សៀមរាបៈ ក្រសួងវប្បធម៌ និងវិចិត្រសិល្បៈកម្ពុជាស្នើឱ្យបណ្តាប្រទេសតាមដងទន្លេមេគង្គ រួមគ្នាលើកកម្ពស់ និងសហការគ្នារវាងស្ថាប័នពាក់ព័ន្ធអន្តរជាតិ ដើម្បីប្រយុទ្ធប្រឆាំងនឹងការជួញដូរដោយខុសច្បាប់នូវវត្ថុបុរាណដែលជាសម្បត្តិវប្បធម៌របស់ជាតិឱ្យមានប្រសិទ្ធភាព។
ការជំរុញនេះធ្វើឡើងនៅក្នុងសិក្ខាសាលាថ្នាក់តំបន់ស្តីពី វិធានការនៃការការពារសកម្មភាពទន្ទ្រានទីទួលបុរាណ ការបំផ្លិចបំផ្លាញ ការលួចជីកកកាយ ការទប់ស្កាត់អំពើចោរកម្ម និងការជួញដូរសម្បត្តិវប្បធម៌ដោយខុសច្បាប់ រយៈពេល ៣ ថ្ងៃចាប់ពីថ្ងៃទី ២៤-២៦ ខែមករា ឆ្នាំ ២០២២។ សិក្ខាសាលានេះត្រូវបានប្រព្រឹត្តឡើងនៅខេត្តសៀមរាប ដែលកម្ពុជាធ្វើជាម្ចាស់ផ្ទះ ក្រោមការជួយឧបត្ថម្ភថវិកាពីមូលនិធិពិសេសនៃកិច្ចសហប្រតិបត្តិការមេគង្គ-ឡានឆាងឆ្នាំ ២០២០ ដោយមានការចូលរួមពីបណ្តាប្រទេសតាមទន្លេ-មេគង្គ រួមមានថៃ ឡាវ វៀតណាម ចិន មីយ៉ាន់ម៉ា និងតំណាងអង្គការយូណេស្កូ ប្រចាំកម្ពុជាផងដែរ។
នៅក្នុងពិធីបើកសិក្ខាសាលានេះ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានថ្លែងថា ជាការពិតណាស់ មានវត្ថុបុរាណជាច្រើនរាប់មិនអស់ត្រូវបានលក់ ហើយនៅតែត្រូវបានលក់ដោយខុសច្បាប់លើទីផ្សារសិល្បៈ-អន្តរជាតិ រួមទាំងវត្ថុបុរាណខ្មែររាប់រយ វត្ថុរូបចម្លាក់ធាតុផ្សំនៃស្ថាបត្យកម្ម វត្ថុបុរាណដែលផលិតពីដីដុត និងសំរិទ្ធជាដើម។ លោកស្រីបន្តថា អស់រយៈពេលជាច្រើនឆ្នាំប្រទេសកម្ពុជា បាននិងកំពុងអនុវត្តជំហានសំខាន់ៗដើម្បីការពារបេតិកភណ្ឌរបស់ខ្លួន ហើយកម្ពុជាក៏ជាប្រទេសអាស៊ីដំបូងគេដែលផ្តល់សច្ចាប័នលើអនុសញ្ញាអង្គការយូណេស្កូ ឆ្នាំ ១៩៧០ ស្តីពីមធ្យោបាយហាមឃាត់ការនាំចូលនាំចេញ និងផ្ទេរកម្មសិទ្ធិលើសម្បត្តិវប្បធម៌។
លោកស្រីបន្តទៀតថា ជាអកុសល ទោះបីជាមានកិច្ចប្រឹងប្រែងរបស់រាជរដ្ឋាភិបាល ដែលមានក្រសួងវប្បធម៌ និងវិចិត្រសិល្បៈជាសេនាធិការ ដើម្បីការពារបេតិកភណ្ឌវប្បធម៌របស់យើងក៏ដោយ ក៏ការលួច និងការបំផ្លិចបំផ្លាញទីតាំងបុរាណវិទ្យានៅតែបន្ត។ លោកស្រីថា៖ «ដើម្បីប្រយុទ្ធប្រឆាំងនឹងការជួញដូរដោយខុសច្បាប់ វត្ថុបុរាណដែលជាសម្បត្តិវប្បធម៌របស់ជាតិឱ្យមានប្រសិទ្ធភាព យើងត្រូវសម្របសម្រួលកិច្ចខិតខំប្រឹងប្រែង និងលើកកម្ពស់ការសហការគ្នារវាងស្ថាប័នពាក់ព័ន្ធ អង្គការជាតិ និងអន្តរជាតិ និងប្រទេសនៅក្នុងតំបន់ក៏ដូចជាលើឆាកអន្តរជាតិ»។
លោកស្រី គូសបញ្ជាក់ថា កិច្ចសហប្រតិបត្តិការអន្តរជាតិនៅតែជាកត្តាដ៏មានសារៈសំខាន់បំផុត ដើម្បីទប់ស្កាត់ការជួញដូរដោយខុសច្បាប់នូវសម្បត្តិវប្បធម៌។ ដោយឡែក កម្ពុជាបានពង្រឹងកិច្ចសហប្រតិបត្តិការអន្តរជាតិរបស់ខ្លួន តាមរយៈការចុះហត្ថលេខាលើកិច្ចព្រមព្រៀងជាមួយព្រះរាជាណាចក្រថៃឡង់ដ៍ សហរដ្ឋអាមេរិក ក៏ដូចជាមួយបណ្តាប្រទេសផ្សេងៗទៀតជាច្រើន។ លោកស្រីថា៖ «ការធ្វើរួមគ្នា គឺជាគន្លឹះក្នុងការថែរក្សាបេតិកភណ្ឌសហគមន៍ និងសម្រាប់មនុស្សជាតិទាំងមូល»។
តាមរយៈសិក្ខាសាលានេះលោកស្រី ភឿង សកុណា សង្ឃឹមថា សមាជិកទាំងអស់នៃអង្គសិក្ខាសាលានឹងប្រើប្រាស់ពេលវេលាដ៏មានសារៈសំខាន់នេះ ចូលរួមពិភាក្សា និងផ្លាស់ប្តូរ ចំណេះដឹង បទពិសោធ ដើម្បីជំរុញដល់ដំណើរការសិក្ខាសាលាថ្នាក់តំបន់ តាមរយៈការដាក់ចេញនូវអនុសាសន៍រួមសម្រាប់ជាត្រីវិស័យមួយយកទៅអនុវត្តឱ្យទទួលបានផ្លែផ្កាបន្ថែមទៀតនាពេលអនាគត។
រដ្ឋលេខាធិការក្រសួងវប្បធម៌ និងវិចិត្រសិល្បៈលោក ជុច ភឿន បានថ្លែងថា សិក្ខាសាលាថ្ងៃនេះនឹងលើកឡើងបង្ហាញពីបញ្ហាប្រឈមនានាពាក់ព័ន្ធនឹងវត្ថុបុរាណ ក៏ដូចជាទីទួលបុរាណ និងស្ថានីយបុរាណ ដែលជាកេរដំណែលបន្សល់ទុកដោយបុព្វបុរស ហើយបានក្លាយជាសម្បត្តិបេតិកភណ្ឌវប្បធម៌ជាតិដ៏មានតម្លៃមិនអាចកាត់ថ្លៃបានកំពុងប្រឈមនឹងការបាត់បង់ជាបន្តបន្ទាប់ដោយសារកត្តាធម្មជាតិ ពិសេសកត្តាមនុស្ស តាមរយៈសកម្មភាពមួយចំនួនដូចជាការជួញដូរ ចរាចរ បំផ្លិចបំផ្លាញ ឈូសឆាយ និងការជីក រុករកវត្ថុបុរាណដោយខុសច្បាប់។ល។
លោកបន្តថា ជាលទ្ធផល ពិតមែនតែយើងមានកិច្ចសហការពីក្រសួង ស្ថាប័នពាក់ព័ន្ធ ក៏ដូចជាប្រទេសក្នុងតំបន់យ៉ាងណាក្តី ក៏កិច្ចការពារ ការទប់ស្កាត់ ការបំផ្លិចបំផ្លាញសម្បត្តិវប្បធម៌នៅតែកើតមាន ពិបាកនឹងទប់ស្កាត់ឱ្យមានប្រសិទ្ធភាព។ លោកថា៖ «ដូច្នេះ យើងទាំងអស់គ្នាត្រូវបន្តរួមគ្នាសម្រេចឱ្យបាន រួមគ្នាថែរក្សា ការពារមរតកវប្បធម៌មនុស្សជាតិ ដោយភ្ជាប់ទំនាក់ទំនងពីបុគ្គលម្នាក់ទៅបុគ្គលម្នាក់ពីសហគមន៍ ១ ទៅសហគមន៍ ១ ពីប្រទេស ១ ទៅប្រទេស ១ ជាពិសេសប្រទេសនៅតាមដងទន្លេមេគង្គ និងក្នុងតំបន់អាស៊ីអាគ្នេយ៍»។
លោកថា នេះជាកត្តាដ៏ចាំបាច់បំផុតក្នុងការនាំមកនូវសាមគ្គីភាព សន្តិភាព សុខដុមភាពដែលជាកម្លាំងគ្រឹះ និងជាប្រភពមិនចេះរីងស្ងួតនៃការអភិវឌ្ឍសេដ្ឋកិច្ចជាតិ ប្រកបដោយចីរភាព ដែលជាកិច្ចការដ៏ចាំបាច់ចំពោះមុខសម្រាប់ទាំងអស់គ្នា។
អគ្គនាយករងបេតិកភណ្ឌ លោក ហេង កំសាន្ត បានឱ្យដឹងថា គោលបំណងធំនៃសិក្ខាសាលា គឺរួមគ្នាធ្វើម៉េចឱ្យប្រទេសនៅតាមដងទន្លេមេគង្គដូចជា ចិន ថៃ ឡាវ វៀតណាម និងមីយ៉ាន់ម៉ា ផ្តល់សច្ចាប័នលើអនុសញ្ញាពាក់ព័ន្ធការការពារសម្បត្តិវប្បធម៌។ លោកថា នៅក្នុងតំបន់អាស៊ីប៉ាស៊ីហ្វិកមានតែកម្ពុជាទេផ្តល់សច្ចាប័ន ដោយឡែកប្រទេសផ្សេងទៀត ដែលបានរៀបរាប់ខាងលើមិនទាន់ផ្តល់សច្ចាប័ននោះទេ។
លោកថា៖ «ពេលប្រទេសទាំងនេះ ផ្តល់សច្ចាប័នងាយស្រួលធ្វើការ ហើយយើងមានក្តីសង្ឃឹមថា ប្រទេសទាំងនេះនឹងចូលរួមផ្តល់សច្ចាប័នដោយសារអ្នកជំនាញការចូលរួមក្នុងសិក្ខាសាលានេះ សុទ្ធតែតំណាងស្ថាប័នពាក់ព័ន្ធផ្នែកវប្បធម៌ ប៉ុន្តែរដ្ឋាភិបាលគាត់ជំរុញក្នុងកម្រិតណាយើងមិនដឹងទេ»។
គួររំឭកផងដែរថា កាលពីខែមិថុនា ឆ្នាំ ២០២១ វត្ថុបុរាណខ្មែរចំនួន ២៧ រូប ដែលមានរូបបដិមាផ្នែកពុទ្ធសាសនា និងព្រហ្មញ្ញសាសនា សម័យអង្គរសំខាន់ៗ ត្រូវបានសហរដ្ឋអាមេរិកប្រគល់ឱ្យកម្ពុជាវិញ ហើយក្នុងអំឡុងខែវិច្ឆិកា សហរដ្ឋអាមេរិកក៏បានប្រគល់វត្ថុបុរាណខ្មែរចំនួន ៤ មកកម្ពុជាវិញ បន្ទាប់ពីរឹបអូសបានពីសារមន្ទីរសិល្បៈ Denver នៅសហរដ្ឋអាមេរិក និងមានវត្ថុបុរាណជាច្រើនទៀតដែលនឹងត្រូវបញ្ជូនមកកម្ពុជាវិញជាបន្តបន្ទាប់៕
វីដេអូ៖