.jpg)
កម្មកររោងចក្រមួយ នៅក្នុងសង្កាត់កាកាប២ ខណ្ឌពោធិ៍សែនជ័យ ត្រូវបានបាញ់អាល់កុលសម្លាប់មេរោគដើម្បីទប់ស្កាត់ការឆ្លងជំងឺកូវីដ១៩ មុនពេលចូលធ្វើការ។ ហេង ជីវ័ន
ភ្នំពេញៈ ក្រសួងសុខាភិបាល ក្រើនរំលឹកឱ្យប្រជាពលរដ្ឋ មានការការពារខ្លួន ពីការចម្លងជំងឺកូវីដ១៩ ជំងឺផ្តាសាយបក្សី និងការបង្ការការពុលចំណីអាហារ ឬ ពុលស្រា ក្នុងឱកាសរៀបចំសែនដូនតា ពេលបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ។
សេចក្តីណែនាំរបស់ក្រសួងសុខាភិបាល ចុះថ្ងៃទី ២៤ មករា បានឱ្យដឹងថា ជារៀងរាល់ឆ្នាំ ប្រជាពលរដ្ឋមួយចំនួន បានប្រារព្ធពិធីសែនដូនតាផ្សេងៗ ដែលមានការទិញទំនិញ និងចរាចរនូវបសុបក្សីច្រើន ដែលអាចមានហានិភ័យនៃការចម្លងនូវវីរុសផ្ដាសាយបក្សី ដែលមាន នៅលើសត្វ និងនៅក្នុងបរិស្ថាន មកមនុស្សបានគ្រប់ពេលវេលា ប្រសិនបើមិនមានការង្ការបានត្រឹមត្រូវទេនោះ។
ម្យ៉ាងវិញទៀត ក្រសួង បានលើកឡើងទៀតថា ចំពោះជំងឺដង្កាត់ផ្សេងៗ និងការពុលចំណីអាហារ ឬ ពុលស្រា ស ក៏តែងតែសង្កេតឃើញកើតមានឡើង នៅតាម តំបន់ ឬទីតាំងមួយចំនួន នៅក្នុងប្រទេស ដែលយើងទាំងអស់គ្នាត្រូវបង្កើននូវការប្រុងប្រយ័ត្នខ្ពស់ដោយបុគ្គលម្នាក់ៗ ត្រូវខិតខំថែរក្សាការពារសុខភាពឱ្យបានល្អប្រសើរនៅគ្រប់កាលៈទេសៈ។
បន្ថែមពីនេះ ក្រសួងនៅតែបារម្ភចំពោះស្ថានភាពនៃការចម្លងវីរុសកូវីដ១៩ ជាពិសេសពពួកអូមីក្រុង ដែលកំពុងតែចរាចរយ៉ាងសកម្ម នៅតាមបណ្ដាប្រទេសនានាលើសកលលោក ហើយកម្ពុជា បានរកឃើញជាបន្តបន្ទាប់នូវករណ៍វិជ្ជមានវីរុសកូវីដ១៩ ជាពិសេស អូមីក្រុង ។ ដូច្នេះ ក្រសួង តម្រូវឱ្យ ប្រជាពលរដ្ឋទាំងអស់ បន្តការយកចិត្តទុកដាក់ការពារខ្លួនឱ្យបានហ្មត់ចត់ជាប់ជានិច្ច បើទោះកម្ពុជា បានគ្រប់គ្រងទប់ស្កាត់ស្ថានភាពឆ្លងរាលដាលបានល្អប្រសើរក៏ដោយ។
ក្រសួងបានបញ្ជាក់ថា៖«ក្រសួងសុខាភិបាល សូមលើកទឹកចិត្តឱ្យប្រជាជនទូទៅ អនុវត្តតាមដំបូន្មានសាមញ្ញ ដើម្បីការពារខ្លួន និងក្រុមគ្រួសារ និងសូមជូនពរឱ្យបុគ្គលគ្រប់រូបទាំងអស់គ្នាជួបនូវសុខភាពល្អ និងចៀសផុតនូវជំងឺកូវីដ១៩ និងជំងឺ ដង្កាត់ផ្សេងៗ»។
គិតត្រឹមថ្ងៃទី ២៣ មករា កម្ពុជា មានឆ្លងជំងឺកូវីដ ១៩ ជាង ១២ ម៉ឺនករណី ក្នុងនោះករណីឆ្លងវីរុសប្រភេទអូមីក្រុង សរុបចំនួន ១៨៩ ករណី ខណៈជំងឺកូវីដ ១៩ បានសម្លាប់ពលរដ្ឋកម្ពុជាជាង ៣ ០០០ នាក់ ប៉ុន្តែរហូតមកដល់ពេលនេះ កម្ពុជា នៅមិនទាន់រកឃើញអ្នកស្លាប់ដោយសារវីរុសប្រភេទថ្មី អូមីក្រុងនៅឡើយទេ៕
