ភ្នំពេញៈ អ្នកជំងឺដែលរកឃើញមានឆ្លងវីរុសកូវីដ ១៩ បំប្លែងថ្មីប្រភេទអូមីក្រុង មិនតម្រូវឱ្យសម្រាកព្យាបាលនៅមន្ទីរពេទ្យទៀតឡើយ ដោយអនុញ្ញាតឱ្យព្យាបាលជំងឺនេះនៅគេហដ្ឋាន ឬទីតាំងណាមួយដែលអ្នកជំងឺជ្រើសរើស ក្រោយពីការតាមដានមួយរយៈពីការវិវឌ្ឍនៃមេរោគនេះឃើញថា ទោះវាមានការចម្លងលឿន ប៉ុន្តែមិនមែនជាប្រភេទជំងឺដ៏គ្រោះថ្នាក់។
សម្រាប់អ្នកជំងឺទាំងអស់ដែលអនុញ្ញាតឱ្យសម្រាកព្យាបាលនៅតាមផ្ទះហើយ មិនមែនមានសិទ្ធិក្នុងការដើរលេង ឬចេញក្រៅផ្ទះតាមចិត្តនោះឡើយ។ នេះជាសេចក្តីសម្រេច និងបទបញ្ជាតាមរយៈសារសំឡេងពិសេសរបស់លោកនាយករដ្ឋមន្ត្រី ហ៊ុន សែន នាយប់ថ្ងៃទី ២១ ខែមករា។
លោក ហ៊ុន សែន ថ្លែងថា៖ «សម្រាប់បងប្អូនខ្មែរយើង ទាំងខ្មែរមកពីបរទេស និងខ្មែរនៅក្នុងស្រុក នៅពេលដែលរកឃើញថា ឆ្លងវីរុសកូវីដ ១៩ ជាប្រភេទអូមីក្រុង យើងអនុញ្ញាតឱ្យសម្រាកព្យាបាលនៅតាមផ្ទះដូចនឹងជំងឺកូវីដ-១៩ប្រភេទដែលតា និងអាលហ្វា ដោយអនុវត្តតាមបែបបទ នីតិវិធីសុខាភិបាលឱ្យបានត្រឹមត្រូវ»។
សម្រាប់ជនបរទេសទាំងអស់ដែលធ្វើដំណើរមកកាន់ប្រទេសកម្ពុជា ហើយរកឃើញមានវិជ្ជមានកូវីដ ១៩ ទោះបីជាប្រភេទអូមីក្រុង ឬមិនមែនក៏ដោយអាចអនុញ្ញាតឱ្យសម្រាកព្យាបាលនៅតាមសណ្ឋាគារ តាមស្ថានទូត ឬកន្លែងដែលពួកគាត់ជ្រើសរើសបាន។ ដូច្នេះមិនមានការចាំបាច់យកជនបរទេសចូលទៅក្នុងមន្ទីរពេទ្យទេ ប៉ុន្តែក៏អាស្រ័យលើការជ្រើសរើសរបស់ពួកគាត់ផងដែរ។
ក្នុងអំឡុងពេលដែលកម្ពុជាមានអ្នកឆ្លងវីរុសកូវីដ ១៩ ប្រភេទអូមីក្រុងដំបូង លោក ហ៊ុន សែន បានបញ្ជាដាច់ខាតដោយមិនឱ្យអ្នកជំងឺប្រភេទអូមីក្រុងសម្រាកព្យាបាលនៅផ្ទះ ឬទីតាំងផ្សេង ក្រៅពីមន្ទីរពេទ្យឡើយ។ ប៉ុន្តែបន្ទាប់ពីសង្កេត និងតាមដានឃើញថា ជំងឺនេះមិនមានសភាពធ្ងន់ធ្ងរ ទើបលោកបានសម្រេចជាថ្មីឱ្យអ្នកជំងឺទាំងនេះអាចសម្រាកព្យាបាលក្រៅមន្ទីរពេទ្យបាន។
លោក ហ៊ុន សែន មានប្រសាសន៍ថា៖ «ក្នុងករណីដែលមិនមានកន្លែង ឬផ្ទះមិនអាចសម្រាកព្យាបាលបាន ពួកគេអាចមកព្យាបាលនៅមន្ទីរពេទ្យរបស់រដ្ឋបាន។ ជារួមគឺអ្នកជំងឺកូវីដប្រភេទអូមីក្រុងនេះ មិនតម្រូវឱ្យមានការចូលមន្ទីរពេទ្យ ត្រូវតែនៅមន្ទីរពេទ្យដូចពេលមុន សម្រាប់ជំងឺអូមីក្រុងនេះទេ»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានលើកឡើង តាមរយៈសេចក្តីប្រកាសព័ត៌មានថា សម្រាប់អ្នកដំណើរចូលបានលទ្ធផលតេស្តរហ័សរកអង់ទីហ្ស៊ែនកូវីដ ១៩ អវិជ្ជមានត្រូវបានអនុញ្ញាតឱ្យធ្វើដំណើរធម្មតា។
លោកបញ្ជាក់ថា សម្រាប់អ្នកដំណើរដែលពុំទាន់បានចាក់វ៉ាក់សាំងកូវីដ ១៩ ពេញលេញ ត្រូវធ្វើចត្តាឡីស័ករយៈពេល ១៤ ថ្ងៃ ដើម្បីតាមដាន និងត្រួតពិនិត្យសុខភាព។ មិនតែប៉ុណ្ណោះក្នុងករណីទទួលបានលទ្ធផលតេស្តរហ័សរកអង់ទីហ្ស៊ែនកូវីដ ១៩ វិជ្ជមានត្រូវយកសំណាកធ្វើតេស្តជាមួយម៉ាស៊ីនធំ (PCR) បញ្ជាក់ និងការរកប្រភេទវីរុស ព្រមទាំងត្រូវស្នាក់នៅដាច់ដោយឡែកផងដែរ។
លោក ម៉ម ប៊ុនហេង បញ្ជាក់ថា៖ «អ្នកជំងឺជាជនជាតិបរទេស និងជនជាតិខ្មែរ ដែលអនុញ្ញាតឱ្យព្យាបាលនៅគេហដ្ឋាន ឬសណ្ឋាគារ ឬនិវេសនដ្ឋានរបស់ស្ថានទូត ឬទីកន្លែង ដែលពួកគាត់ជ្រើសរើស ដូចករណីអ្នកជំងឺកូវីដ ១៩ ប្រភេទអាលហ្វា ឬដែលតា ត្រូវគោរពតាមនីតិវិធី ប្រតិបត្តិស្តង់ដាសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ នៅតាមផ្ទះ»។
លោករដ្ឋមន្ត្រីបន្តថា ប្រសិនបើមានកត្តាហានិភ័យសុខភាព អ្នកជំងឺអាចធ្វើការជ្រើសរើសការព្យាបាលនៅមន្ទីរពេទ្យ ឬមណ្ឌលព្យាបាលជំងឺកូវីដ ១៩ របស់រដ្ឋ ឬឯកជន ដែលទទួលបានការអនុញ្ញាតឱ្យព្យាបាលជំងឺកូវីដ ១៩។
កាលពីខែមិថុនា ឆ្នាំ ២០២១ ក្រសួងសុខាភិបាលបានដាក់ឱ្យអនុវត្តនូវនីតិវិធីប្រតិបត្តិស្តង់ដា សម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ នៅតាមផ្ទះ។ អ្នកជំងឺត្រូវទទួលខុសត្រូវដោយផ្តោតលើការធ្វើអនាម័យ ការទុកដាក់សំណល់ប្រើប្រាស់របស់អ្នកជំងឺ និងកិច្ចសន្យាយល់ព្រមធ្វើការថែទាំ និងព្យាបាលជំងឺកូវីដ ១៩ នៅផ្ទះ៕