.jpg)
កំណើននៃការចាក់វ៉ាក់សាំងកូវីដ ១៩ នៅកម្ពុជាបានកើនឡើងដល់ ៨៩,៥៤% ធៀបជាមួយនឹងប្រជាពលរដ្ឋសរុបចំនួន ១៦ លាននាក់នៅទូទាំងប្រទេស ខណៈដែលអត្រានៃការចាក់វ៉ាក់សាំងដូសទី ៤ ក្នុងរយៈពេល ៨ ថ្ងៃប៉ុណ្ណោះបានចំនួនរហូតដល់ជាង ២០ ម៉ឺននាក់ រីឯការចាក់ដូសទី ៣ ឬដូសជំរុញបានកើនឡើងដល់ជាង ៥ លាននាក់ផងដែរ។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ២០ ខែមករា ឆ្នាំ ២០២២ អត្រានៃការចាក់វ៉ាក់សាំងកូវីដ ១៩ ទៅដល់ប្រជាជនអាយុពី ១៨ ឆ្នាំឡើង បានចំនួន ១០១,៨៦% ធៀបជាមួយចំនួនប្រជាជនគោលដៅ ១០ លាននាក់ និងយុវវ័យកុមារដែលមានអាយុពី ១២ ឆ្នាំទៅក្រោម ១៨ ឆ្នាំ មាន ៩៩,៣៧% ធៀបជាមួយចំនួនប្រជាជនគោលដៅ ១,៨ លាននាក់។
ក្រសួងបានបន្តថា សម្រាប់អត្រាចាក់វ៉ាក់សាំងលើកុមារអាយុពី ០៦ ឆ្នាំ ដល់ក្រោម ១២ ឆ្នាំ មាន ១០៥,៧៣% ធៀបជាមួយនឹងប្រជាជនគោលដៅជិត ១,៩ លាននាក់ ខណៈដែលកុមារដែលមានអាយុ ០៥ ឆ្នាំ ចាក់វ៉ាក់សាំងបានចំនួន ១០៤,៥៤% ធៀបជាមួយនឹងប្រជាជនគោលដៅជាង ៣០ ម៉ឺននាក់៕
