ភ្នំពេញៈ ក្រសួងសុខាភិបាលកម្ពុជា និងសាធារណរដ្ឋប្រជាមានិតចិនបានចុះហត្ថលេខាលើកិច្ចព្រមព្រៀងស្តីពីការបញ្ជូនក្រុមវេជ្ជសាស្ត្របុរាណចិន មកកាន់ប្រទេសកម្ពុជា ដើម្បីជួយពង្រឹងសមត្ថភាពការងារទប់ស្កាត់ជំងឺកូវីដ ១៩ ដោយការបញ្ចូលនូវវេជ្ជសាស្ត្របុរាណចិន ក្នុងការព្យាបាលជំងឺនេះ។
ការចុះហត្ថលេខានេះត្រូវបានធ្វើឡើងនាព្រឹកថ្ងៃទី ២៥ ខែមករា ឆ្នាំ ២០២២ នាក្រសួងសុខាភិបាល ដោយមានការចូលរួមពីលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ហ័ង លូគី (Huang Luqi) អនុប្រធានរដ្ឋបាលជាតិវេជ្ជសាស្ត្របុរាណចិន និងជាប្រធានបណ្ឌិត្យសភាចិននៃវិទ្យាសាស្ត្រវេជ្ជសាស្ត្រចិនរួមជាមួយលោក វ៉ាង វិនធៀន ឯកអគ្គរដ្ឋទូត សាធារណរដ្ឋប្រជាមានិតចិនប្រចាំកម្ពុជា និងគណៈប្រតិភូមួយចំនួនទៀត។
នាពិធីចុះកិច្ចព្រមព្រៀងនេះ លោក ម៉ម ប៊ុនហេង បានស្វាគមន៍យ៉ាងកក់ក្តៅ ចំពោះវត្តមានរបស់លោក Huang Luqi និងគណៈប្រតិភូ ហើយលោកបានឯកភាពទៅលើគំនិតផ្តួចផ្តើមបញ្ជូនអ្នកជំនាញវេជ្ជសាស្ត្រ បុរាណចិនមកជួយកម្ពុជាក្នុងការព្យាបាលជំងឺកូវីដ ១៩ ដោយប្រើឱសថ និងវេជ្ជសាស្ត្របុរាណចិននេះ។
លោកបានមានប្រសាសន៍ថា៖ «ខ្ញុំសង្ឃឹមយ៉ាងមុតមាំថា កិច្ចសហការបញ្ជូនអ្នកជំនាញវេជ្ជសាស្ត្របុរាណចិនមកជួយពង្រឹងសមត្ថភាពមន្ត្រីសុខាភិបាលកម្ពុជា មិនត្រឹមតែរយៈពេល ១ ឆ្នាំ និងនៅតែមន្ទីរពេទ្យមិត្តភាពកម្ពុជា-ចិន ព្រះកុសុមៈ ប៉ុណ្ណោះទេតែនឹងត្រូវពង្រីកទៅមន្ទីរពេទ្យផ្សេងទៀតផងដែរ»។
លោករដ្ឋមន្ត្រីក្រសួងសុខាភិបាលក៏បានគូសរំលេចឡើងផងដែរថា ដំណើរទស្សនកិច្ចរបស់រដ្ឋបាលជាតិ វេជ្ជសាស្ត្របុរាណចិននេះ មិនត្រឹមតែជួយពង្រឹងកិច្ចសហប្រតិបត្តិការយ៉ាងជិតស្និទ្ធរវាងប្រទេសទាំង ២ ក្នុងការងារប្រយុទ្ធនឹងជំងឺកូវីដ ១៩ ប៉ុណ្ណោះទេ ប៉ុន្តែថែមទាំងពង្រឹង និងពង្រីកវេជ្ជសាស្ត្របុរាណនៃប្រទេសទាំង ២ ទៀតផង។
ជាមួយគ្នានោះផងដែរ លោក ហ័ង លូគី ក៏បានសម្តែងនូវការកោតសរសើរ ចំពោះកិច្ចសហប្រតិបត្តិការរវាងកម្ពុជា-ចិនលើវិស័យសុខាភិបាលជាពិសេសអគារមន្ទីរពេទ្យមិត្តភាពកម្ពុជា-ចិន ព្រះកុសុមៈ ដ៏ធំស្កឹមស្កៃដែលបំពាក់ដោយសម្ភារបរិក្ខារវេជ្ជសាស្ត្រដ៏ទំនើបដំបូងគេនៅកម្ពុជា។
អនុប្រធានរដ្ឋបាលជាតិ វេជ្ជសាស្ត្របុរាណចិនរូបនេះបានចុះពិនិត្យមើលមន្ទីរពេទ្យមិត្តភាពកម្ពុជា-ចិន ព្រះកុសុមៈ ដើម្បីពិនិត្យលទ្ធភាពបង្កើតមណ្ឌលព្យាបាលជំងឺកូវីដ ១៩ ដោយប្រើវេជ្ជសាស្ត្របុរាណចិននេះទៅតាមស្ថានភាព និងតម្រូវការជាក់ស្តែងរបស់មន្ទីរពេទ្យនេះផងដែរ។
យោងតាមស្ថានទូតចិនប្រចាំកម្ពុជាបានឱ្យដឹងថា ដំណើរទស្សនកិច្ចរបស់លោក ហ័ង លូគី នាលើកនេះគឺជាសកម្មភាពដ៏សំខាន់ក្នុងការអនុវត្តសេចក្តីណែនាំសំខាន់ៗរបស់លោក ស៊ី ជីនភីង (Xi Jinping) អគ្គលេខាធិការបក្សស្តីពីកិច្ចសហប្រតិបត្តិការអន្តរជាតិលើវិស័យឱសថបុរាណចិនព្រមទាំងសមិទ្ធផលនៃកិច្ចប្រជុំតាមវីដេអូរវាងនាយករដ្ឋមន្ត្រីទាំង ២ ប្រទេសកាលពីថ្ងៃទី ១៥ ខែវិច្ឆិកា ឆ្នាំ ២០២១ កន្លងទៅ។
ស្ថានទូតចិនបានបញ្ជាក់ថា៖ «នេះមិនត្រឹមតែនឹងពង្រឹងកិច្ចសហប្រតិបត្តិការរវាងប្រទេសទាំង ២ ក្នុងកិច្ចប្រយុទ្ធប្រឆាំងវីរុសកូវីដ ១៩ ប៉ុណ្ណោះទេ តែថែមទាំងជួយជំរុញយ៉ាងពេញទំហឹងលើទំនាក់ទំនងសិក្សាពីគ្នាទៅវិញទៅមកលើវិស័យឱសថបុរាណនៃប្រទេសទាំង ២ ផងដែរ»៕