​កំពង់ធំ​/​កំពង់ឆ្នាំងៈ មន្ដ្រី​ឧ​ទ្យា​នុ​រក្ស​នៃ​តំបន់​រ៉ា​ម​សារ​បឹង​ទន្លេ​ឆ្មារ​បាន​បន្ដ​ការ​អនុវត្ដ​សកម្មភាព​ល្បាត​ប្រចាំខែ​យ៉ាង​ទៀងទាត់ ហើយ​បាន​បង្ក្រាប​បទល្មើស​នេសាទ​ខុសច្បាប់​ចំនួន ២៥​ ករណី ​នៅក្នុង​ខែធ្នូ ឆ្នាំ​ ២០២១ ​កន្លងមក​។ នេះ​បើ​យោងតាម​អង្គការ​ NatureLife Cambodia Organization​។​

​ក្នុងចំណោម​បទល្មើស​នេសាទ​ទាំង ​២៥​ ករណី​នោះ រួមមាន​ការអប់រំ​អ្នកនេសាទ​ខុសច្បាប់ ០២​ ករណី​នៅនឹងកន្លែង និង​បាន​កាប់បំផ្លាញ​នូវ​ឧបករណ៍​នេសាទ​ខុសច្បាប់​ផងដែរ​។ ក្នុងនោះ​រួមមាន​បង្គោល​ឆ្នុក​ ០៥​ ក្រោល​: ខ្សែ​ប្រវែង ​២៧៨ ​ម៉ែត្រ និង​បង្គោល ​១៦​ ដើម​, របាំង​សាច់​អួន ០២​របាំង​មាន​ប្រវែង​ ៣០០ ​ម៉ែត្រ​, របាំង​ស្បៃ​ម៉ុង​ ១៦ ​របាំង មាន​ប្រវែង ១ ១៨៥​ ម៉ែត្រ​, ២០ ​ឡុ​ក​, លប​លូ ២៤​ មាត់​, ទ្រូ ០៨ ​មាត់​, បង្គោល​ឈើ ៨៩៥ ​ដើម និង​បាន​ប្រលែង​ត្រី​ចម្រុះ​ចូលទៅក្នុង​បឹង​ធម្មជាតិ​វិញ មាន​ចំនួន ​២០​ គីឡូក្រាម​។

​អង្គការ​បានឱ្យដឹងថា កម្មវិធី​ SMART ត្រូវបាន​អនុវត្ត​ដើម្បី​គាំទ្រ​ដល់​សកម្មភាព​ល្បាត​ប្រចាំខែ​នេះ​។​

​កាលពីដើម​ខែមករា ឆ្នាំ​២០២២​នេះ មន្ដ្រី​ឧ​ទ្យា​នុ​រក្ស​នៅ​តំបន់​រ៉ា​ម​សារ​បឹង​ទន្លេ​ឆ្មារ​ដែលមាន​ទីតាំង​ក្នុង​បឹង​ទន្លេសាប​ខេត្តកំពង់ធំ​បានទទួល​ត្រី​គល់រាំង​មួយ​ក្បាលមាន​ទម្ងន់​១១​គីឡូក្រាម ដែល​ជាប់​មង​ប្រជា​នេសាទ ហើយ​បាន​ព្រលែង​ត្រី​ប្រភេទ​នេះ​ចូលទៅក្នុង​បឹង​ធម្មជាតិ​វិញ​ផងដែរ​។​

​ត្រី​ប្រភេទ​នេះ ត្រូវការពារ​ដោយ​ក្រឹត្យច្បាប់​លេខ​៣៣ ក្រ​.​ច​«​ស្តីពី​ការគ្រប់គ្រង​វិស័យ​ជលផល​»​ក្នុង​ជំពូក​២ មាត្រា​១៨​។ ត្រី​គល់​រាំងជា​មច្ឆា​ជាតិ​និមិត្តរូប​នៃ​ព្រះរាជាណាចក្រ​កម្ពុជា និង​ជា​ប្រភេទ​កំពុង​ជិត​ផុត​ពូជ​បំផុត​ក្នុង​ពិភពលោក​។ ត្រី​នេះ​ក៏មាន​វត្ដ​មាននៅ​បឹង​ទន្លេសាប​ផងដែរ​។ ត្រី​គល់រាំង​ត្រូវបាន​គេ​ហៅ​ឈ្មោះ​ផ្សេងៗ​គ្នា​ទៅតាម​តំបន់​ថា​«​ត្រី​កាហោ ឬ​ត្រី​ក្បាល​ឡាន​» និង​មានឈ្មោះ​វិទ្យាសាស្ត្រ «Catlocarpio siamnsis» ដែលជា​ប្រភេទ​ត្រី​មាន​ទំហំ​ធំជាងគេ​នៅ​កម្ពុជា ដែលមាន​ទម្ងន់​អតិបរមា​ចាប់ពី​១៥០-៣០០​គីឡូក្រាម និង​ប្រវែង​ដងខ្លួន​ពី ២-៣​ម៉ែត្រ​៕​