ព្រះសីហនុៈ រថភ្លើងដឹកទំនិញចំនួន ២ គ្រឿង បានបុកគ្នាយ៉ាងពេញទំហឹង បណ្ដាលឱ្យទូដឹកទំនិញជាច្រើនត្រូវក្រឡាប់ផ្ងារជើង ហើយអ្នកបើកបរម្នាក់បានរងរបួស។ ករណីនេះបានកើតឡើងនៅរសៀលថ្ងៃទី ២៥ ខែមករា ឆ្នាំ ២០២២ នៅចំណុច ភូមិថ្មី សង្កាត់លេខ៣ ក្រុង-ខេត្តព្រះសីហនុ។
លោក អ៊ុក សុផាន់ណារ៉ា នាយនគរបាលប៉ុស្តិ៍សង្កាត់លេខ ៣ ក្រុងព្រះសីហនុបានប្រាប់ភ្នំពេញប៉ុស្តិ៍ថា ករណីគ្រោះថ្នាក់រថភ្លើងបុកគ្នាដ៏កម្រនេះ គឺបណ្ដាលមកពីអ្នកបើកបររថភ្លើងទាំង ២ មិនផ្ដល់ដំណឹង ឬសញ្ញាឱ្យគ្នាទៅវិញទៅមក ហើយអ្នកគ្រប់គ្រងស្ថានីយរថភ្លើងទាំងនៅភ្នំពេញ និង ខេត្តព្រះសីហនុក៏មិនបានផ្ដល់ព័ត៌មានអំពីការមកដល់ និងការចេញដំណើរនៃរថភ្លើងពីស្ថានីយទាំង ២ ផងដែរ។
លោកបញ្ជាក់ថា៖ «រថភ្លើងទាំង ២ បានបុកគ្នាយ៉ាងពេញទំហឹងនៅចម្ងាយប្រមាណ ៥០០ ម៉ែត្រពីស្ថានីយរថភ្លើងខេត្តព្រះសីហនុ។ ក្នុងហេតុការណ៍នោះ មានអ្នកបើកបរម្នាក់ក្នុងចំណោមអ្នកបើកបរ ៣ នាក់បានរងរបួសស្រាល ដោយដាច់រលាត់ដៃ ជើង និង ពកថ្ងាសបន្តិចបន្តួច»។
បើតាមលោក សុផាន់ណារ៉ា ក្រោយហេតុការណ៍នេះកើតឡើងក្រុមការងារបច្ចេកទេសនៃស្ថានីយរថភ្លើងខេត្តព្រះសីហនុបាននាំយករថយន្តស្ទូចមកស្ទូចក្បាល និងទូរថភ្លើងទាំងនោះ ហើយនាំទៅកាន់ស្ថានីយវិញដើម្បីជួសជុល ។
ជុំវិញករណីគ្រោះថ្នាក់ចរាចរណ៍រថភ្លើងបុកគ្នាដ៏កម្រនេះផងដែរលោក ជួន ណារិន្ទ ស្នងការខេត្តព្រះសីហនុបានអំពាវនាវដល់អ្នកគ្រប់គ្រងស្ថានីយរថភ្លើងក៏ដូចជាអ្នកបើកបររថភ្លើងត្រូវយកចិត្តទុកដាក់អំពីលក្ខណៈបច្ចេកទេសស្ថានភាពផ្លូវ ផ្លូវចំណោតផ្លូវភ្លោះសម្រាប់ប្ដូរទិសនៅក្នុងស្ថានីយធំ និងអនុស្ថានីយ ការបើកបរ និងការកំណត់ពេលវេលាជាក់លាក់សម្រាប់ការចេញដំណើរ និងការមកដល់នៃរថភ្លើងនៅតាមស្ថានីយនីមួយៗ។
លោកថា៖ «ប្រសិនបើរថភ្លើងទាំង ២ ជារថភ្លើងដឹកអ្នកដំណើរវិញនោះ ហើយជួបគ្រោះថ្នាក់បុកគ្នាក្រឡាប់ផ្ងារជើងបែបនេះមិនដឹងថា មានជនរងគ្រោះស្លាប់ និងរបួសប៉ុន្មាននាក់នោះទេ។ ដូច្នេះសូមអ្នកគ្រប់គ្រង ស្ថានីយរថភ្លើង ក៏ដូចជាអ្នកបើកបររថភ្លើង គប្បីបង្កើនការប្រុងប្រយ័ត្ន និងត្រូវផ្ដល់ព័ត៌មានឱ្យគ្នាទៅវិញទៅមកអំពីពេលវេលានៃការមកដល់ និងចេញដំណើរនៅតាមស្ថានីយនីមួយៗគ្រប់ពេលវេលា ដើម្បីចៀសវាងគ្រោះថ្នាក់កើតឡើង»។
បើតាមលោក ជួន ណារិន្ទ ជនរងគ្រោះនៅក្នុងគ្រោះថ្នាក់រថភ្លើង ២ គ្រឿងបុកគ្នានេះ ឈ្មោះ រស់ ចិន អាយុ ៧០ ឆ្នាំជាអ្នកបើកបរថភ្លើងចេញពីស្ថានីយរថភ្លើងខេត្តព្រះសីហនុ។ ចំណែករថភ្លើងដែលមកពីរាជធានីភ្នំពេញ បើកបរដោយឈ្មោះ ស៊ុន វណ្ណឌី អាយុ ៣៥ ឆ្នាំ និង ម្នាក់ទៀតឈ្មោះ សេង គីម អាយុ ៤០ ឆ្នាំ ជាជំនួយការបើកបររថភ្លើង ។
លោកបានបញ្ជាក់ថា៖ «ពួកគេទាំង ៣នាក់គឺជាបុគ្គលិករបស់ក្រុមហ៊ុន Royal Railway។ រថភ្លើងទាំង ២ខ្សែ ជាប្រភេទរថភ្លើងដឹកទំនិញ»។
ទោះយ៉ាងណា លោកមិនបានប្រាប់ឱ្យដឹងអំពីប្រភេទទំនិញដែលមាននៅក្នុងទូរថភ្លើងដែលបានក្រឡាប់ផ្ងារជើងនោះទេ។ ជាមួយគ្នានេះ ខាងក្រុមហ៊ុន Royal Railway ក៏មិនអាចទាក់ទងស្នើសុំការពន្យល់ជុំវិញករណីនេះបានដែរកាលពីថ្ងៃទី ២៥ ខែមករា ឆ្នាំ ២០២២៕
វីដេអូ៖