មណ្ឌលគិរីៈ លោក​ ប៉ែន អ៊ាន ទីប្រឹក្សា​ផ្ទាល់​លោកនាយក​រដ្ឋមន្ត្រី​ ហ៊ុន សែន បានដាក់​លិខិត​ស្នើសុំ​ទៅ​លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ ដើម្បី​ពិនិត្យមើល​លោក សៀក មុន្នី អភិបាលស្រុក​អូររាំង ខេត្ត​មណ្ឌលគិរី និង​មន្ត្រី​មួយចំនួនទៀត ដែល​ឃុបឃិត​គ្នា​ជា​ប្រព័ន្ធ​ធ្វើ​ឯកសារ​យក​ដី​រដ្ឋ និង​ដី​ប្រជាពលរដ្ឋ​ជនជាតិដើម​ភាគតិច​។

លិខិត​ដាក់​ទៅ​ក្រសួង​មហាផ្ទៃ​កាលពី​ថ្ងៃទី​ ១៨ មករា លោក ​ប៉ែន អ៊ាន ឱ្យដឹងថា លោក​បាន​ទទួល​ព័ត៌មាន​ពី​ជនជាតិដើម​ភាគតិច​ព្នង​ខេត្ត​មណ្ឌលគិរី ថា អភិបាលស្រុក​អូររាំង​បាន​ប្រើ​អំណាច​គំរាមកំហែង​ប្រជាពលរដ្ឋ​ជនជាតិដើម​ភាគតិច និង​ឃុបឃិត​គ្នា ធ្វើ​ឯកសារ​យក​ដី​រដ្ឋ និង​ដី ប្រជាពលរដ្ឋ​ជនជាតិដើម​ភាគតិច ធ្វើ​ជា​កម្មសិទ្ធិ​និង​លក់​ឱ្យ​ឈ្មួញ​។ មិន​ការពារ​ផលប្រយោជន៍​ស្របច្បាប់​របស់​ពលរដ្ឋ​តូចតាច ការពារ តែ​អ្នកមាន​លុយ​មានអំណាច​។

ក្រោយ​ទទួល​ព័ត៌មាន​នេះ​លោក​បាន​ចាត់​ក្រុមការងារ និង​មេធាវី​ចុះ​ស្រាវជ្រាវ​បន្ថែម​ឃើញថា ប្រជាពលរដ្ឋ​ជនជាតិដើម​ភាគតិច​មួយចំនួន ពិតជា​បាន​រស់នៅ​អាស្រ័យផល​ធ្វើ​ផ្ទះ ដាំ​ដំណាំ​លើដី​តាម​ជើងភ្នំ និង​ដងអូរ តាម​ទំនៀមទម្លាប់​ប្រពៃណី​ជាយូរ​មកហើយ​។ ដី​សហគមន៍​ជនជាតិដើម​ភាគតិច​ត្រូវបាន​គេ​រំលោភបំពាន​យក​ដោយ​យក​លេស​ថា​ជា​ដី​រដ្ឋ​។ ក្រោយមក​ដី​នោះ​ក៏​ក្លាយជា​ដី​របស់ អ្នកមាន​លុយ​មានអំណាច​ធ្វើ​របង​ហ៊ុមព័ទ្ធ មាន​ឯកសារ​កាន់កាប់​។ ចំណែក​ដី​របស់​ប្រជាពលរដ្ឋ​មួយ​ចំនួន​មាន​ឯកសារ​កាន់កាប់​ទិញ​លក់​ទទួលស្គាល់ ដោយ​អាជ្ញាធរ ភូមិ ឃុំ ស្រុក បែរជា​អាជ្ញាធរ​ស្រុក​ថា ខុសច្បាប់​ទៅវិញ​។

លោក​ ប៉ែន អ៊ាន សរសេរ​ក្នុង​លិខិត​ថា​៖ «​ច្បាស់​ណាស់​ថា អាជ្ញាធរ គ្រប់គ្រង​ដឹង​ឮថា​ដី​ណា​ស្រប​ច្បាប់​ដី​ណា​ជា​ដី​រដ្ឋ តែបើ​ប៉ះពាល់​ផលប្រយោជន៍​ពួកគេ ក៏​ក្លាយជា​រឿងរ៉ាវ ហើយ​អ្នករងគ្រោះ គឺ​ប្រជាពលរដ្ឋ​តូចតាច ទន់ខ្សោយ ដែល​គ្មាន​ខ្សែ គ្មាន​បក្ខពួក​»​។

លោក​ឱ្យដឹង​ទៀតថា ថ្មីៗ​នេះ​ប្រជាពលរដ្ឋ​ជនជាតិដើម​ភាគតិច​មួយចំនួន រាយការណ៍​ថា លោក សៀក មុន្ទី បាន​ប្រើ​មន្ត្រី​ជា​កូនចៅ​ក្លែង​ឯកសារ ស្នាម​មេដៃ​យក​ដី​ប្រជាពលរដ្ឋ​មួយចំនួន​លក់​ឱ្យ​ឧកញ៉ា​ស្រី ចន្ធូ ធ្វើ​បណ្ណ​កម្មសិទ្ធិ គំរាមកំហែង​ទិញ​ដី​ពី​ប្រជាពលរដ្ឋ​ក្នុងតម្លៃ​ទាប ដើម្បី​លក់​បន្ត​ និង​ដើម្បី​ធ្វើការ​អភិវឌ្ឍ​។ ដី​មួយចំនួនទៀត ជា​ដីចម្ការ​ស្រល់ ក៏​ជា​កម្មសិទ្ធិ​របស់​អ្នកធំ អ្នកមាន​លុយ​ផងដែរ​។

បើតាម​សេចក្តី​រាយការណ៍​របស់​ជនជាតិដើម​ភាគតិច លោក​ សៀក មុន្នី មិនដែល​យកចិត្ត​ទុកដាក់​ជួយ​ដោះស្រាយ រក​យុត្តិធម៌​ឱ្យ​ប្រជាពលរដ្ឋ​ទេ​។ ការបំពេញ​ការងារ​ហាក់ដូចជា មាន​ការរើសអើង ក្អេងក្អាង មិន​ខ្លាច​ច្បាប់ ដោយសារ មាន​បងប្អូន​ខ្សែ​បក្ខពួក​នៅ​ក្រសួង​មហាផ្ទៃ​ជា​អ្នក​ចាំ​ជួយ​ជ្រោមជ្រែង​។ នេះ​បើតាម​ការបន្ថែម​របស់​លោក ប៉ែន អ៊ាន​។

លោក​សរសេរ​ថា​៖ «​អាស្រ័យ​ដូច​បាន​ជម្រាបជូន​ខាងលើ​សូម​សម្តេច​ក្រឡាហោម​ [​ស ខេង​] មេត្តា​ពិនិត្យ​ស្រាវជ្រាវ​ករណីនេះ​ឱ្យបាន​ច្បាស់លាស់ ដើម្បី​ឱ្យមាន​តម្លាភាព​យុត្តិធម៌​ដល់​គ្រប់ភាគី​ទាំង​ប្រជាពលរដ្ឋ និង​អាជ្ញាធរ និង​ពិន័យ​ចំពោះ​មន្ត្រី​ដែល​ប្រព្រឹត្ត​ខុស ដើម្បី​ការពារ​ការដឹកនាំ​ដ៏ត្រឹមត្រូវ​របស់​រាជរដ្ឋាភិបាល​»​។

លោក​ ខៀវ សុភ័គ អ្នកនាំពាក្យ​ក្រសួង​មហាផ្ទៃ​ថ្លែង​នៅ​ថ្ងៃទី​ ២៤ ខែមករា ថា លោក​មិនទាន់​ដឹងថា ក្រសួង​មានការ​សម្រេច​យ៉ាងណា​នោះទេ ដោយ​ថា ការដាក់​លិខិត​ពី​សំណាក់​លោក​ ប៉ែន អ៊ាន មក​ក្រសួងមហាផ្ទៃ​នេះ​លោក​មិន​ទាន់​បានឃើញ​លិខិត​នៅឡើយ​។

លោក ម្លូស តេន តំណាង​ប្រជាពលរដ្ឋ​នៅ​ភូមិ​ពូឆប ឃុំ​ដាក់ដាំ ស្រុក​អូររាំង ខេត្តមណ្ឌលគិរី ថ្លែង​នៅ​ថ្ងៃទី​ ២៤ មករា ថា ដី​របស់​លោក និង​ប្រជាពលរដ្ឋ​ ៧ ​គ្រួសារ​ផ្សេងទៀត សរុប​ជាង​ ៣០ ​ហិកតា​នៅ​ភូមិ​ពូឆប ឃុំ​ដាក់ដាំ ស្រុក​អូររាំង ដែល​ខំ​ថែរក្សា​ត​ពី​ដូនតា​មក​ត្រូវបាន​អាជ្ញាធរ​ស្រុក​កាត់​ឱ្យទៅ​ឈ្មោះ​ ស្រី ចន្ធូ ដោយ​មិន​បាន​ឱ្យ​ពួកគាត់​ដឹង​។ ក្រោយពី​បានដឹង​រឿង លោក​បាន​ទៅសុំ​អន្តរាគមន៍​ឱ្យ​អាជ្ញាធរ​ស្រុក​កាត់​ដី​ឱ្យ​មកវិញ​តាំងពី​ឆ្នាំ​ ២០១៩ ប៉ុន្តែ​មិន​បានសម្រេច​ និង​បានអូសបន្លាយ​ពេល​រហូត​មកដល់​បច្ចុប្បន្ន​។

លោក​និយាយថា​៖ «​អភិបាល​ស្រុក គាត់​ថា គាត់​នឹង​ដោះ​ឱ្យ​ខ្ញុំ ប៉ុន្តែ​អត់​ឃើញ​ពន្យារពេល​ម្តង​ថ្ងៃនេះ​ម្តង​ថ្ងៃនោះ ហើយ​គាត់​ថា ឱ្យ​ខ្ញុំ​ទៅយក​ដី​កន្លែង​ផ្សេង​។ ខ្ញុំ​ទៅយក​កន្លែង​ផ្សេង​ម៉េច​កើត បើ​សុទ្ធតែ​ដី​គេ​មាន​ម្ចាស់​។ អ៊ីចឹង​ខ្ញុំ​អត់​ព្រម​ទេ កន្លែង​ខ្ញុំ​ហ្នឹង ខ្ញុំ​យក​ទាល់តែ​បាន​បាទ​។ បើ​កន្លែង​ខ្ញុំ​បាន​លក់​ឱ្យគេ​ហើយ អាហ្នឹង​ខ្ញុំ​ឈប់​ប៉ះ​ហើយ​»​។

លោក សៀក មុន្នី អភិបាល​ស្រុក​អូររាំង​ថ្លែង​នៅ​ថ្ងៃទី​ ២៤ មករា ថា បញ្ហាដីធ្លី​នៅ​ស្រុក​អូររាំង​ត្រូវបាន​ដោះស្រាយ​ជា​បន្តបន្ទាប់​។ ប៉ុន្តែ​អ្វីៗ​ត្រូវបាន​ផ្អាក​ដោយសារ​ថ្មីៗ​នេះ​ក្រុមការងារ​ស្រាវជ្រាវ​ទប់ស្កាត់ និង​បង្ក្រាប​បទល្មើស​ព្រៃឈើ​របស់​ក្រសួង​កសិកម្ម​បាន​ចុះទៅពិនិត្យ​ដកហូត​ដី​តំបន់​នោះ​។

លោក​ថ្លែងថា​៖ «​ការពិត យើង​កំពុងតែ​សម្របសម្រួល​ក្នុង​ចំណុច​ហ្នឹង​។ ប៉ុន្តែ​មកដល់​បច្ចុប្បន្ន​នៅក្នុង​តំបន់​ហ្នឹង​ទាំងអស់ ក្រសួង​កសិកម្ម​កំពុងតែ​ដកហូត​ស្ទើរតែ​ទាំងអស់​នៅ​ចំណុច​ហ្នឹង​។ ដល់ពេល​អ៊ីចឹងទៅ យើង​មិនដឹងថា ត្រូវ​សម្របសម្រួល​ដោះស្រាយ​របៀប​ម៉េច​។ ឥឡូវ​មានតែ​ចាំមើល​សិន​»៕

វីដេអូ៖