ភ្នំពេញៈ ស្ត្រីកងទ័ពមួកខៀវកម្ពុជាវ័យក្មេងចំនួន ២១ នាក់បានទទួលសញ្ញាបត្រភាសាបារាំង បន្ទាប់ពីសិក្សារយៈពេល ២ ឆ្នាំ។ ពួកគេនឹងចាកចេញទៅបំពេញបេសកកម្មក្រោមឆត្រអង្គការសហប្រជាជាតិនៅតាមបណ្តាប្រទេសប្រើប្រាស់ភាសាបារាំង។
ពិធីប្រគល់សញ្ញាបត្រនេះធ្វើឡើងនៅមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC) នាថ្ងៃទី ២០ ខែមករា។
ស្ថានទូតបារាំងប្រចាំកម្ពុជាបញ្ជាក់ក្នុងហ្វេសប៊ុកនាថ្ងៃទី ២១ ខែមករាថា៖ «ស្ត្រីយោធាកម្ពុជាចំនួន ២១ នាក់បានទទួលសញ្ញាបត្រដែលប្រគល់ជូនដោយឯកឧត្តម ហ្សាក់ ប៉ឺឡែ (Jacques Pellet) ឯកអគ្គរដ្ឋទូតបារាំងប្រចាំកម្ពុជា និងឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌល NPMEC បន្ទាប់ពីវគ្គសិក្សារយៈពេល ២ ឆ្នាំ»។
ស្ថានទូតបារាំងនៅកម្ពុជាបញ្ជាក់ថាស្ត្រីយោធាចំនួន ២១ នាក់នេះនឹងចាកចេញទៅបំពេញការងារជាមួយកងទ័ពមួកខៀវកម្ពុជា ដែលកំពុងបំពេញការងារក្រោមឆត្រអង្គការសហប្រជាជាតិនៅតាមបណ្តាប្រទេសប្រើប្រាស់ភាសាបារាំងដូចជាម៉ាលី អាហ្វ្រិក និងលីបង់។ល។
ស្ថានទូតបារាំងបញ្ជាក់ថា៖ «សូមអបអរសាទរដល់ស្ត្រីយោធាវ័យក្មេងដែលបានទទួលសញ្ញាបត្រ!»។
លោក សែម សុវណ្ណនី មិនអាចទាក់ទងបានដើម្បីសុំការបញ្ជាក់បន្ថែមបានទេនាថ្ងៃទី ២៣ ខែមករា។
NPMEC បញ្ជាក់ក្នុងហ្វេសប៊ុកនាថ្ងៃទី ២០ ខែមករា ថាលោក Jacques Pellet បានវាយតម្លៃខ្ពស់សម្រាប់កម្ពុជាក្នុងការបញ្ជូនកម្លាំងនារីចូលរួមបេសកកម្មអង្គការសហប្រជាជាតិដែលមានកម្រិតចំនួនលើសពីការស្នើសុំរបស់អគ្គលេខាធិការអង្គការសហប្រជាជាតិ។
NPMEC បញ្ជាក់ថា៖ «ការវាយតម្លៃខ្ពស់ប្រកបដោយក្តីមោទនភាពចំពោះឆន្ទៈនៃព្រះរាជាណាចក្រកម្ពុជាក្នុងកិច្ចចូលរួមបេសកកម្មរបស់អង្គការសហប្រជាជាតិពិសេសការលើកកម្ពស់នារីក្នុងតំបន់បេសកកម្មដែលកម្ពុជាបានធ្វើឡើងកន្លងទៅនេះត្រូវបានលើកឡើងដោយលោក Jacques Pellet ឯកអគ្គរដ្ឋទូតបារាំងប្រចាំព្រះរាជាណាចក្រកម្ពុជាក្នុងឱកាសអញ្ជើញចូលរួមបិទវគ្គបណ្តុះបណ្តាលភាសាបារាំងនាថ្ងៃទី ២០ មករា ២០២២ នៅមជ្ឈមណ្ឌលជាតិរក្សាសន្តិភាព»។
ក្នុងពិធីត្រួតពិនិត្យសំណង់អគារកម្ពស់ ១៨ ជាន់របស់មជ្ឈមណ្ឌលជាតិរក្សាសន្តិភាព និងសំណេះសំណាលជាមួយទ័ពមួកខៀវត្រៀមបញ្ជូនបំពេញបេសកកម្មនៅប្រទេសលីបង់ និងអាហ្វ្រិកកណ្តាលកាលពីថ្ងៃទី ៦ ខែមករា លោក សែម សុវណ្ណនី បានថ្លែងថាក្នុងរយៈពេល ១៦ ឆ្នាំនេះគិតចាប់ពីឆ្នាំ ២០០៦ រហូតមកដល់បច្ចុប្បន្នកម្ពុជាបានបញ្ជូនកងកម្លាំងសរុបចំនួនជិត ៧ ៩០០ នាក់ក្នុងនោះមាននារីចំនួនជាង ៥០០ នាក់ទៅកាន់បេសកកម្មចំនួន ១១ ក្នុងប្រទេសចំនួន ៩ រួមមានស៊ូដង់ ឆាដ ស៊ូដង់ខាងត្បូង លីបង់ ស៊ីប ស៊ីរី ម៉ាលី អាហ្វ្រិកកណ្តាល និង យេម៉ែន។
លោកបានថ្លែងថា នៅក្នុងឆ្នាំ ២០២១ និងឆ្នាំ ២០២២ នេះកម្ពុជាមានកងទ័ពមួកខៀវចំនួនជិត ៨០០ នាក់កំពុងបំពេញបេសកកម្មរក្សាសន្តិភាពនៅតាមបណ្តាប្រទេសចំនួន ៤ រួមមានប្រទេសស៊ូដង់ខាងត្បូង លីបង់ អាហ្វ្រិកកណ្តាល និងប្រទេសម៉ាលី។
លោកថ្លែងថា៖ «តាមរយៈចំនួននេះបានធ្វើឱ្យកម្ពុជាទទួលបានលំដាប់លេខទី ១៣ លើ ១២២ ប្រទេសបរិច្ចាគកម្លាំង និងលេខ ២ ក្នុងអាស៊ាន ខណៈការបញ្ជូនកម្លាំងមួកខៀវនារីកម្ពុជានាឆ្នាំ ២០២១ នេះជាកម្លាំងអាវុធហត្ថទៅកាន់បេសកកម្មស៊ូដង់ខាងត្បូងមាន ៤៦ ភាគរយការបញ្ជូនកម្លាំងមួកខៀវនារីកម្ពុជាជាវិស្វកម្មទៅកាន់បេសកកម្មលីបង់មាន ១៦ ភាគរយហើយការចូលរួមរបស់នារីមួកខៀវជានាយទាហានសេនាធិការ និងសង្កេតការណ៍មាន ២១ ភាគរយលើសពីផែនការកំណត់របស់អង្គការសហប្រជាជាតិដែលបានកំណត់ត្រឹម ១៥ ភាគរយ»៕