.jpg)
សមត្ថកិច្ចឃាត់រថយន្តដឹកកូនគ្រែង ១២ តោន ចេញពីកោះកុងដោយខុសច្បាប់។ រូបថត ហ្វេសប៊ុក
កំពង់ស្ពឺៈ កម្លាំងនគរបាលការិយាល័យបង្ក្រាបបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ស្ពឺ បានបង្ក្រាបចាប់រថយន្ត ១ គ្រឿងដែលបានដឹកកូនគ្រែងប្រមាណ ១២ តោនពីខេត្តកោះកុង ក្នុងគោលដៅនាំចេញទៅកាន់ប្រទេសវៀតណាមដោយគ្មានលិខិតអនុញ្ញាត។
លោក ហេង សម្រេច ប្រធានការិយាល័យនគរបាល ប្រឆាំងបទល្មើសសេដ្ឋកិច្ចនៃស្នងការដ្ឋាននគរបាល ខេត្តកំពង់ស្ពឺបានប្រាប់ភ្នំពេញ-ប៉ុស្តិ៍ថា ប្រតិបត្តិការបង្ក្រាបចាប់រថយន្តដឹកកូនគ្រែងអត់ច្បាប់នេះបានធ្វើឡើងកាលពីថ្ងៃទី ២២ ខែមករា ឆ្នាំ ២០២២ នៅចំណុចដងផ្លូវជាតិលេខ ៤ ក្នុងចន្លោះបង្គោលគីឡូម៉ែត្រលេខ ៧១-៧២ ស្ថិតក្នុងភូមិក្រាំងភ្នៅ ឃុំអូរ ស្រុកភ្នំស្រួច ខេត្តកំពង់ស្ពឺ។
លោកថ្លែងថា៖ «បច្ចុប្បន្ន វត្ថុតាងរថយន្តដឹកទំនិញ ១ គ្រឿង ម៉ាក Daewoo ពាក់ស្លាកលេខ កំពង់ធំ 3A 2312 និងកូនគ្រែងប្រមាណ ១២ តោនត្រូវបានបញ្ជូនទៅឱ្យមន្ទីរកសិកម្ម រុក្ខាប្រមាញ់ និងនេសាទ ដើម្បីចំណាត់ការបន្តតាមនីតិវិធីច្បាប់»។
ជុំវិញករណីនេះលោក ឈាង តុលា ប្រធានមន្ទីរកសិកម្ម រុក្ខាប្រមាញ់ និងនេសាទ បានប្រាប់ភ្នំពេញប៉ុស្តិ៍នៅថ្ងៃអាទិត្យថា នៅពេលនេះ ក្រុមមន្ត្រីជំនាញកំពុងសាកសួរបុរសអ្នកបើកបររថយន្តដឹកកូនគ្រែងនោះ ដើម្បីស្វែងរកអត្តសញ្ញាណម្ចាស់ទំនិញ ដើម្បីឱ្យចូលខ្លួនមកដោះស្រាយតាមផ្លូវច្បាប់។
លោកប្រធានមន្ទីរកសិកម្ម រុក្ខាប្រមាញ់ និងនេសាទ រូបនេះថ្លែងថា៖ «ប៉ុន្តែមកទល់ពេលនេះ អ្នកបើកបររថយន្តដឹកកូនគ្រែងនោះ នៅមិនទាន់អាចទាក់ទងម្ចាស់ទំនិញបាននៅឡើយទេ ដោយប្រព័ន្ធទូរស័ព្ទចង្អៀត មិនអាចទាក់ទងបាន»។
លោក តុលា ថ្លែងថា អ្នកបើកបរនឹងរងពិន័យអន្តរការណ៍ ប្រសិនបើរកអត្តសញ្ញាណម្ចាស់ទំនិញឱ្យចេញមុខទទួលខុសត្រូវ លើករណីនេះមិនបានទេនោះ។
លោកបានបន្ថែមថា៖ «នៅពេលនេះ យើងនៅមិនទាន់ដឹងច្បាស់ថាតើទំនិញ [កូនគ្រែង] ទាំងនេះ ជាកម្មសិទ្ធិរបស់អ្នកបើកបររថយន្ត ឬជាកម្មសិទ្ធិអ្នកផ្សេងនោះទេ។ បើសិនជាទំនិញទាំងនេះជាកម្មសិទ្ធិរបស់អ្នកបើកបររថយន្ត គឺទំនិញនោះ ពិតជាអត់ច្បាប់ ប៉ុន្តែបើវាជារបស់អ្នកផ្សេង ហើយមានច្បាប់វិញ គឺមិនរងការពិន័យអ្វីទេ សូមតែបង្ហាញនូវឯកសារពាក់ព័ន្ធមកជាការស្រេច ហើយយើងនឹងអនុញ្ញាតឱ្យដឹកជញ្ជូនទៅកាន់គោលដៅ»។
លោកបានប្រាប់ឱ្យដឹងទៀតថា ទោះយ៉ាងណាសមត្ថកិច្ចជំនាញនឹងមិនទទួលខុសត្រូវពីការខាតបង់ក្នុងប្រការណាមួយឡើយ ក្នុងករណីយឺតយ៉ាវក្នុងការចូលខ្លួនមកដោះស្រាយតាមផ្លូវច្បាប់ ព្រោះកូនគ្រែងទាំងនេះ វាអាចងាប់បាន នៅពេលច្រកបាវហប់យូរថ្ងៃពេក។
យោងតាមរបាយការណ៍របស់សមត្ថកិច្ចនគរបាលប្រឆាំងបទល្មើសសេដ្ឋកិច្ច នៅពេលឃាត់ត្រួតពិនិត្យរថយន្តដឹកកូនគ្រែងនោះ អ្នកបើកបររថយន្តឈ្មោះ ឃាង សុខា អាយុ ៤១ ឆ្នាំមានទីលំនៅភូមិត្រពាំងត្រស់ ឃុំសំរោងទង ស្រុកសំរោងទង ខេត្តកំពង់ស្ពឺ មិនបានបង្ហាញលិខិតអនុញ្ញាតណាមួយដែលចេញដោយសមត្ថកិច្ចជំនាញនោះទេ គ្រាន់តែប្រាប់ថា ម្ចាស់ទំនិញបានទូរស័ព្ទប្រាប់ឱ្យគាត់ទៅប្រមូលដឹកជញ្ជូនកូនគ្រែងទាំងនោះចេញពីចំណុចកំពង់ផែកែវផុស ស្រុកស្រែអំបិល ខេត្តកោះកុង ដើម្បីនាំចេញទៅប្រទេសវៀតណាមតាមច្រកដា ខេត្តត្បូងឃ្មុំ៕
