ព្រះសីហនុ: កម្លាំងការិយាល័យព្រហ្មទណ្ឌនៃស្នងការដ្ឋាននគរបាលខេត្តព្រះសីហនុ និងកម្លាំងអធិការដ្ឋាននគរបាលស្រុកព្រៃនប់ កំពុងបន្តធ្វើការស៊ើបអង្កេតករណីប្រទះឃើញសាកសពនារីវ័យក្មេងម្នាក់ ដែលត្រូវបានគេសម្លាប់យកសាកសពទៅកប់ក្នុងដី លេចចេញជង្គង់ជើងម្ខាង និងដៃទាំង ២ ជាប់ខ្នោះ។
លោក អ៊ួង វុទ្ធី អធិការស្រុកព្រៃនប់បានប្រាប់ភ្នំពេញប៉ុស្តិ៍នៅព្រឹកថ្ងៃទី ២៤ ខែមករា ឆ្នាំ ២០២២ ថា សពនារីរងគ្រោះត្រូវបានអ្នកភូមិប្រទះឃើញកាលពីព្រលប់ថ្ងៃទី ២១ ខែមករា ឆ្នាំ ២០២២ នៅចំណុចភូមិអូរតាសេក ឃុំអូរឧកញ៉ាហេង ស្រុកព្រៃនប់ ស្ថិតនៅចម្ងាយប្រមាណ ៥០០ ម៉ែត្រពីចន្លោះបង្គោលគីឡូម៉ែត្រលេខ ១៩៩-២០០ នៃដងផ្លូវជាតិលេខ ៤ ។
លោកឱ្យដឹងទៀតថា លុះដល់ព្រឹកថ្ងៃទី ២២ មករា កម្លាំងនគរបាល និងគ្រូពេទ្យជំនាញបានចុះទៅធ្វើការហ៊ុមព័ទ្ធទីតាំងនៃសព ហើយជីកកកាយយកសពនារីរងគ្រោះមកពិនិត្យកោសល្យវិច័យឃើញមានស្លាកស្នាមមួយចំនួនដែលបង្ហាញថា នារីរងគ្រោះស្លាប់ដោយអំពើឃាតកម្ម។ លោក វុទ្ធី បញ្ជាក់ថា៖ «តាមរយៈលទ្ធផលពិនិត្យកោសល្យវិច័យរបស់គ្រូពេទ្យជំនាញ សពនារីរងគ្រោះមានសភាពរលេះរលួយ ដៃជាប់ខ្នោះបាក់ដើមដៃស្តាំ កំភួនជើង និងភ្លៅស្តាំជាំខ្មៅ លើទ្រូងស្តាំក្រោមក្លៀកដាច់រលាត់ ក្បាលលើត្រចៀកឆ្វេងហើមប៉ោង និងមានស្នាមធ្លុះក្រោមផ្ចិតផ្នែកខាងឆ្វេង។ លក្ខណៈបែបនេះបង្ហាញថា នារីរងគ្រោះត្រូវបានគេវាយ និងចាក់សម្លាប់»។
យោងតាមរបាយការណ៍របស់ក្រុមគ្រូពេទ្យជំនាញផ្នែកកោសល្យវិច័យ ដែលភ្នំពេញប៉ុស្តិ៍ទទួលបានសពនារីរងគ្រោះដែលមានកម្ពស់ ១,៥៥ ម៉ែត្រមានអាយុចន្លោះពី ១៥-១៨ ឆ្នាំ សម្បុរស សក់ពណ៌ទង់ដែង និងមានសាក់រូបភាព និងអក្សរនៅលើរាងកាយ ដូចជា សាក់អក្សរពាក្យ sexy ជាភាសាអង់គ្លេសនៅលើស្មាខាងស្តាំមានសាក់រូបយ័ន្តនៅលើខ្នង និងមានសាក់រូបមេអំបៅនៅលើស្មាឆ្វេងផ្នែកខាងក្រោយផងដែរនោះ មិនត្រូវបានគេស្គាល់អត្តសញ្ញាណឡើយ ព្រោះរកពុំឃើញមានឯកសារបញ្ជាក់អំពីអត្តសញ្ញាណណាមួយនៅជាប់ខ្លួននៃសពនោះទេ។
របាយការណ៍បន្តថា សពនារីរងគ្រោះមានស្លៀកពាក់ខោអាវឈុតខ្លីពណ៌ផ្កាឈូក និងមានពាក់ខ្សែកពណ៌ប្រាក់ បន្តោងហ្គិចពណ៌ខៀវ និងមានពាក់ចិញ្ចៀនពណ៌ប្រាក់នៅម្រាមដៃកណ្តាលខាងឆ្វេង។ បច្ចុប្បន្ន សពនារីរងគ្រោះត្រូវបានក្រុមគ្រូពេទ្យជំនាញ វេចខ្ចប់យកទៅតម្កល់ទុក នៅឯមន្ទីរពេទ្យបង្អែកខេត្តព្រះសីហនុ ដើម្បីរង់ចាំសាច់ញាតិទាក់ទងនាំយកទៅធ្វើបុណ្យតាមប្រពៃណី។
បើតាមលោក វុទ្ធី រហូតមកទល់ពេលនេះ សមត្ថកិច្ចនៅពុំទាន់ស្រាវជ្រាវរកឃើញអត្តសញ្ញាណនៃសពនារីរងគ្រោះនៅឡើយទេ ហើយក៏ពុំទាន់ឃើញមានប្រជាពលរដ្ឋណាម្នាក់មកអះអាងថា ជាសាច់ញាតិនៃសពនារីរងគ្រោះនោះដែរ។
លោកបានថ្លែងថា៖ «ទោះ-យ៉ាងណាក៏ដោយ កម្លាំងនគរបាលជំនាញ នៅតែបន្តធ្វើការស្រាវជ្រាវ ស៊ើបអង្កេតលើករណីនេះយ៉ាងសកម្ម ដោយរក្សាភាពស្ងប់ស្ងាត់បំផុតដើម្បីឈានដល់ការឃាត់ខ្លួនមុខសញ្ញាជនសង្ស័យក្នុងអំពើឃាតកម្មនេះបញ្ជូនឱ្យតុលាការ ចាត់វិធានការផ្តន្ទាទោសទៅតាមនីតិវិធីច្បាប់»៕