.jpg)
សមត្ថកិច្ច ជួយពន្លត់អគ្គិភ័យដែលឆេះរោងចក្រនៅស្រុកត្រាំកក់ ខេត្តតាកែវ កាលពីថ្ងៃទី ២១ មករា ២០២២។ រូប អធិការដ្ឋាននគរបាលស្រុកត្រាំកក់
តាកែវៈ មន្ត្រីនគរបាលជាន់ខ្ពស់ម្នាក់បាននិយាយថា ភ្លើងឆេះផលិតផល និងវត្ថុធាតុដើមរាប់សិបតោន នៅក្នុងឃ្លាំងដ៏ធំនៃរោងចក្រកាត់ដេរសម្លៀកបំពាក់ និងកាបូបរបស់ចិនមួយឈ្មោះ Outdoor Gear (Cambodia) Co.; Ltd ដែលមានទីតាំងស្ថិតនៅចំណុចខាងកើតផ្លូវជាតិលេខ ៣ ក្នុងភូមិស្រងែ ឃុំឧត្តមសូរិយា ស្រុកត្រាំកក់ ខេត្តតាកែវ ប៉ុន្តែគ្មានមនុស្សរងរបួស និងស្លាប់នោះទេ។
លោក សៅ សារុន អ្នកនាំពាក្យស្នងការដ្ឋាននគរបាលខេត្តតាកែវបានប្រាប់ភ្នំពេញប៉ុស្តិ៍នៅថ្ងៃអាទិត្យថា ករណីគ្រោះអគ្គិភ័យនោះបានកើតឡើងនៅវេលា ម៉ោង ១១: ៤៥ នាទីព្រឹក ថ្ងៃទី ២២ ខែមករា ឆ្នាំ ២០២២ ក្នុងគ្រាដែលបុគ្គលិកកម្មករកំពុងនាំគ្នាឈប់សម្រាកដើម្បីទទួលទានអាហារថ្ងៃត្រង់។
លោកថ្លែងថា៖ «តាមរយៈការបំភ្លឺពីបុគ្គលិករដ្ឋបាលរោងចក្រ គ្រោះអគ្គិភ័យនេះ អាចបណ្ដាលមកពីករណីផ្ទុះឆ្លងចរន្តអគ្គិសនី។ ទោះយ៉ាងណា គ្មានបុគ្គលិក កម្មករណាម្នាក់រងរបួស ឬស្លាប់នៅក្នុងហេតុការណ៍នេះឡើយ ព្រោះវាបានកើតឡើងក្នុងអំឡុងពេលបុគ្គលិកកម្មករ ឈប់សម្រាកដើម្បីទទួលទានអាហារថ្ងៃត្រង់»។
បើតាមលោក សារុន នេះជាករណីគ្រោះអគ្គិភ័យដំបូងដែលបានកើតឡើងសម្រាប់ដើមឆ្នាំ ២០២២ នេះ។
យ៉ាងណាក៏ដោយ លោក សេង ស៊ុនថន អធិការរងស្រុកត្រាំកក់ទទួលបន្ទុកផ្នែកបង្ការពន្លត់អគ្គិភ័យ និងសង្គ្រោះបានប្រាប់ភ្នំពេញប៉ុស្តិ៍ថា ករណីគ្រោះអគ្គិភ័យនេះបានបង្កការខូចខាតទាំងស្រុងនូវសំណង់អគារឃ្លាំងធ្វើពីថ្មប្រក់ស័ង្កសីទំហំ ៣៥ ម៉ែត្រ x ៤០ ម៉ែត្រ និងឆេះខូចខាតផលិតផល និងវត្ថុធាតុដើមនៅក្នុងឃ្លាំងរួមមាន អាវពោងសម្រាប់ហែលទឹក (drysuits) និង អាវសម្រាប់មុជក្នុងទឹក(wetsuits) សរុប ២០០០ កាតុងស្នោអេប៉ុង ៥០ តោន សម្បកកាតុង ១០ តោន ព្រមទាំងខូចខាតមធ្យោបាយដឹកជញ្ជូន និងគ្រឿងចក្រមួយចំនួនទៀត រួមមាន ម៉ាស៊ីនក្រឡុកស៊ីម៉ងត៍ ១ គ្រឿងរថយន្តកុងតឺន័រ ១ គ្រឿង និង ម៉ូតូ ៤ គ្រឿង។
ទិដ្ឋភាពសមត្ថកិច្ចជួយពន្លត់ភ្លើង។ រូបថត នគរបាល
លោកបានថ្លែងថា៖ «មុនពេលកម្លាំងកងពន្លត់អគ្គិភ័យទៅដល់បុគ្គលិកកម្មករនៅក្នុងរោងចក្រនេះបានព្យាយាមប្រើបំពង់ពន្លត់អគ្គិភ័យបាញ់ពន្លត់ដែរ ប៉ុន្តែដោយសារផលិតផល និងវត្ថុធាតុដើមនៅក្នុងឃ្លាំងសុទ្ធតែជារបស់ដែលងាយឆេះ ទើបពួកគេមិនអាចពន្លត់វាបាន។ យ៉ាងណាសកម្មភាពរបស់បុគ្គលិក កម្មករនៃរោងចក្រនេះបានបង្ហាញពីការចូលរួមយ៉ាងធំធេងក្នុងការទប់ស្កាត់ការឆេះរាលដាលនៃអគ្គិភ័យ»។
បើតាមលោក ស៊ុនថន កម្លាំងសមត្ថកិច្ចកងពន្លត់អគ្គិភ័យទៅដល់រោងចក្រនោះ ក្រោយហេតុការណ៍ភ្លើងឆេះប្រមាណ ៣០ នាទី ដោយសារស្ថានភាពផ្លូវ។ ក្នុងប្រតិបត្តិការពន្លត់អគ្គិភ័យនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យសរុបចំនួន ១៩ គ្រឿង និងប្រើប្រាស់ទឹកអស់ប្រមាណ ៥០០ ម៉ែត្រគុប និងប្រើប្រាស់ពេលប្រមាណ ៥ ម៉ោង។
លោកបានបញ្ជាក់បន្ថែមថា៖ «តាមរយៈការសាកសួរ បុគ្គលិកកម្មករនៅទីនោះ សមត្ថកិច្ចនគរបាលជំនាញយើង សន្និដ្ឋានថា គ្រោះអគ្គិភ័យនេះបណ្ដាលមកពីការផ្ទុះឆ្លងចរន្តអគ្គិសនី»។
ជុំវិញសេចក្ដីសន្និដ្ឋាននេះ លោក អ៊ុង គួងហេង (Ong KoungHeng) ប្រធានរដ្ឋបាលរោងចក្រ Outdoor Gear (Cambodia) Co.; Ltd បានប្រាប់ភ្នំពេញប៉ុស្តិ៍ថា ជាជំហានបឋម លោកទទួលយកនូវសេចក្ដីសន្និដ្ឋានរបស់សមត្ថកិច្ចនគរបាលជំនាញ ប៉ុន្តែលោកបានស្នើសុំឱ្យសមត្ថកិច្ចស្រាវជ្រាវ និងស៊ើបអង្កេតបន្ថែមទៀតលើករណីនេះ។
លោកបានប្រាប់ភ្នំពេញប៉ុស្តិ៍ថា៖ «អគ្គិភ័យនេះបង្កការខូចខាតទ្រព្យសម្បត្តិរោងចក្រយើងខ្ញុំច្រើនណាស់។ គ្រប់គ្នាសុទ្ធតែមិនដឹងច្បាស់ពីមូលហេតុនៃអគ្គិភ័យនេះទេ។ យើងមិនជំទាស់ចំពោះសេចក្ដីសន្និដ្ឋានរបស់មន្ត្រីនគរបាលជំនាញទេ តែយើងចង់ឱ្យមានការស្រាវជ្រាវបន្ថែមទៀតលើករណីនេះ»។
បើតាមលោក គួងហេង រោងចក្រ Outdoor Gear (Cambodia) Co.; Ltd មកទល់ពេលនេះ រោងចក្រនៅមិនទាន់មានការបូកសរុបទឹកប្រាក់ដែលត្រូវខាតបង់ដោយគ្រោះអគ្គិភ័យនេះនៅឡើយទេ។ រោងចក្រនេះមានកម្មករ កម្មការិនីសរុបចំនួន ១ ៣៩៦ នាក់៕
វីដេអូ៖
