសាងសង់ប្រព័ន្ធផ្គត់ផ្គង់ទឹកសហគមន៍។ ការសាងសង់នេះបានចាប់ផ្តើមកាលពីប្រមាណជាពីរ ឬបីឆ្នាំមុន ប៉ុន្តែវាមិនទាន់ត្រូវបានបញ្ចប់នៅឡើយទេ ដោយសារជួបប្រទះការខ្វះខាតថវិកា។
ប្រព័ន្ធផ្គត់ផ្គង់ទឹកនោះ រួមមាន៖ អណ្តូងខួងមួយ ដែលបានសាងសង់កាលពីឆ្នាំ ២០១៤, ធុងស្តុកទឹកចំនួន២ ចំណុះសរុប ១០០០០លីត្រ និងជើងទ្រធុងស្តុកទឹកធ្វើពីឈើ ដែលត្រូវបានសាងសង់កាលពីឆ្នាំ ២០១៩ ដោយប្រើប្រាស់ថវិការបស់មូលនិធិបែងចែកផលប្រយោជន៍នៃគម្រោងរេដបូកកែវសីមា។
ថវិកានោះនឹងត្រូវយកទៅប្រើប្រាស់សម្រាប់ទិញប្រព័ន្ធសូឡា, ម៉ាស៊ីនបូមទឹកសម្រាប់បូមពីអណ្តូងទៅស្តុកទុកក្នុងធុងស្តុក, ទុយោជ័រសម្រាប់តភ្ជាប់បណ្តាញចូលតាមផ្ទះ និងសាងសង់ជើងទម្រថ្មីធ្វើពីបេតុង។
នាពេលថ្មីៗកន្លងទៅនេះ សិស្សសាលាបឋមសិក្សាពូជូរ ចំនួន ១៧៣នាក់ក៏បានទទួលសម្ភារសិក្សាមួយចំនួនពីគម្រោងរេដបូកកែវសីមា ដើម្បីជួយសម្រួលដល់ការសិក្សារបស់ពួកគេ ក្នុងបវេសនកាលឆ្នាំ ២០២១ - ២០២២ នេះ។ សម្ភារសិក្សាទាំងនោះ រួមមាន កាតាប សៀវភៅសរសេរ ប៊ិក ខ្មៅដៃ បន្ទាត់ ប្រដាប់ខួងខ្មៅដៃ និងជ័រលុបជាដើម។ ការចែកសម្ភារសិក្សានេះគឺជាផ្នែកមួយនៃផែនការអភិវឌ្ឍន៍សហគមន៍ភូមិអណ្តូងក្រឡឹង និងគាំទ្រដោយមូលនិធិបែងចែកផលប្រយោជន៍ក្រោមគម្រោងរេដបូកកែវសីមា ដែលអនុវត្តដោយអង្គការ WCS សហការជាមួយក្រសួងបរិស្ថាន៕
