.jpg)
អតីតបុគ្គលិកក្រុមហ៊ុនណាហ្គាវើលដ៍ បន្តការតវ៉ារបស់ពួកគេ។ រូបថត FB
ភ្នំពេញៈ ក្រុមហ៊ុនណាហ្គាវើលដ៍ បានចេញសេចក្តីថ្លែងការណ៍ជាសាធារណៈ បញ្ជាក់អំពីស្ថានភាពក្នុងអំឡុងពេលរីករាលដាលជំងឺកូវីដ ១៩ ដែលក្រុមហ៊ុនត្រូវខាតបង់ទឹកប្រាក់ ៧៧ លានដុល្លារក្នុង ១ ត្រីមាស រហូតឈានដល់ការកាត់បន្ថយបុគ្គលិក ខណៈអតីតបុគ្គលិកដែលមិនសុខចិត្តនឹងការសម្រេចនេះ នៅតែបន្តប្រមូលផ្តុំគ្នាតវ៉ា។
វិវាទការងាររវាងក្រុមហ៊ុនណាហ្កាវើលដ៍ និងបុគ្គលិកដែលត្រូវបានបញ្ចប់កិច្ចសន្យាការងារជាង ៣០០ នាក់ត្រូវបានបន្តអូសបន្លាយមកដល់បច្ចុប្បន្ន បន្ទាប់ពីក្រុមហ៊ុននេះសម្រេចកាត់បន្ថយបុគ្គលិកជាបន្តបន្ទាប់ កាលពីអំឡុងឆ្នាំ ២០២០ និងឆ្នាំ ២០២១ ជាង ១ ០០០ នាក់ នៅក្នុងចំណោមបុគ្គលិកជាង ៨ ០០០ នាក់។
សេចក្តីថ្លែងការណ៍ជាសាធារណៈរបស់ក្រុមហ៊ុនណាហ្គាវើលដ៍ ចុះថ្ងៃទី ២៣ ខែមករា បានរៀបរាប់ថា ជំងឺកូវីដ ១៩ ដែលជាជំងឺរាតត្បាតសកលបានជះឥទ្ធិពលយ៉ាងធ្ងន់ធ្ងរដល់ឧស្សាហកម្មទេសចរណ៍ក្នុងពិភពលោក ហើយក្នុងនោះក្រុមហ៊ុនណាហ្គាវើលដ៍ភ្នំពេញ ក៏រងគ្រោះផងដែរ។
សេចក្តីថ្លែងការណ៍នេះ បានរៀបរាប់ទៀតថា របាយការណ៍លទ្ធផលបណ្តោះអាសន្នរបស់ក្រុមហ៊ុនបានកត់ត្រានូវការខាតបង់សុទ្ធចំនួន ៧៧ លានដុល្លារអាមេរិក នៅក្នុងឆមាសទី ១ នៃឆ្នាំ ២០២០ ហើយបរិយាកាសសេដ្ឋកិច្ចមិនល្អរបស់ក្រុមហ៊ុនក៏ត្រូវបានបង្ខំចិត្តចាប់ផ្ដើមវិធានការកាត់បន្ថយការចំណាយមួយចំនួន ដើម្បីផលប្រយោជន៍របស់ក្រុមហ៊ុន ក៏ដូចជាភាគីពាក់ព័ន្ធ។
យោងតាមសេចក្ដីថ្លែងការណ៍ ដដែលនេះបានឱ្យដឹងថា ក្នុងចំណោមវិធានការសកម្មផ្សេងៗ ដើម្បីទប់ស្កាត់ហានិភ័យ ជំហានដែលក្រុមហ៊ុនអនុវត្តរួមមានការកាត់បន្ថយការចំណាយលើមនុស្ស ជាពិសេសនៅផ្នែកណាដែលមានចំនួនបុគ្គលិកច្រើនលើសតម្រូវការ និងកម្លាំងបុគ្គលិកដែលគ្មានផលិតភាព។
សេចក្ដីថ្លែងការណ៍របស់ក្រុមហ៊ុននេះបានបញ្ជាក់ថា៖ «ជាលទ្ធផល ដើម្បីប្រយោជន៍របស់បុគ្គលិកដែលរងផលប៉ះពាល់ ក្រុមហ៊ុនបានអនុវត្តនូវវិធានការបញ្ចប់កិច្ចសន្យាការងារដោយការព្រមព្រៀង (Mutual Separellon Plan (MSP)) ដែលវិធានការនេះ ផ្តល់ជូនដល់បុគ្គលិកនូវប្រាក់សំណងប្រសើរលើសពីសំណង ដែលតម្រូវដោយច្បាប់ការងារកម្ពុជា»។
បន្ថែមពីនេះ ក្រុមហ៊ុន ណាហ្គាវើលដ៍ ក៏បានអះអាងដែរថា ការសម្រេចជ្រើសរើសបុគ្គលិកដែលរងផលប៉ះពាល់គឺផ្អែកលើវិធានផ្ទៃក្នុងរបស់ក្រុមហ៊ុន និងដោយផ្អែកលើតម្រូវការអាជីវកម្ម ផលិតភាពកន្លងមក ការរួមចំណែក និងការប្តេជ្ញាចិត្តរបស់បុគ្គលិក និងផ្អែកលើមូលដ្ឋានផ្សេងៗទៀត ដោយមិនគិតថា បុគ្គលិកជាសមាជិកសហជីព ឬមិនមែនសមាជិកសហជីព ជាបុគ្គលិកខ្មែរ ឬបុគ្គលិកបរទេស ជាបុគ្គលិកជួរមុខ ឬបុគ្គលិកថ្នាក់គ្រប់គ្រងនោះទេ។ ហើយការសម្រេចនេះ ក្រុមហ៊ុនក៏មិនបានយកហេតុផលសមាជិកភាពសហជីពជាលក្ខខណ្ឌក្នុងការសម្រេចជ្រើសរើសដូចការចោទប្រកាន់របស់សហជីពថា មានការរើសអើងនោះដែរ។
ក្រុមហ៊ុនណាហ្គាវើលដ៍ បានបញ្ជាក់បន្ថែមថា៖ «ការពិតទៅដោយមានការយកចិត្តទុកដាក់ទាំងលើការការពារប្រយោជន៍ និងសិទ្ធិ ចំពោះសុខុមាលភាពបុគ្គលិក ក្រុមហ៊ុនតែងតែលើកទឹកចិត្ត និងសង្កត់ធ្ងន់ឱ្យបុគ្គលិកបង្កើតសហជីពចាប់តាំងពីពេលក្រុមហ៊ុនចាប់កំណើតក្នុងឆ្នាំ ១៩៩៥ មក។ បើទោះជាដូច្នេះក្តី បុគ្គលិកចំនួន ៣៦០ នាក់ក្នុងចំណោមបុគ្គលិកដែលរងផលប៉ះពាល់សរុប ១ ៣២៩ នាក់បានបដិសេធមិនទទួលយកគម្រោង បញ្ចប់កិច្ចសន្យាការងារដោយការព្រមព្រៀងនេះ។
បើតាមការអះអាងរបស់ក្រុមហ៊ុនណាហ្គាវើលដ៍ បានឱ្យដឹងថា ៧៣% នៃបុគ្គលិកដែលរងផលប៉ះពាល់បានទទួលយកគម្រោងបញ្ចប់កិច្ចសន្យាការងារដោយការព្រមព្រៀង ខណៈក្នុងឆ្នាំ ២០២០ ក្រុមហ៊ុន មានបុគ្គលិក ៨ ៣៧១ នាក់ ក្នុងនោះសមាជិកសហជីពមានចំនួន ៣ ៩៧៦ នាក់ ឬស្មើ ៤៧ ភាគរយ ចំណែកក្នុងឆ្នាំ ២០២១ ក្រុមហ៊ុនមានបុគ្គលិកចំនួន ៦ ១៨១ នាក់ ក្នុងនោះមានសមាជិកសហជីពចំនួន ២ ៥៧២ នាក់ ឬស្មើ ៤២ ភាគរយ។
នៅថ្ងៃទី ២៤ មករា អតីតបុគ្គលិកជាង ២០០ នាក់នៅតែបន្តជួបជុំប្រមូលផ្តុំគ្នាតវ៉ានៅក្បែរអគារក្រុមហ៊ុន ដើម្បីទាមទារបានចូលធ្វើការវិញ និងទាមទារឱ្យមានការដោះលែងមេដឹកនាំសហជីពរបស់ពួកគេចំនួន ៨ នាក់ បន្ទាប់ពីតុលាការសម្រេចឃុំខ្លួនបណ្តោះអាសន្នកាលពីដើមខែ។ គិតត្រឹមថ្ងៃទី ២៤ មករានេះ អតីតបុគ្គលិកណាហ្គាវើលដ៍បានធ្វើការប្រមូលគ្នាតវ៉ាប្រមាណ ២ ខែរួចមកហើយ។ កាលពីថ្ងៃទី ១១ មករា ក្រសួងបានប្រកាសថា មានអតីតបុគ្គលិកចំនួន ៨ នាក់បានទៅទទួលយកសំណងបញ្ចប់កិច្ចសន្យាការងារពីក្រុមហ៊ុន ក្រោយពីក្រុមហ៊ុនបានកែសម្រួលការគណនាតាមមន្ត្រីអធិការការងារ ខណៈសហជីពអះអាងថា ចំនួនអ្នកចូលរួមការតវ៉ា និងការមិនយល់ព្រមបញ្ចប់កិច្ចសន្យាការងារ នៅតែមានចំនួនច្រើន។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ភ្នំពេញប៉ុស្តិ៍នៅថ្ងៃទី ២៤ មករាថា មកដល់ពេលនេះ គឺនៅតែមានអតីតបុគ្គលិកមកទទួលយកប្រាក់បញ្ចប់កិច្ចសន្យាជាមួយក្រុមហ៊ុនជាបន្តបន្ទាប់។ ប៉ុន្តែដោយយោងលើសំណូមពរសាមីខ្លួនរបស់អតីតបុគ្គលិកនីមួយៗ ដែលស្នើសុំឱ្យក្រសួង និងក្រុមហ៊ុនកុំធ្វើការផ្សព្វផ្សាយឈ្មោះ និងចំនួន ដូច្នេះក្រសួងមិនអាចបញ្ជាក់ពីតួលេខនៃអ្នកដែលបានទទួលយកលក្ខខណ្ឌនេះបានទេ។
លោកថ្លែងថា៖ «ក្រសួងនៅបន្តបំពេញតួនាទីជាអ្នកសម្របសម្រួល ហើយប្រសិនជាបងប្អូនចង់បញ្ចប់បញ្ហា នោះបងប្អូនរកវិធីដោះស្រាយបញ្ហាតាមវិធាន និងករណីនីមួយៗ។ យើងមិនអាចច្របាច់បញ្ហាបញ្ចូលគ្នាបាននោះទេ។ មន្ត្រីក្រសួងនៅរង់ចាំដោះស្រាយបញ្ហាគ្រប់ពេល ប្រសិនជាបងប្អូនត្រូវការ។ ប្រសិនជាបងប្អូនមិនត្រូវការក្រសួងជួយ គឺក្រសួងមានតែរង់ចាំបន្ត»៕
វីដេអូ៖
