ដើម្បីចូលរួមទប់ស្កាត់ការរាតត្បាតយ៉ាងឆាប់រហ័សនៃវីរុសបំប្លែងខ្លួនថ្មីប្រភេទអូមីក្រុង នៅក្នុងគ្រឹះស្ថានសិក្សាសាធារណៈ និងឯកជន ក្រសួងអប់រំ យុវជន និងកីឡា បានណែនាំដល់មន្ទីរអប់រំ យុវជន និងកីឡា រាជធានី ខេត្ត និងគ្រឹះស្ថានសិក្សាសាធារណៈ និងឯកជនទាំងអស់ត្រូវពង្រឹងការអនុវត្តវិធានការសុខាភិបាល និងមិនត្រូវឱ្យមានសិស្សលើសពី ២០ នាក់នោះទេក្នុងមួយថ្នាក់។
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានធ្វើការណែនាំពីការពង្រឹងវិធានការសុវត្ថិភាពនៅតាមគ្រឹះស្ថានសិក្សាសាធារណៈនិងឯកជនទូទាំងប្រទេស ត្រូវពង្រឹងការអនុវត្តវិធានការសុខាភិបាល ការពាក់ម៉ាស់ការពារឱ្យបានខ្ជាប់ខ្លួន និងការរក្សាគម្លាតសុវត្ថិភាព ឱ្យបានម៉ឺងម៉ាត់។
លោកបានលើកឡើងថា ៖ «ត្រួតពិនិត្យសុខភាព និងអាការៈ របស់គ្រូបង្រៀន បុគ្គលិកអប់រំ និងសិស្សានុសិស្ស ឱ្យបានជាប្រចាំក្នុងករណីមានកម្តៅលើសពី ៣៧,៥ អង្សាសេ ឬមានរោគសញ្ញាដូចជាក្អក ហៀរសំបោរ ឈឺបំពង់ក ពិបាកដកដង្ហើម ត្រូវណែនាំឱ្យទៅរកសេវាសុខាភិបាល និងអនុញ្ញាតឱ្យឈប់សម្រាករហូតបានធូរស្រាលសុខភាពជាប្រក្រតី ទើបត្រឡប់មកបំពេញភារកិច្ច និងបន្តការសិក្សា ដោយផ្ទាល់នៅគ្រឹះស្ថានសិក្សាវិញ»។
លោក ហង់ជួន ណារ៉ុន បានបន្តថា គ្រឹះស្ថានសិក្សាសាធារណៈនិងឯកជនទាំងអស់ ត្រូវអនុវត្តការបង្រៀន និងរៀនតាមបណ្តំ ដោយសិស្សមិនលើសពី ២០ នាក់ និងឆ្លាស់វេន ចំពោះគ្រឹះស្ថាន សិក្សាដែលមានចំណុះសិស្សច្រើន រួមជាមួយនឹងការបង្រៀន និងរៀនតាមអនឡាញ៕