ខេត្តកំពង់ស្ពឺៈ មន្ត្រីរដ្ឋបាលព្រៃឈើបានចុះពិនិត្យ និងប្រមូលទិន្នន័យពីម៉ាស៊ីនថតស្វ័យប្រវត្តិចំនួន ៧ គ្រឿងដែលបានបំពាក់ដើម្បីថត និងតាមដានវត្តមានសត្វព្រៃ នៅក្នុងសហគមន៍ព្រៃឈើ ៨ មុំ ដែលស្ថិតនៅក្នុងភូមិត្រពាំងក្រើញ ឃុំ៨មុំ ស្រុកថ្ពង។ នេះបើយោងតាមរបាយការណ៍ប្រចាំឆ្នាំ ២០២១ និងទិសដៅការងារឆ្នាំ ២០២២ របស់ក្រសួងកសិកម្ម។
ការបំពាក់ម៉ាស៊ីនថតស្វ័យប្រវត្តិចំនួន ៧ គ្រឿងនោះ គឺបានដាក់ថត ដើម្បីប្រមូលទិន្នន័យ និងធាតុចូលបន្ថែម សម្រាប់សម្រួលដល់ការចងក្រងអត្ថបទចុះផ្សាយ ស្តីពីការសិក្សាស្រាវជ្រាវពីជីវចម្រុះនៅក្នុងតំបន់សហគមន៍ព្រៃឈើ ៨ មុំ។
បើយោងតាមរបាយការណ៍ក្រៅពីសហគមន៍នេះ មន្ត្រីជំនាញក៏បានបំពាក់ម៉ាស៊ីនថតស្វ័យប្រវត្តិ ចំនួន ១២ គ្រឿងផ្សេងទៀតផងដែរ ដើម្បីតាមដានវត្តមាន និងកត្តាគំរាមកំហែងទៅលើសត្វព្រៃ ជាពិសេសដំរីព្រៃនៅតាមតំបន់ជួរភ្នំក្រវាញ។
លោក កែវ អូម៉ាលីស្ស ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលព្រៃឈើបានប្រាប់ភ្នំពេញប៉ុស្តិ៍ថា សហគមន៍ព្រៃឈើ ៨ មុំ ជាសហគមន៍ ១ ក្នុងចំណោមសហគមន៍ផ្សេងទៀត ដែលបានខិតខំការពារសហគមន៍របស់ខ្លួនខ្លាំងណាស់។
លោកលើកឡើងថា ដោយមើលឃើញពីការខិតខំ និងលះបង់របស់សមាជិកសហគមន៍បែបនោះ លោកក៏បានកំពុងតែជួយដល់សហគមន៍នេះ អស់រយៈពេលជាច្រើនឆ្នាំមកហើយ ដូចជាការជ្រោមជ្រែងបង្កើតជាសហគមន៍នេះឡើង និងសាងសង់ស្នាក់ការជាដើម។
ក្រៅពីនោះ លោកក៏បានកំពុងតែកៀរគរក្រុមហ៊ុនឯកជនឱ្យជួយដល់សហគមន៍នេះបន្ថែមទៀតផងដែរ។ លោកបញ្ជាក់ថា៖ «ប្រជាជនហ្នឹងល្អណាស់ គាត់ប្រឹងប្រែងខ្លួនគាត់។ កាលណាគាត់ប្រឹងប្រែងខ្លួនគាត់អ៊ីចឹង យើងជួយទៅហើយ។ ខ្ញុំចង់ធ្វើឱ្យវាដើរ ធ្វើជាគំរូតែម្តង»។
សហគមន៍ ៨ មុំមានផ្ទៃដីទំហំ ៨៦២ ហិកតា ដែលមានសត្វព្រៃសំខាន់ៗដូចជា ឈ្លូស ជ្រូកព្រៃ ក្ងោក និងទន្សោង ជាដើម។
លោក លីវ សារ៉ុម បណ្តាញសហគមន៍ ៨ មុំថ្លែងប្រាប់ភ្នំពេញប៉ុស្តិ៍ថា បើតាមការប៉ាន់ស្មាន សត្វទន្សោងដែលនៅសល់ក្នុងសហគមន៍មានប្រហែល ១៤០ ក្បាលនាពេលបច្ចុប្បន្ននេះ។ ក្នុងនោះកាលពីឆ្នាំ ២០២១ កន្លងមក ក៏ឃើញមានកើតកូនថ្មីចន្លោះពី ៥ ទៅ ១០ ក្បាលផងដែរ។
លោកថា ការប្រមាញ់សត្វព្រៃដូចជាការដាក់អន្ទាក់ គឺជាការប្រឈមមួយក្នុងការគ្រប់គ្រងសហគមន៍ ដែលក្នុង ១ ឆ្នាំៗអន្ទាក់រាប់រយត្រូវបានក្រុមល្បាតដោះ ដើម្បីជួយសង្គ្រោះសត្វព្រៃ។
គិតត្រឹមឆ្នាំ ២០២១ ក្រសួងកសិកម្ម រុក្ខាប្រមាញ់ និងនេសាទបានប្រកាសទទួលស្គាល់ព្រៃឈើសហគមន៍សរុបមានចំនួន ៥៣៦ ទីតាំងដែលគ្របដណ្តប់លើផ្ទៃដីទំហំរហូតដល់ជាង ៤ សែនហិកតា៕