សៀមរាបៈ រដ្ឋបាលខេត្តសៀមរាបបានណែនាំឱ្យម្ចាស់អាជីវកម្មធនធានរ៉ែ (ជីកអាចម៍ដី) សូមអនុវត្តឱ្យបានត្រឹមត្រូវទៅតាមលក្ខណៈបច្ចេកទេស ដែលមានកំណត់ក្នុងអាជ្ញាបណ្ណ ហើយបើអាជ្ញាបណ្ណផុតសុពលភាពគឺត្រូវទៅស្នើសុំអាជ្ញាបណ្ណថ្មី។
ការណែនាំនេះបានធ្វើឡើងខណៈក្រុមការងារចម្រុះ រដ្ឋបាលខេត្តសៀមរាបដែលដឹកនាំដោយលោក ពិន ប្រាកដ អភិបាលរងខេត្តនៅថ្ងៃទី ២០ ខែមករា បានចុះពិនិត្យទីតាំងជីកអាចម៍ដីចំនួន ០២ ទីតាំង ដែលស្ថិតនៅភូមិស្រែធ្នង់ ឃុំដំដែក និងស្ថិតនៅភូមិដំរីកូន ឃុំពពេល ស្រុកសូទ្រនិគម ខេត្តសៀមរាប។
បើតាមរដ្ឋបាលខេត្តសៀមរាប បន្ទាប់ពីបានចុះពិនិត្យទីតាំងជាក់ស្តែងរួចមក ក្រុមការងារចម្រុះរដ្ឋបាលខេត្តបានណែនាំដល់ម្ចាស់អាជីវកម្មអនុវត្តឱ្យបានត្រឹមត្រូវតាមលក្ខណៈបច្ចេកទេស ដែលមានក្នុងអាជ្ញាបណ្ណកំណត់ និងណែនាំឱ្យម្ចាស់អាជីវកម្មមួយចំនួន ដែលផុតសុពលភាពអាជ្ញាបណ្ណត្រូវរៀបចំស្នើសុំបន្តអាជ្ញាបណ្ណ និងត្រូវគោរពតាមគោលការណ៍ច្បាប់ និងលិខិតបទដ្ឋានគតិយុត្តនានា។
ជាមួយគ្នានេះ រដ្ឋបាលខេត្តសៀមរាបបានប្រាប់ឱ្យអាជ្ញាធរពាក់ព័ន្ធ គឺត្រូវធ្វើការអប់រំ ផ្សព្វផ្សាយច្បាប់ និងលិខិតបទដ្ឋានគតិយុត្តថ្មីៗដល់អ្នកធ្វើអាជីវកម្មឱ្យគោរពតាម និងអនុវត្តឱ្យបានខ្ជាប់ខ្ជួន ព្រមទាំងដឹកជញ្ជូនអាចម៍ដីត្រូវគ្របឱ្យបានត្រឹមត្រូវ មិនត្រូវដឹកលើសទម្ងន់ និងបើកបរលើសល្បឿនកំណត់ និងណែនាំក្រុមហ៊ុនឱ្យដាំដើមឈើលើកទំនប់ និងធ្វើរបងព័ទ្ធជុំវិញរណ្តៅដី ដើម្បីការពារមនុស្ស និងសត្វពាហនៈ។
ក្រៅពីនេះ ត្រូវត្រួតពិនិត្យការធ្វើអាជីវកម្មធនធានរ៉ែ ដែលពុំមានអាជ្ញាបណ្ណ និងមានអាជ្ញាបណ្ណតែធ្វើខុសលក្ខណៈបច្ចេកទេស ដោយធ្វើការចុះបិទ និងអនុវត្តតាមនីតិវិធីច្បាប់៕
វីដេអូ៖