.jpg)
គិតត្រឹមថ្ងៃទី ២៤ មករាឆ្នាំ ២០២២ រដ្ឋាភិបាលបានចំណាយថវិកា $៥៦២,២២ លានឧបត្ថម្ភពលរដ្ឋក្រីក្រ ៧០ ម៉ឺនគ្រួសារ។ រូបថត MoSVY Cambodia
ភ្នំពេញៈ រាជរដ្ឋាភិបាលតាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា គិតចាប់ពីថ្ងៃទី ២៥ ខែមិថុនា ឆ្នាំ ២០២០ មកទល់ថ្ងៃទី ២៤ ខែមករាឆ្នាំ ២០២២ បានឧបត្ថម្ភសាច់ប្រាក់ជូនដល់ប្រជាជនក្រីក្រ និងងាយរងគ្រោះប្រមាណ ៧០ ម៉ឺនគ្រួសារដោយចំណាយថវិការដ្ឋសរុបប្រមាណ ៥៦២,២២ លានដុល្លារអាមេរិក ខណៈកំពុងបន្តអនុវត្ដការឧបត្ថម្ភជុំទី ៨ លើកទី ១ បន្ថែមទៀត។
នេះតាមសេចក្តីជូនដំណឹងកាលពីថ្ងៃទី ២៤ មករា របស់ក្រសួងសង្គមកិច្ចស្តីពីលទ្ធផលនៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងកូរីដ ១៩ សម្រាប់ជុំទី ៧ លើកទី ៣ និងការបើកសាច់ប្រាក់ជុំទី ៨ លើកទី ១។
សេចក្ដីជូនដំណឹងបានឱ្យដឹងថា កាលពីថ្ងៃទី ២៤ ខែមិថុនា ឆ្នាំ ២០២០លោកនាយករដ្ឋមន្ត្រី ហ៊ុន សែន បានប្រកាសដាក់ឱ្យអនុវត្តជាផ្លូវការនូវកម្មវិធីឧបត្ថម្ភ សាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ហើយក្រសួងសង្គមកិច្ច ក៏បានចាប់ផ្តើមដំណើរការអនុវត្តកម្មវិធីនៅថ្ងៃទី ២៥ ខែមិថុនា ឆ្នាំ ២០២០ មកដល់បច្ចុប្បន្នបានចំនួន ៧ ជុំមាន ១៩ លើករួចមកហើយ។
សេចក្ដីជូនដំណឹងបញ្ជាក់ថា៖ «រាជរដ្ឋាភិបាលបានផ្តល់ការអន្តរាគមន៍ក្នុងការអនុវត្តកម្មវិធីឧបត្ថម្ភសាច់ប្រាក់ជូនប្រជាជនក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ចាប់ពីថ្ងៃទី ២៥ ខែមិថុនា ឆ្នាំ ២០២០ ដល់ថ្ងៃទី ២៤ ខែមករា ឆ្នាំ ២០២២ (១៩ លើក) បានចំណាយថវិការដ្ឋ ៥៦២,២២ លានដុល្លារអាមេរិក»។
សេចក្ដីជូនដំណឹងបានឱ្យដឹងថា គិតត្រឹមថ្ងៃទី ២៤ ខែមករា ឆ្នាំ ២០២២ វេលាម៉ោង ១៧:០០ ការបើកផ្ដល់ជុំទី ៧ លើកទី ៣ ត្រូវបានបញ្ចប់ដោយបានចំណាយថវិការដ្ឋប្រមាណ ១២២,២៣៩ លានរៀលក្នុងនោះមានគ្រួសារក្រីក្រ និងងាយរងគ្រោះក្នុង អំឡុងពេលប្រយុទ្ធនឹងកូរីដ ១៩ ចំនួន ៦៨៦ ២០៥ គ្រួសារបានទទួលសេវាឧបត្ថម្ភសាច់ប្រាក់នេះ។
លោក តូច ចាន់នីអ្នកនាំពាក្យក្រសួងសង្គមកិច្ចថ្លែងនៅថ្ងៃទី ២៥ មករាថា សម្រាប់ការបើកផ្តល់ប្រាក់ឧបត្ថម្ភជុំទី ៨ លើកទី ១ នឹងចាប់ផ្តើមពីថ្ងៃទី ២៥ ខែមករា ២០២២ រហូតដល់ថ្ងៃទី ២៤ ខែកុម្ភៈ ឆ្នាំ ២០២២ មានរយៈពេល ៣០ ថ្ងៃ ត្រូវអនុវត្តតាមនីតិវិធីដែលក្រសួងបានណែនាំ។ លោកថ្លែងថា៖ «សម្រាប់ជុំទី ៨ នេះគឺមានរយៈពេល ៣ ខែបន្តទៀតគឺខែមករា កុម្ភៈ មីនា។ នៅពេលជុំទី ៨ នេះ ត្រូវបានបញ្ចប់ រដ្ឋាភិបាលនឹងពិចារណាសម្រេចថា ត្រូវបន្តការឧបត្ថម្ភសាច់ប្រាក់នេះប៉ុន្មានជុំ ឬត្រូវបន្តបែបម៉េចទៀត»។ លោកបានឱ្យដឹងថា បច្ចុប្បន្ន គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ដែលកំពុងទទួលបានការឧបត្ថម្ភសាច់ប្រាក់មានចំនួនក្នុងរង្វង់ ៧០ ម៉ឺនគ្រួសារ ដែលចំនួននេះមានការកើនឡើង ឬធ្លាក់ចុះបន្តិចបន្តួចប៉ុណ្ណោះ អាស្រ័យទៅតាមស្ថានភាពជីវភាពរបស់ប្រជាពលរដ្ឋជាក់ស្ដែង។
លោក ចាន់នី បញ្ជាក់ថា៖ «គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ក្នុងរង្វង់ ៧០ ម៉ឺនគ្រួសារនេះ រដ្ឋាភិបាលបានចំណាយថវិកាឧបត្ថម្ភក្នុង ១ ខែៗ ជាង ៣០ លានដុល្លារ តាំងពីការចាប់ផ្ដើមអនុវត្ដរហូតមកដល់បច្ចុប្បន្ននេះ»។
ក្រសួងសង្គមកិច្ចបានណែនាំ នីតិវិធី មួយចំនួនលើការឧបត្ថម្ភសាច់ប្រាក់នេះ គឺចំពោះគ្រួសារដែលបានផ្ទៀងផ្ទាត់ទាំង ១៩ លើករួចហើយ សូមទៅបើកប្រាក់ឧបត្ថម្ភនៅតាមបញ្ជរវីងណាមួយដោយមិនតម្រូវឱ្យទៅសាលាឃុំ សង្កាត់ សាជាថ្មីទៀតទេ។ ចំពោះគ្រួសារក្រីក្រ និងងាយរងគ្រោះ ដែលមានបណ្ណសមធម៌មានជុំទី ១១ ទាំងអស់ត្រូវបានផុតសុពលភាពនៃការប្រើប្រាស់បណ្ណចាស់ ហើយដោយជំនួសមកវិញដោយបណ្ណជុំទី ១៤ វិញ ដែលករណីនេះ បើមិនមានការជូនដំណឹង ឬផ្តល់ព័ត៌មានពីរដ្ឋបាលឃុំ សង្កាត់ក្នុងការផ្តល់បណ្ណថ្មី ជុំទី ១៤ ទេនោះ មានន័យថា គ្រួសារដែលមានបណ្ណជុំទី ១១ នោះ មិនបានជាប់ជុំទី ១៨ បន្តទៀតទេ។
ចំពោះគ្រួសារក្រីក្រ និងងាយរងគ្រោះ ដែលមានបណ្ណសមធម៌មានជុំទី ១១ ដែលបានជាប់បន្ត ទៅជុំទី ១៤ ត្រូវយកបណ្ណថ្មី ដែលផ្តល់ដោយរដ្ឋបាល ឃុំ សង្កាត់ ដើម្បីយកទៅបើកសាច់ប្រាក់ ឧបត្ថម្ភនៅតាមបញ្ជរវីងដូចធម្មតា ដោយមិនតម្រូវឱ្យទៅផ្ទៀងផ្ទាត់ឡើងវិញនៅតាម ឃុំ សង្កាត់ នោះទេ លើកឡើងតែគ្រួសារដែលជាប់ថ្មីនៅជុំទី ១៤ ត្រូវទៅផ្ទៀងផ្ទាត់នៅតាម ឃុំ សង្កាត់ជាមុនសិន មុនទៅបើកប្រាក់នៅតាមបញ្ជរវីង។
ក្នុងករណីគ្រួសារក្រីក្រ និងងាយរងគ្រោះ ដែលមានបណ្ណសមធម៌ជុំទី ១១ មិនបានជាប់នៅជុំទី ១៤ បន្តទៀតតែបានផ្ទៀងផ្ទាត់រួចហើយនៅតាម ឃុំ សង្កាត់ និងមានលុយនៅសល់ក្នុងគណនីរបស់ខ្លួននោះអ្នកទទួលផលនៅអាចប្រើប្រាស់បណ្ណជុំទី ១១ ដើម្បីដកប្រាក់ដែលនៅសល់នោះ នៅគ្រប់បញ្ជរវីងបានតែអ្នកទទួលផលនោះ មិនបានទទួលការឧបត្ថម្ភបន្តទៀតទេ។
ក្នុងករណីមានការតវ៉ា ឬមានចម្ងល់របស់អ្នកទទួលផលដែលប្តូរជុំពីជុំទី ១១ ទៅជុំទី ១៤ នោះ ក្រសួងឱ្យទំនាក់ទំនងទៅរដ្ឋបាលឃុំ សង្កាត់ ឬ មន្ទីរផែនការ រាជធានី ខេត្ត។ ចំពោះគ្រួសារដែលបានផ្ទៀងផ្ទាត់ទាំង ៧ ជុំ (១៩ លើក) រួចហើយ លើកលែងតែជុំទី ១១ ដែលមិនបានជាប់ ជុំទី ១៤ ក្រសួងអញ្ជើញទៅបើកប្រាក់ឧបត្ថម្ភនៅតាមបញ្ជរវីងណាមួយដោយមិនតម្រូវឱ្យទៅសាលាឃុំ សង្កាត់ សាជាថ្មីទៀតទេ។ ចំណែកគ្រួសារក្រីក្រ និងងាយរងគ្រោះ ដែលមានបណ្ណសមធម៌មានសុពលភាពហើយមិនទាន់បានផ្ទៀងផ្ទាត់ទាំង ៧ ជុំ (១៩ លើក) និងគ្រួសារក្រីក្រ ដែលទើបទទួលបានបណ្ណសមធម៌ថ្មី ក្រសួងបានអញ្ជើញទៅផ្ទៀងផ្ទាត់នៅសាលា ឃុំ សង្កាត់ ដើម្បីទទួលបានការឧបត្ថម្ភប្រាក់ក្នុងជុំទី ៨ លើកទី ១ នេះ។
លោក អំ សំអាត នាយករងអង្គការលីកាដូលើកឡើងថា ការឧបត្ថម្ភសាច់ប្រាក់របស់រដ្ឋាភិបាលជូនគ្រួសារក្រីក្រ និងងាយរងគ្រោះជារឿងសំខាន់ក្នុងអំឡុងពេលការទប់ស្កាត់ ការរីករាលដាលនៃជំងឺកូវីដ ១៩ ព្រោះក្រុមគ្រួសារក្រីក្រត្រូវការជំនួយឧបត្ថម្ភពីរាជរដ្ឋាភិបាលដោយសារពួកគាត់បាត់បង់ចំណូលសេដ្ឋកិច្ចគ្រួសារ និងមុខរបរក្នុងអំឡុងពេលនេះ។
លោកថ្លែងថា៖ «ប៉ុន្តែបើយើងពិនិត្យមើលតាមបណ្តាញសង្គមមួយចំនួនដែលលើកឡើងពីការតវ៉ា និងភាពមិនប្រក្រតីមួយចំនួនក្នុងការវាយតម្លៃ និងកំណត់ក្នុងការចេញបណ្ណទទួលស្គាល់ដល់ក្រុមគ្រួសារក្រីក្រព្រោះគ្រួសារមួយចំនួន ដែលពួកគាត់យល់ថា គួរទទួលបានបណ្ណក្រីក្រតែពួកគាត់បែរជាមិនបានទទួលទៅវិញ»។
បើតាមក្រសួងសង្គមកិច្ចក្នុងករណីប្រជាពលរដ្ឋពិនិត្យឃើញមានភាពមិនប្រក្រតីណាមួយ ក្នុងការអនុវត្តកម្មវិធី ឬដកប្រាក់មិនបាននៅតាមបញ្ជរវីងនោះសូមទំនាក់ទំនងជាមួយអ្នកកាន់កម្មវិធីនៅតាមឃុំ សង្កាត់ ឬនៅមន្ទីរសង្គមកិច្ច ឬមន្ទីរផែនការ រាជធានី ខេត្តនីមួយៗ ឬតាមរយៈប្រព័ន្ធទូរស័ព្ទព័ត៌មានទាន់ហេតុការណ៍របស់នាយកដ្ឋានសុខុមាលភាពសង្គមលេខ (០៩២/០១៥) ២១៩ ៨៨៨៕
