ត្បូងឃ្មុំៈ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារចុះជួយស្រុកត្បូងឃ្មុំ មេមត់ ក្រូចឆ្មារ និងក្រុងសួង ខេត្តត្បូងឃ្មុំ នៅថ្ងៃទី ២០ ខែមករា បានជួបសំណេះសំណាលជាមួយសិស្សប្រឡងជាប់បាក់ឌុបចំនួន ១ ៥៦០ នាក់ និងបានផ្តល់ថវិកាលើកទឹកចិត្តដល់សិស្សានុសិស្សទាំងនោះដែលមកពីស្រុក ក្រុងចំនួន ០៤ គឺ ស្រុកត្បូងឃ្មុំ ស្រុកមេមត់ ស្រុកក្រូចឆ្មារ និងក្រុងសួង។
បើតាមរដ្ឋបាលខេត្តត្បូងឃ្មុំ ពិធីជួបសំណេះសំណាលនេះមានការអញ្ជើញចូលរួមពីសំណាក់ប្រតិភូក្រសួង ក្រុមការងារចុះជួយខេត្ត អភិបាលខេត្តត្បូងឃ្មុំ ប្រធានក្រុមប្រឹក្សាខេត្ត នាយកនាយករងសាលា លោកគ្រូអ្នកគ្រូ និងសិស្សានុសិស្សដែលប្រឡងជាប់ សម័យប្រឡងឆ្នាំ ២០២១។
សូមជម្រាបថា សិស្សនិទ្ទេស A ចំនួន ៣៨ នាក់ដែលទទួលថវិកាជាកាដូលើកទឹកចិត្តនាពេលនេះ គឺមកពីចំនួន ០៤ ស្រុក ប៉ុណ្ណោះ ខណៈទូទាំងខេត្តត្បូងឃ្មុំជាប់និទ្ទេស A មានចំនួន ៥៤ នាក់ និងជាប់ជាស្ថាពរសរុប ២ ៩៤៤ នាក់។
មានប្រសាសន៍ទៅកាន់សិស្សានុសិស្ស និងមាតាបិតា អាណាព្យាបាលសិស្ស លោក ជាម ច័ន្ទសោភ័ណ អភិបាលខេត្ត ត្បូងឃ្មុំ បានសាទរចំពោះជោគជ័យក្នុងការខិតខំសិក្សា ដែលនេះគឺជាកិត្តិយសដ៏ធំធេង សម្រាប់ខ្លួនឯងផ្ទាល់ក៏ដូចជា ក្រុមគ្រួសារ និងជាកិត្តិយសរបស់អាជ្ញាធរនៅក្នុងមូលដ្ឋានផងដែរ ដែលសិស្សានុសិស្សបានខិតខំរៀនសូត្ររហូតប្រឡងជាប់ ពិសេសរហូតទទួលបាននិទ្ទេស A។
លោក ជា សុផារ៉ា បានមានប្រសាសន៍ទៅកាន់សិស្សានុសិស្សទាំងអស់គ្នា ដោយកោតសរសើរក្នុងការខិតខំរៀនសូត្ររហូតទទួលបានលទ្ធផលផ្លែផ្កានាពេលនេះ ដែលជាការឆ្លងកាត់ការលំបាកជាច្រើន ជាពិសេសឧបសគ្គនៃការឆ្លងរាលដាលនៃជំងឺកូវីដ ១៩ នៅទូទាំងពិភពលោក ក៏ដូចជានៅកម្ពុជា។
ជាការឆ្លើយតបទៅនឹងកិច្ចខិតខំរបស់សិស្សានុសិស្សក្នុងនាមលោកជាអ្នកទទួលខុសត្រូវក្នុងស្រុកក្រុងទាំង ០៤ នេះលោកក៏សូមចូលរួមអបអរសាទរ និងចូលរួមផ្ដល់ការលើកទឹកចិត្តនូវថវិកាមួយចំនួន ដើម្បីក្មួយៗប្រើប្រាស់ឱ្យចំគោលដៅ ក្នុងអំឡុងពេលបន្តការសិក្សានៅកម្រិតឧត្ដមសិក្សា។
ជាមួយគ្នានោះ លោកឧបនាយករដ្ឋមន្ត្រីបានផ្តាំផ្ញើដល់ក្មួយៗទាំងអស់ ត្រូវខិតខំរៀនសូត្របន្តទៅមុខទៀត ជាពិសេសក្រេបជញ្ជក់យកចំណេះដឹង ក្នុងអំឡុងពេលបន្តការសិក្សានៅថ្នាក់កម្រិតឧត្ដម ដើម្បីក្លាយខ្លួនជាកូនល្អ យុវជនល្អ និងជាពលរដ្ឋល្អ ហើយយកចំណេះដឹង និងសមត្ថភាពនោះ ចូលរួមចំណែកអភិវឌ្ឍសេដ្ឋកិច្ចគ្រួសារ និងសង្គមជាតិឱ្យកាន់តែរីកចម្រើនទ្វេឡើង។
លោក ជា សុផារ៉ា បានផ្តល់ថវិកាលើកទឹកចិត្តដល់សិស្សានុសិស្សប្រឡងជាប់និទ្ទេស A ចំនួន ៣៨ នាក់ក្នុងម្នាក់ ៥០០ ដុល្លារ។
និទ្ទេស B C D E ចំនួន ១ ៥២២ នាក់ក្នុងម្នាក់ ១០០ ០០០ រៀល។
ប្រធានការិយាល័យអប់រំស្រុក នាយកនាយិកាវិទ្យាល័យ ចំនួន ១៩នាក់ក្នុងម្នាក់ ១០០ ដុល្លារ និងអនុប្រធានការិយាល័យ អប់រំស្រុក នាយកនាយករងវិទ្យាល័យ ៣៤ នាក់ ក្នុងម្នាក់ ៥០ ដុល្លារ សរុបថវិកាទាំងអស់ ៥៩ ៩៧២ ដុល្លារ៕