ភ្នំពេញៈ សាលាដំបូងរាជធានីភ្នំពេញនៅថ្ងៃទី ២៥ ខែមករា បានបន្តបើកសវនាការជំនុំជម្រះករណីលោក កឹម សុខា អតីតប្រធាននៃអតីតគណបក្សសង្គ្រោះជាតិតាមពាក្យបណ្តឹងរបស់មេធាវីរាជរដ្ឋាភិបាល ក្រោមបទចោទ «សន្ទិដ្ឋភាពជាមួយបរទេស» ឬ «ឃុបឃិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា» ប៉ុន្តែសវនាការមិនទាន់ត្រូវបានបញ្ចប់នៅឡើយទេ ពោលគឺបន្តលើកពេលទៅថ្ងៃទី ២ កុម្ភៈ ឆ្នាំ ២០២២។
សវនាការរបស់លោក កឹម សុខា ស្ថិតក្រោមក្រសែភ្នែក និងការតាមដានពីមន្ត្រីស្ថានទូត អង្គការសង្គមស៊ីវិល អ្នកសារព័ត៌មាន និងអ្នកគាំទ្រលោក កឹម សុខា មួយចំនួនផងដែរ។ ទោះជាយ៉ាងណា សវនាការនេះបានប្រព្រឹត្តទៅដោយរលូនដែលមានការរៀបចំសណ្តាប់ធ្នាប់ សន្តិសុខ សុវត្ថិភាព និងសម្រួលចរាចរណ៍ពីកងកម្លាំងចម្រុះរបស់រដ្ឋាភិបាល។
ក្រោយចេញពីសវនាការនៃសាលាដំបូងរាជធានីភ្នំពេញ លោក កឹម សុខា ជិះរថយន្តម៉ាក Luxus ដោយមានកងកម្លាំងចម្រុះជួយសម្រួលចរាចរណ៍។ លោកមិនបានធ្វើអត្ថាធិប្បាយអ្វីប្រាប់អ្នកសារព័ត៌មាន និងអ្នកគាំទ្រនោះទេ លោកគ្រាន់តែលើកដៃសំពះ និងរាដៃចេញពីក្នុងរថយន្តដោយបង្ហាញនូវការញញឹមចេញពីក្នុងរថយន្តតែប៉ុណ្ណោះ។
ក្រោយពីបញ្ចប់សវនាការពេញ ១ ព្រឹកថ្ងៃទី ២៥ ខែមករា លោក អាង ឧត្តម សហមេធាវី លោក កឹម សុខា បានប្រាប់ក្រុមអ្នកសារព័ត៌មានថា សម្រាប់សវនាការពេញ ១ ព្រឹក តុលាការ បន្តចាក់វីដេអូតាមការស្នើសុំពីអយ្យការ ដោយមានការជំទាស់ពីក្រុមមេធាវីរបស់លោក។ ទោះជាយ៉ាងណា តុលាការបានសម្រេចឱ្យចាក់វីដេអូពេញ។ បន្ទាប់មកទៀត តុលាការក៏បានចាក់វីដេអូ ដែលត្រូវបានកាត់ជាកង់ៗបន្តទៀតដែលមានចំនួន ៧ ឃ្លីប។ ក្នុងវីដេអូនីមួយៗមានការពន្យល់បកស្រាយ និងឆ្លៀតបន្លំធ្វើសេចក្តីសន្និដ្ឋានទោសដែលធ្វើឱ្យលោកលើកឡើងជំទាស់ និងទទួលបានការឯកភាពពីក្រុមប្រឹក្សាជំនុំជម្រះលើករណីនេះដែរ។
លោកថ្លែងថា៖ «វីដេអូហ្នឹង ចាក់ច្រំដែល ច្រើនលើកច្រើនសា និងដេញដោលគ្នារួចហើយ ប៉ុន្តែចុងក្រោយនេះនៅតែចាក់។ យើងសុំឱ្យពន្លឿននីតិវិធី តុលាការអត់ធ្វើតាមទេ។ យើងឱ្យពន្យល់ក៏អត់ពន្យល់ដែរ ដោយលើកទៅសប្តាហ៍ក្រោយថ្ងៃទី ២ ខែកុម្ភៈ»។
បើតាមលោក អាង ឧត្តម លោក បានកត់សម្គាល់ឃើញថា សាលាដំបូងរាជធានីភ្នំពេញបើកសវនាការករណីកូនក្តីរបស់លោកក្នុង ១ សប្តាហ៍ម្តងបែបនេះ វាមិនទាន់ឆ្លើយតបទៅនឹងសេចក្តីត្រូវការ និងការចង់បានរបស់កូនក្តីរបស់លោកនោះទេ ដោយតំណាងអយ្យការព្រលយពាក្យថា វាជារឿងក្តីធំធេងដែលត្រូវឱ្យតុលាការគិតគូរពិចារណាឱ្យបានហ្មត់ចត់។
ទោះជាយ៉ាងណាលោកថា តំណាងអយ្យការបានព្រលយពាក្យថា បើចង់បញ្ចប់លឿន ជនជាប់ចោទ គឺលោក កឹម សុខា ត្រូវតែទទួលទោស និងសុំទោស តុលាការអាចនឹងបញ្ចប់រឿងក្តី។ ប៉ុន្តែការធ្វើបែបនេះ គឺជារឿងមិនត្រឹមត្រូវជាដាច់ខាត។ ពាក្យនេះត្រូវបានលើកឡើង ២ ដងរួចហើយ ដោយកាលពីសប្តាហ៍មុនលើកឡើងដោយមេធាវីដើមបណ្តឹងរដ្ឋប្បវេណី និងនៅថ្ងៃទី ២៥ មករា តំណាងអយ្យការក៏បានបង្ហើបពាក្យនេះដដែលទៀត។
លោកថ្លែងថា៖ «ការធ្វើបែបនេះ ជនជាប់ចោទអត់មានទោសដើម្បីសារភាពទេ។ ការដែលសារភាពទោស ដែលមិនបានប្រព្រឹត្តខុស គឺយុត្តិធម៌ដែលបានមក គឺជាយុត្តិធម៌ក្លែងក្លាយ មិនត្រឹមត្រូវ និងមិនអាចទទួលយកបាន»។
ជាមួយគ្នានេះលោកបានស្នើសុំឱ្យតុលាការពន្យល់ពាក់ព័ន្ធនឹងសវនាការធ្វើតែ ១ ព្រឹកក្នុង ១ អាទិត្យ បែបនេះ ខណៈមុនពេលផ្អាកសវនាការ គឺមានការធ្វើ ៣ ពេល (១ ថ្ងៃកន្លះ) ប៉ុន្តែតុលាការមិនបានពន្យល់ទេ ដែលនេះ លោកថា មិនសុខចិត្តនោះទេ។
ដោយឡែកលោក គី តិច មេធាវី របស់រាជរដ្ឋាភិបាលស្នើសុំមិនធ្វើអត្ថាធិប្បាយទេ ដោយប្រាប់ឱ្យភ្នំពេញប៉ុស្តិ៍ទៅសួរអ្នកនាំពាក្យរបស់អយ្យការនៃសាលាដំបូងរាជធានីភ្នំពេញ។
លោកប្រាប់ភ្នំពេញប៉ុស្តិ៍ថា៖ «តាមការពិភាក្សា យើងបានកំណត់ជូនជាសមត្ថកិច្ចទៅអ្នកនាំពាក្យរបស់អយ្យការក្នុងការឆ្លើយតបសំណួរដែលពាក់ព័ន្ធនឹងដំណើរការនីតិវិធីក្នុងអង្គសវនាការ»។
លោក ផ្លង់ សុផល អ្នកនាំពាក្យសាលាដំបូងរាជធានីភ្នំពេញក៏មិនបានធ្វើអត្ថាធិប្បាយអ្វីឱ្យពិស្តារពាក់ព័ន្ធនឹងនីតិវិធី និងសវនាការជំនុំជម្រះលោក កឹម សុខា នេះដែរ។ លោកថ្លែងយ៉ាងខ្លីថា៖ «សវនាការនឹងប្រព្រឹត្តទៅនៅព្រឹកថ្ងៃទី ២ កុម្ភៈ ២០២២»។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជាដែលបានចូលស្តាប់ និងអង្កេតក្នុងបន្ទប់សវនាការនេះ ប្រាប់ក្រុមអ្នកសារព័ត៌មាននៅខាងក្រៅតុលាការថា សវនាការនៅពេលនេះជាចំណុចមួយល្អ ដោយមានតំណាងច្រើនបានចូលរួមស្តាប់ និងអង្កេត។ ក្នុងនោះ មានមន្ត្រីតំណាងទូតមួយចំនួន ដូចជា អាមេរិក អឺរ៉ុប ជប៉ុន អូស្ត្រាលី និងអាល្លឺម៉ង់ អង្គការជាតិ អន្តរជាតិ និងអ្នកសារព័ត៌មានបានចូលរួមស្តាប់ និងអង្កេត។
លោកស្រីប្រាប់ថា តាមការកត់សម្គាល់ឃើញថា ក្នុងសវនាការរបស់លោក កឹម សុខា ត្រូវបានរៀបចំខុសពីសកម្មជននយោបាយផ្សេងទៀត ដែលជាជនជាប់ចោទ។ កន្លែងតុអង្គុយ របស់ លោក កឹម សុខា ដែលជាជនជាប់ចោទត្រូវបានគេរៀបចំឱ្យមានកន្លែងកត់ត្រាផងដែរ។
លោកស្រី ចក់ សុភាព បានថ្លែងថា៖ «សវនាការ ព្រឹកនេះ មិនទាន់មានសួរដេញដោលទេ គឺគ្រាន់តែចាក់វីដេអូបន្តរបស់ប្រសាសន៍របស់លោក កឹម សុខា ដែលត្រូវបានលើកឡើងនៅក្នុងប្រទេសអូស្ត្រាលី ៣០ ទៅ ៤០ នាទី និងដាក់ភ័ស្តុតាងបន្ថែមខ្លះ»។
លោកស្រីបន្តថា សវនាការលើករណីលោក កឹម សុខា បានអូសបន្លាយយូរ បើទោះបីមេធាវីរបស់លោក កឹម សុខា បានស្នើសុំពន្លឿននីតិវិធីក្តី ប៉ុន្តែតុលាការនៅបន្តអូសបន្លាយ។ ចំណែកករណីផ្សេងៗទៀតមិនបានអូសបន្លាយយូរទេ ដូចជាករណីលោក រ៉ុង ឈុន និងសកម្មជនបរិស្ថានផ្សេងទៀត ដំណើរការធម្មតា បើទោះបីស្ថិតក្នុងអំឡុងពេលកូវីដក៏ដោយ។
សំណុំរឿងលោក កឹម សុខា បើតាមលោកស្រី ចក់ សុភាព ការអូសបន្លាយយូរនេះ ត្រូវបានគេមើលឃើញថា ជារឿងនយោបាយ ហើយករណីនេះក៏ត្រូវបានដោះស្រាយតាមបែបនយោបាយដែរ ព្រោះកន្លងមកនេះឱ្យតែមានការដោះស្រាយអ្វីមួយនៅពីក្រោយខ្នង សកម្មជននយោបាយតែងតែត្រូវបានកាត់តម្រឹមទោស ឬ ព្យួរទោស ជាដើម និងបន្ទាប់មកទទួលបានការលើកលែងទោសពីព្រះមហាក្សត្រ៕
វីដេអូ៖