.jpg)
លោក ស ខេង រដ្ឋមន្ត្រីក្រសួងមហាផ្ទៃ។ រូបថត ក្រសួងមហាផ្ទៃ
ភ្នំពេញៈ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានស្នើឱ្យក្រសួងពាក់ព័ន្ធនានា ដែលមានសិទ្ធិក្នុងការផ្ដល់អាជ្ញាប័ណ្ណនាំចូលនូវមុខទំនិញ ពីក្រៅប្រទេសជាពិសេសសារធាតុគីមីសំយោគ ត្រូវមានកិច្ចសហការឱ្យបានជិតស្និទ្ធជាមួយអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីការពារទប់ស្កាត់ចលនាប៉ុនប៉ងរបស់ក្រុមឧក្រិដ្ឋជនគ្រឿងញៀនក្នុងការយកកម្ពុជាជាទីតាំងកែច្នៃ និង ផលិតគ្រឿងញៀន។
ក្នុងពិធីផ្ដល់រថយន្ត ១៩ គ្រឿងដល់វរសេនាតូចនគរបាលការពារព្រំដែន ប្រចាំភូមិភាគ ១ ភូមិភាគ ២ និងភូមិភាគ ៣ ដែលត្រូវបានធ្វើឡើងនៅទីស្ដីការអគ្គស្នងការនគរបាលជាតិនាព្រឹកថ្ងៃទី ២៥ ខែមករា ឆ្នាំ ២០២២ លោក ស ខេង បានថ្លែងថា បញ្ហាគ្រឿងញៀនកំពុងបង្កនូវអសន្តិសុខសង្គមនៅកម្ពុជាយ៉ាងធ្ងន់ធ្ងរ ដែលមិនអាចមើលរំលងបានជាក់ស្ដែងកាលពីពេលថ្មីៗកន្លងមកនេះ កម្លាំងសមត្ថកិច្ចនគរបាលបានបង្ក្រាបបទល្មើសគ្រឿងញៀនដែលលួចលាក់ចរាចរដឹកជញ្ជូនឆ្លងកាត់តាមព្រំដែននៃប្រទេសជិតខាង ដូចជាប្រទេសឡាវ ថៃ និងវៀតណាម បានរាប់រយគីឡូក្រាម និងជាង ១០០ តោនទៀត ជាគ្រឿងញៀនសំយោគដែលត្រូវបានគេនាំចូលដោយមានអាជ្ញាប័ណ្ណស្របច្បាប់។
លោកបានបញ្ជាក់ថា៖ «ការបង្ក្រាបចាប់គ្រឿងញៀនដែលគេលួចលាក់ធ្វើចរាចរណ៍ដឹកជញ្ជូននាំចូលមកតាមព្រំដែនឡាវ ថៃ និងវៀតណាម បានប្រមាណជាង ១ តោន ប៉ុន្តែគ្រឿងញៀនសំយោគដែលត្រូវបានគេនាំចូលដោយមានអាជ្ញាប័ណ្ណស្របច្បាប់ គឺជាង ១០០ តោន»។
ជុំវិញការអនុញ្ញាតឱ្យមានការនាំចូលនូវសារធាតុគីមីសំយោគសម្រាប់កែច្នៃ និងផលិតជាគ្រឿងញៀននេះ លោកឧបនាយករដ្ឋមន្ត្រី ស ខេង បានចោទជាសំណួរថា៖ «តើអ្នកណាទទួលខុសត្រូវក្នុងការអនុញ្ញាតឱ្យនាំសារធាតុញៀនហ្នឹងមក?»។
បើតាមការរៀបរាប់របស់លោកមានមន្ត្រីធំៗជាច្រើននាក់បាននាំគ្នាចុះហត្ថលេខានៅលើលិខិតអនុញ្ញាតឱ្យមានការនាំចូលនូវសារធាតុគីមីសំយោគ សម្រាប់កែច្នៃ និងផលិតគ្រឿងញៀននេះ។ ទន្ទឹមនឹងនេះ លោកបានលើកឧទាហរណ៍ ដោយប្រដូចករណីនាំចូលសារធាតុគីមីសំយោគសម្រាប់កែច្នៃ និងផលិតគ្រឿងញៀននោះទៅនឹងចោរលួចឡានថ្មីមួយពីក្រៅប្រទេស តាមរយៈការប្រើមធ្យោបាយនាំចូលនូវគ្រឿងបន្លាស់ កង់ ម៉ាស៊ីន និងតួរថយន្តរួចហើយគេយកមកដំឡើងចេញជារថយន្តថ្មី ១ គ្រឿង។
ថ្លែងដោយមិនចំឈ្មោះក្រសួងដែលបានផ្ដល់អាជ្ញាប័ណ្ណអនុញ្ញាតឱ្យមានការនាំចូលនូវសារធាតុគីមីសំយោគនោះ លោកឧបនាយករដ្ឋមន្ត្រី ស ខេង បានជំរុញឱ្យរដ្ឋមន្ត្រីនៃក្រសួងនោះត្រូវត្រួតពិនិត្យតាមដានមើលលើករណីនេះឱ្យបានច្បាស់លាស់ និងត្រូវសហការឱ្យបានជិតស្និទ្ធបំផុតជាមួយអាជ្ញាធរជាតិប្រយុទ្ធប្រឆាំងគ្រឿងញៀន និងត្រូវផ្ដល់ព័ត៌មានឱ្យគ្នាទៅវិញទៅមក ដើម្បីជាប្រយោជន៍ក្នុងការស្រាវជ្រាវ ទប់ស្កាត់ និងបង្ក្រាបឱ្យបាននូវបទល្មើសគ្រឿងញៀននៅកម្ពុជា។
លោកបានថ្លែងថា៖ «សូមឯកឧត្តម [រដ្ឋមន្ត្រី] ទទួលបន្ទុកការងារនេះសូមឱ្យជួយមើល និងតាមដានរឿងហ្នឹងផង បើមិនអ៊ីចឹង ឯកឧត្តមនឹងជាប់ជំពាក់ចំពោះការទទួលខុសត្រូវចំពោះជាតិ និងប្រជាជនពាក់ព័ន្ធនឹងការបំផ្លាញសុខភាពសាធារណៈ និង សេដ្ឋកិច្ចសង្គម»។
ជាមួយគ្នានេះ លោកបានណែនាំឱ្យអាជ្ញាធរជាតិប្រយុទ្ធប្រឆាំងគ្រឿងញៀនត្រូវរៀបចំបញ្ជីឈ្មោះសារធាតុគីមីសំយោគដែលអាចផ្សំគ្នាសម្រាប់កែច្នៃផលិតជាគ្រឿងញៀន ដើម្បីចម្លងជូនទៅដល់ក្រសួង ស្ថាប័នពាក់ព័ន្ធនានា ដើម្បីពិនិត្យឱ្យបានច្បាស់មុនពេលត្រូវផ្ដល់អាជ្ញាប័ណ្ណដល់ក្រុមហ៊ុនណាមួយឱ្យនាំចូលនូវសារធាតុគីមីសំយោគទាំងនោះ។ ចំណែកក្រសួង និងស្ថាប័នដែលទទួលបន្ទុកផ្ដល់អាជ្ញាប័ណ្ណឱ្យគេនាំចូលនូវសារធាតុគីមីសំយោគណាមួយសម្រាប់បម្រើការជាប្រយោជន៍ដល់ការអភិវឌ្ឍសេដ្ឋកិច្ចសង្គមកម្ពុជានោះ ក៏ត្រូវផ្ដល់នូវរបាយការណ៍លម្អិតពីគោលបំណងរបស់ក្រុមហ៊ុននោះមកខាងអាជ្ញាធរជាតិប្រយុទ្ធប្រឆាំងគ្រឿងញៀនវិញផងដែរ ដើម្បីជាប្រយោជន៍ក្នុងការតាមដានឃ្លាំមើលថាតើក្រុមហ៊ុននោះ ពិតជានាំសារធាតុគីមីសំយោគនោះមកសម្រាប់ដំណើរការអាជីវកម្មត្រឹមត្រូវតាមអាជ្ញាប័ណ្ណដែលបានស្នើសុំឬយ៉ាងណា?។
លោកថ្លែងថា៖ «រដ្ឋ [ប្រទេសកម្ពុជា] យើងមិនមែនជារដ្ឋដាច់ដោយឡែកៗពីគ្នាទេ គឺជារដ្ឋឯកភាពជារដ្ឋទោល បើទោះជារដ្ឋសហព័ន្ធក៏គង់គេចែករំលែកផ្ដល់ព័ត៌មានឱ្យគ្នាទៅវិញទៅមកដែរ»។
លោកថ្លែងថា ក្នុងចំណោមអ្នកជាប់ឃុំនៅទូទាំងប្រទេសនាពេលបច្ចុប្បន្នប្រមាណជា ៣ ៨០០០ នាក់មានអ្នកជាប់ឃុំដោយករណីគ្រឿងញៀនសរុបចំនួន ៥៤,៥២ ភាគរយ។
លោកឧបនាយករដ្ឋមន្ត្រីក៏បានលើកទឹកចិត្តឱ្យកងកម្លាំងសមត្ថកិច្ចនគរបាលទាំងអស់បន្តពង្រឹងកិច្ចសហប្រតិបត្តិការ រក្សាសន្តិសុខជូនជាតិ និងប្រជាជនឱ្យបានល្អ ដោយពង្រឹងការចុះល្បាត ស្រាវជ្រាវ និងបង្ក្រាបបទល្មើសជាប្រចាំ ដោយអនុវត្តនូវវិធានការ ៣ មិន ១ រាយការណ៍។
យោងតាមរបាយការណ៍ដែលប្រកាសឡើងដោយលោក សេង យូអ៊ាន់ អគ្គនាយកនៃអគ្គនាយកដ្ឋានភ័ស្ដុភារ និងហិរញ្ញវត្ថុ ក្រសួងមហាផ្ទៃចាប់តាំងពីឆ្នាំ ២០១៩ មកដល់ពេលនេះបានផ្ដល់រថយន្តដល់បណ្ដាអង្គភាពកងកម្លាំងនគរបាលនៅទូទាំងរាជធានី-ខេត្តសរុបចំនួន ២៦៤ គ្រឿងក្នុងនោះរថយន្តប្រភេទ Pickup Ford Ranger ចំនួន ២៣១ គ្រឿង និង Mazda ចំនួន ៣៣ គ្រឿង។
យោងតាមរយៈរបាយការណ៍ដដែលនោះបានឱ្យដឹងថា រថយន្ត Pickup Ford Ranger ស៊េរីឆ្នាំ ២០២២ ទាំង ១៩ គ្រឿងនោះនឹងត្រូវផ្ដល់ជូនដល់នាយកដ្ឋាននគរបាលជើងទឹកចំនួន ៣ គ្រឿងស្នងការដ្ឋាននគរបាលខេត្តមណ្ឌលគិរី រតនគិរី កោះកុង កំពង់ស្ពឺ និងស្វាយរៀង ទទួលបាន ២ គ្រឿងក្នុង ១អង្គភាព។ ចំណែកស្នងការដ្ឋាននគរបាលខេត្តក្រចេះ ស្ទឹងត្រែង កំពត និងតាកែវ ទទួលបាន ១ គ្រឿងក្នុង ១ អង្គភាព៕
វីដេអូ៖
