.jpg)
លោក ស៊ុន សុវណ្ណរិទ្ធ ក្នុងសន្និសីទកាសែតថ្ងៃទី ២៥ មករា។ រូប RSU
កំពង់ឆ្នាំងៈ លោក ស៊ុន សុវណ្ណរិទ្ធ អភិបាលខេត្តកំពង់ឆ្នាំងបានថ្លែងថា ក្នុងរយៈពេល ១ ខែចុងឆ្នាំ ២០២១ រដ្ឋបាលខេត្តបានដោះស្រាយទំនាស់របស់ពលរដ្ឋបានជិត ៦០០ ករណីលើសំណុំរឿងជាង ៧០០ ករណី ដែលបានកើតឡើងនៅទូទាំងខេត្ត ខណៈអាជ្ញាធរបានរុះរើខ្ទមអនាធិបតេយ្យជាង ៥០ និងបង្គោលជាង ២០០ ក្នុងប្រតិបត្តិការស្តារព្រៃលិចទឹកក្នុងបឹងទន្លេសាប។
ការថ្លែងនេះបានធ្វើឡើងនៅក្នុងសន្និសីទសារព័ត៌មាន ស្ដីពីវឌ្ឍនភាពមូលដ្ឋានឃុំ សង្កាត់ និងទិសដៅការងារបន្ដរបស់រដ្ឋបាលខេត្តកំពង់ឆ្នាំង ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនៅថ្ងៃទី ២៥ ខែមករា ឆ្នាំ ២០២២ នាទីស្ដីការគណៈរដ្ឋមន្ត្រី។
លោក ស៊ុន សុវណ្ណរិទ្ធ បានឱ្យដឹងថា មកដល់ពេលនេះមានប្រជាពលរដ្ឋនៅក្នុងខេត្តកំពង់ឆ្នាំងប្រមាណ ៧ ៥៣១ នាក់ ដែលបានចូលខ្លួនដោយស្ម័គ្រចិត្តប្រគល់ដីក្នុងតំបន់ ៣ លើផ្ទៃដីជាង ៣០ ៥៨៩ ហិកតាឱ្យរដ្ឋគ្រប់គ្រងវិញ ដើម្បីស្តារព្រៃលិចទឹកក្នុងតំបន់បឹងទន្លេសាប។ បន្ថែមពីនេះ លោក ស៊ុន សុវណ្ណារិទ្ធ បញ្ជាក់ថា ក្នុងយុទ្ធនាការនៃការដកហូតដីលិចទឹកនេះ គឺអាជ្ញាធរបានរុះរើខ្ទមដែលសាងសង់អនាធិបតេយ្យបាន ១០០ ភាគរយចំនួន ៥៥ ខ្ទម និងបានដកបង្គោលព្រំដីអនាធិបតេយ្យចំនួន ២២៣ បង្គោលនៅក្នុងតំបន់ ៣ ជាស្ថាពរផងដែរ។
លោកបានបញ្ជាក់ថា៖ «ផលប្រយោជន៍ដែលរដ្ឋាភិបាលធ្វើនេះ គឺធ្វើដើម្បីប្រជាពលរដ្ឋ ១៦ លាននាក់។ អត់ធ្វើបាបប្រជាពលរដ្ឋទេ គឺធ្វើដើម្បីប្រជាពលរដ្ឋ ដែលបានទទួលផលមកវិញ។ យើងធ្វើពេលនេះ គឺបានផលព្រៃឈើមកវិញ...យើងបានត្រីមកវិញ និងផលអ្វីៗផ្សេងទៀត។ ជាពិសេសនោះ គឺបានផលពីវិស័យទេសចរណ៍»។
បើតាមលោក ស៊ុន សុវណ្ណរិទ្ធ រដ្ឋបាលខេត្តបានដាំដើមឈើឡើងវិញក្នុងតំបន់ដែលបានដកហូតជាង ១០ ម៉ឺនដើម និងគ្រាប់ ដោយក្នុងនោះដើមត្នោតជាង ៨ ម៉ឺនគ្រាប់ ដាំតាមបន្ទាត់ព្រំជុំវិញតំបន់ ២ និងតំបន់ ៣ នៃបឹងទន្លេសាប ខណៈប្រភេទព្រៃលិចទឹកដាំបានជាង ២ ម៉ឺនដើម។
បន្ថែមពីនេះលោក សុវណ្ណរិទ្ធ ក៏បានប្រកាសទុកពេលឱ្យពលរដ្ឋចំនួន ២ សប្តាហ៍បន្ថែមទៀត ដើម្បីចូលរួមដោយស្ម័គ្រចិត្តប្រគល់ដីព្រៃលិចទឹកនេះ មកឱ្យអាជ្ញាធរដែនដីវិញចៀសវាងទទួលរងទណ្ឌកម្មតាមច្បាប់ក្នុងករណីអាជ្ញាធរខេត្តដាក់ចេញវិធានការក្តៅ។
ជាមួយនឹងចំណាត់ការនៅបឹងទន្លេសាបលោក សុវណ្ណរិទ្ធ ក៏បានឱ្យដឹងដែរថា ចំពោះកិច្ចការងារដោះស្រាយវិវាទក្រៅប្រព័ន្ធតុលាការ ដែលអាជ្ញាធរទូទាំងខេត្តទទួលបានទូទាំង ៨ ក្រុង ស្រុកជាង ៧០០ ករណី គឺត្រូវបានដោះស្រាយបានជិត ៦០០ ករណីក្នុងរយៈពេល ១ ខែ។
លោកបញ្ជាក់ថា ក្រុមការងារដោះស្រាយទំនាស់ដែលថ្នាក់ខេត្តបានបង្កើតនេះ គឺមានគោលដៅក្នុងការដោះស្រាយបញ្ហារបស់ប្រជាពលរដ្ឋនៅតាមមូលដ្ឋាន និងត្រូវចុះទៅដោយផ្ទាល់ ដោយមិនឱ្យប្រជាពលរដ្ឋចំណាយពេលវេលា និងថវិកាឡើងមកថ្នាក់ខេត្តនោះទេ។
កាលពីថ្ងៃទី ២៨ ខែវិច្ឆិកា លោកនាយករដ្ឋមន្ត្រី ហ៊ុន សែន បានចេញបទបញ្ជាយ៉ាងម៉ឺងម៉ាត់ឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាបធ្វើការទប់ស្កាត់ និងបង្ក្រាបជាបន្ទាន់ ចំពោះការលួចកាប់ទន្ទ្រានព្រៃលិចទឹក និងវាតទីយកដីនៅតាមបឹងទន្លេសាប។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបាននិយាយថា បញ្ហាបឹងទន្លេសាប គឺជាបញ្ហារួមរបស់ប្រជាពលរដ្ឋខ្មែរទាំងអស់គ្នា ព្រោះវាជាកន្លែងសម្រាប់មច្ឆជាតិ និងប្រព័ន្ធអេកូឡូស៊ីដ៏សំខាន់របស់ប្រទេសកម្ពុជា។ ដូច្នេះការបំពានទៅលើដីព្រៃលិចទឹក ឬបឹងទន្លេសាប គឺជាការបំផ្លាញផលប្រយោជន៍រួមរបស់កម្ពុជាដែលទាមទារឱ្យមានការចាត់វិធានការច្បាស់លាស់ និងចូលរួមយកចិត្តទុកដាក់ពីអ្នកពាក់ព័ន្ធ ជាពិសេសពលរដ្ឋទូទៅ ដើម្បីចូលរួមថែរក្សាទ្រព្យសម្បត្តិទាំងអស់នេះ។
លោកបានបញ្ជាក់ថា៖ «ខ្ញុំយល់ថា ការឆ្លើយតបរបស់រដ្ឋបាលខេត្តកំពង់ឆ្នាំងពេលនេះ គឺជាការឆ្លើយតបមួយដែលអាចនិយាយបានថា យឺតពេលក៏ថាបាន ឬទាន់ពេលក៏ថាបាន។ ក៏ប៉ុន្តែរឿងដែលខ្ញុំថា យឺតពេលនោះ គឺវិធានការមួយដែលកើតឡើងក្រោយអន្តរាគមន៍របស់នាយករដ្ឋមន្ត្រី អ៊ីចឹងទំហំនៃការបំពានគឺច្រើនបាត់ទៅហើយ»៕
