.jpg)
ទីតាំងដីដែលត្រូវបានឈូសឆាយស្ថិតក្នុងភូមិបារុង ស្រុកល្វាឯម ខេត្តកណ្ដាល។ រូបថត ហ្វេសប៊ុក
កណ្តាលៈ អាជ្ញាធរស្រុកល្វាឯមរួមនឹងអាជ្ញាធរឃុំបារុង និងមន្ត្រីជំនាញវប្បធម៌ នៅថ្ងៃទី ២៥ មករា បានចុះទៅពិនិត្យមើលជាក់ស្តែងនៅទីតាំងស្ថាននីយទួលបុរាណស្ថិតក្នុងភូមិបារុង ឃុំបារុង ស្រុកល្វាឯម ខេត្តកណ្តាល បន្ទាប់ពីទទួលព័ត៌មានថា មានអ្នកលក់ដូរដីទួលបុរាណ និងដាក់គ្រឿងចក្រចូលឈូសឆាយស្ថានីយបុរាណនោះ។
លោក ឌី ខេង ប្រជាពលរដ្ឋនៅភូមិបារុង ឃុំបារុង ស្រុកល្វាឯម ខេត្តកណ្តាល ប្រាប់នៅថ្ងៃទី ២៥ ខែមករា ថា ទីទួលសុវត្ថិភាពនេះមានតាំងពីបុរាណមកមិនដែលមានការឈូសឆាយទេ។ អ្នកភូមិរក្សាទុកដើម្បីប្រើប្រាស់រួម ដូចជាសំចតពេលទឹកជំនន់ ឬក៏ពេលណាត្រូវការដាក់គោក្របីសម្រាកពេលធ្វើស្រែនៅក្បែរទីទួលនោះ។ លោកថា ក្នុងចុងសប្តាហ៍កន្លងទៅនេះ ស្រាប់តែមានការឈូសឆាយដោយប្រើគ្រឿងចក្រ ទើបពលរដ្ឋរាយការណ៍ទៅអាជ្ញាធរសុំអន្តរាគមន៍ចុះពិនិត្យមើលជាក់ស្តែងដើម្បីការពារទីទួលនោះ សម្រាប់ប្រើប្រាស់ទាំងអស់គ្នា។
លោកនិយាយថា៖ «ដីនោះជាដីរដ្ឋទាំងអស់ អត់មានអ្នកណាមានសិទ្ធិយកបានទេ ព្រោះកាលរដ្ឋអំណាចចែក គឺចែកតែដីស្រែទេ។ ចំណែកដីទីទួលហ្នឹងអត់បានចែកឱ្យអ្នកណាទេ។ នោះជាកន្លែងមួយដែលប្រជាជនប្រើប្រាស់ជាកន្លែងរួម»។
លោក ឌី ខេង ប្រាប់ថា ទីទួលនៅឃុំបារុងមានច្រើនកន្លែង ដែលពលរដ្ឋអាចប្រើប្រាស់នៅតាមភូមិរៀងខ្លួន ដែលទីទួលនោះនៅដាច់ៗក្បែរគ្នា។ រីឯទីទួលនៅភូមិរបស់លោកមានប្រជាពលរដ្ឋប្រមាណ ៤០០ គ្រួសារប្រើប្រាស់រួមគ្នា។ លោកថា មានប្រជាពលរដ្ឋម្នាក់បានលក់ដីនោះទៅឱ្យឈ្មួញ ដោយមានការទទួលស្គាល់ពីអាជ្ញាធរមូលដ្ឋានផងដែរ។
លោកថ្លែងថា៖ «បើនិយាយទៅ គេប្រើប្រាស់ទៅតាមភូមិ វាមានទីទួលផ្សេងៗដាច់ៗគ្នាច្រើន។ ប៉ុន្តែវានៅជិតគ្នារហូតទៅដល់ផ្នែកខាងលើនោះទើបជាទួលធំ ហើយកន្លែងដែលគេឈូសហ្នឹង គឺឈូសក្បែរទួលធំហ្នឹង ដែលវាជាទួលដែរ គឺទួលគេទុកសម្រាប់ប្រើប្រាស់តែម្តង»។
មេឃុំបារុងលោក នួន ចក់ ថ្លែងនៅថ្ងៃទី ២៥ ខែមករា ថា ការឈូសឆាយនោះ គឺប្រជាពលរដ្ឋធ្វើការឈូសឆាយលើដីកម្មសិទ្ធិផ្ទាល់ខ្លួន ដែលមិនប៉ះពាល់ដល់ទីតាំងទួលបុរាណនោះទេ។ លោកប្រាប់ថា មានការទិញលក់ដីនៅក្បែរនោះ ប៉ុន្តែមិនមែនការលក់ដីទួលបុរាណទេ។ ចំណែកការឈូសឆាយលើដីនោះមានចម្ងាយប្រមាណ ១៥០ ម៉ែត្រ ពីទីទួលបុរាណ។
លោកបន្តថា ទីទួលដែលជាដីរបស់រដ្ឋគ្មានអ្នកណាលក់ដូរនោះទេ ព្រោះទួលនោះ ពលរដ្ឋគ្រប់គ្នាសុទ្ធតែដឹងថាជាទួលបុរាណ ដែលពីដើមគេដាក់ឈ្មោះថា តំបន់ទួលសុវត្ថិភាពសម្រាប់សំចតពេលទឹកធំលិចភូមិ។ ក្រោយមកត្រូវបានក្រសួងវប្បធម៌ និងវិចិត្រសិល្បៈ ចុះបញ្ជីសារពើភណ្ឌរក្សាទុក។
លោកថ្លែងថា៖ «គេឈូសឆាយហ្នឹង គឺក្រៅពីទួលហ្នឹងទេ គ្រាន់តែវាប៉ះដំបូកមួយប្រហែល ១០ ម៉ែត្រ ដែលម្ចាស់ដីគេថែរក្សាមកអស់រយៈពេល ២០-៣០ ឆ្នាំមកហើយ។ ដំបូកហ្នឹង ជាទីដែលម្ចាស់គេដាក់ក្របី ដាក់ចំបើងអីហ្នឹង»។
អភិបាលស្រុកល្វាឯម លោក កន សុខកាយ ថ្លែងនៅថ្ងៃទី ២៥ មករា ថា ក្រោយពីទទួលព័ត៌មាននេះលោកក៏បានចាត់ឱ្យក្រុមការងារចុះទៅពិនិត្យដល់ទីតាំងជាក់ស្តែង។ ជាលទ្ធផល តាមសេចក្តីរាយការណ៍ពីក្រុមការងារបញ្ជាក់ថា ការឈូសឆាយនោះ គឺមិនបានប៉ះពាល់ដល់ទីតាំងស្ថានីយទួលបុរាណដែលក្រសួងវប្បធម៌រក្សាទុកនោះទេ។ លោកថា ពលរដ្ឋបានធ្វើការទិញ-លក់ដីស្រែជាលក្ខណៈឯកជន ហើយអ្នកដែលទិញដីនោះបានដាក់គ្រឿងចក្រចូលឈូសឆាយលើដីកម្មសិទ្ធិផ្ទាល់របស់ខ្លួន។
លោកអភិបាលស្រុកបញ្ជាក់ថា ក្រុមការងារបានរកឃើញថា អ្នកដែលបានឈូសឆាយដីនៅទីនោះ មិនបានសុំច្បាប់អនុញ្ញាតត្រឹមត្រូវ។ ហេតុនេះក្រុមការងារបានឱ្យធ្វើកិច្ចសន្យាផ្អាកជាបណ្តោះអាសន្ន ដើម្បីសុំច្បាប់ពីអាជ្ញាធរឱ្យបានត្រឹមត្រូវ។
លោកថ្លែងថា៖ «មិនមានការឈូសឆាយលើដីទួលបុរាណទេ ក្រុមការងារដែលបានចុះទៅបានរាយការណ៍មកខ្ញុំថា កន្លែងដែលដាក់គ្រឿងចក្រឈូសឆាយនោះគឺនៅឆ្ងាយពីទួលបុរាណ។ ប៉ុន្តែក្រុមការងារបានរកឃើញថា ការឈូសឆាយមិនមានច្បាប់ត្រឹមត្រូវទើបយើងណែនាំឱ្យគាត់ទៅសុំច្បាប់អនុញ្ញាតឱ្យបានត្រឹមត្រូវធ្វើយ៉ាងណាកុំឱ្យប៉ះពាល់ដល់ស្ថានីយទួលបុរាណ»។
បើតាមលោកស្រី មួង សារឹម ប្រធានមន្ទីរវប្បធម៌ និងវិចិត្រសិល្បៈខេត្តកណ្តាល ស្ថានីយទួលបុរាណនៅខេត្តកណ្តាលមានច្រើនកន្លែង។ គិតមកដល់បច្ចុប្បន្ន មានប្រមាណជាង ៥០០ ទួលដែលមានប្រភេទខុសគ្នា ក្នុងនោះស្ថានីយទួលបុរាណខ្លះជាទួលកប់សព។ ខ្លះជាទួលមនុស្ស រស់នៅ និងខ្លះទៀតជាទួលគ្រឹះប្រាសាទ។ ដោយឡែក កន្លែងដែលមានការឈូសឆាយថ្មីនេះ បន្ទាប់ពីក្រុមការងារមន្ទីរចុះទៅពិនិត្យដល់ទីតាំងជាមួយអាជ្ញាធរស្រុក ឃើញថា នៅឆ្ងាយពីជើងទួលបុរាណប្រមាណ ២០០ ម៉ែត្រ។ ហេតុនេះមិនមានការប៉ះពាល់អ្វីដល់ទួលបុរាណនោះទេ។
លោកស្រីប្រាប់ថា ការរក្សាទីទួលបុរាណ គឺទុកសម្រាប់ស្រាវជ្រាវ ដើម្បីដឹងពីប្រវត្តិអតីតកាល និងការរស់នៅរបស់អ្នកជំនាន់មុន ដែលមានតម្លៃជាប្រវត្តិសាស្ត្រមិនអាចកាត់ថ្លៃបាន។
លោកស្រី មួង សារឹម បានបញ្ជាក់ថា៖ «ទួលហ្នឹង គឺមានវត្ថុនៅក្នុងហ្នឹង បានវាមានទួលដែលខាងបុរាណវិទ្យា និងអ្នកជំនាញដែលចុះទៅការពារហ្នឹង ពិនិត្យដឹងថា វាមានបំណែកអីមួយដែលធ្វើឱ្យមានតឹកតាងនៅទីហ្នឹង។ អ៊ីចឹង គឺត្រូវរក្សាទុកមិនអាចបំផ្លាញចោលបានទេ»៕
