.jpg)
ការលោតម៉ុងសាយក្នុងពិធីបុណ្យចូលឆ្នាំចិននៅម្ដុំកីឡដ្ឋានអូឡាំពិក កាលពីឆ្នាំ ២០១៨។ ហុង មិនា
ភ្នំពេញៈ អភិបាលរាជធានីភ្នំពេញលោក ឃួង ស្រេង មិនអនុញ្ញាតឱ្យដុតផាវ កាំជ្រួច ឬការបង្កសំឡេងផ្ទុះគ្រប់ប្រភេទក្នុងពិធីបុណ្យចូលឆ្នាំថ្មីប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី ៣១ ខែមករា ដល់ថ្ងៃទី ៣ ខែកុម្ភៈ ឆ្នាំនេះ ហើយលោកក៏ហាមដាច់ខាតក្នុងការហែក្បួនផ្សេងៗដោយគ្មានការអនុញ្ញាត ព្រមទាំងបានព្រមានចំពោះជនណាដែលបង្កចលាចល និងធ្វើឱ្យខូចសណ្តាប់ធ្នាប់ក្នុងសង្គមនឹងទទួលទោសតាមច្បាប់ជាធរមាន។
រដ្ឋបាលរាជធានីភ្នំពេញបានណែនាំដល់មន្ទីរ អង្គភាព ខណ្ឌ សង្កាត់ សមាគម ក្រុមហ៊ុនឯកជន អង្គការក្រៅរដ្ឋាភិបាល និងសាធារណជនក្នុងរាជធានីភ្នំពេញពីការរៀបចំសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈដើម្បីរក្សាបាននូវសន្តិសុខ និងសុវត្ថិភាពក្នុងឱកាសបុណ្យចូលឆ្នាំថ្មីប្រពៃណីចិន និងវៀតណាមនៅដើមសប្តាហ៍ក្រោយ។
លោក ឃួង ស្រេង បានលើកឡើងក្នងសេចក្តីជូនដំណឹងចុះថ្ងៃទី ២៥ ខែមករា ដោយហាមដាច់ខាតនូវការដុតផាវ កាំជ្រួច ឬបង្កសំឡេងផ្ទះគ្រប់ប្រភេទក្នុងឱកាសពិធីបុណ្យនេះ និងការលេងល្បែងស៊ីសងគ្រប់ប្រភេទផងដែរ ជាពិសេសការហែក្បួនផ្សេងៗទាំងបែបសាសនា ឬប្រពៃណីដែលគ្មានការអនុញ្ញាត។
លោកបញ្ជាក់ថា៖ «នៅគ្រប់ទីកន្លែងកម្សាន្តសប្បាយនានាត្រូវអនុវត្តនូវវិធានសុខាភិបាលក្នុងការទប់ស្កាត់ការរីករាលដាលជំងឺកូវីដ ១៩ ជាពិសេសមេរោគបំប្លែងថ្មីអូមីក្រុង និងត្រូវរក្សាសន្តិសុខសុវត្ថិភាព សណ្តាប់ធ្នាប់សាធារណៈ សេចក្តីថ្លៃថ្នូរ និងត្រូវប្រុងប្រយ័ត្នក្នុងការអុជទៀនធូប ក្រដាសសែន ភ្លើងចង្ក្រាន ចរន្តអគ្គិសនី ដែលអាចបង្កឱ្យមានគ្រោះអគ្គិភ័យកើតឡើងជាយថាហេតុ»។
អភិបាលរូបនេះ បន្ថែមថា ចំពោះការដុតក្រដាសសែនត្រូវប្រើធុងដែក ឬឆ្នាំងដីដើម្បីដុតហាមដាច់ខាតមិនឱ្យដុតលើចិញ្ចើមផ្លូវ ឬទ្រូងផ្លូវសាធារណៈ។
ទន្ទឹមនឹងការដាក់បម្រាមទាំងនេះ លោក ឃួង ស្រេង ក៏ដាក់វិធានការដល់អាជ្ញាធរមានសមត្ថកិច្ចចាត់វិធានការម៉ឺងម៉ាត់កុំឱ្យមានការនាំចូលផាវ កាំជ្រួច ជាតិផ្ទុះគ្រប់ប្រភេទ និងត្រូវត្រួតពិនិត្យដកហូតវត្ថុទាំងនេះនៅគ្រប់ទីកន្លែងក្នុងរាជធានីភ្នំពេញចាប់ពីពេលនេះតទៅ។
លោកក៏បានស្នើដល់មន្ទីរធម្មការ និងសាសនារាជធានីភ្នំពេញត្រូវអញ្ជើញបណ្តាសមាគមចិន និងវៀតណាម ដើម្បីផ្សព្វផ្សាយនូវខ្លឹមសារទាំងនេះឱ្យបានទូលំទូលាយ ហើយរដ្ឋបាលខណ្ឌទាំង ១៤ មន្ទីរ និងអង្គភាពជុំវិញរដ្ឋបាលរាជធានីភ្នំពេញត្រូវផ្សព្វផ្សាយណែនាំដល់មន្ត្រីរាជការ កងកម្លាំងក្រោមឱវាទ និងពលរដ្ឋក្នុងមូលដ្ឋានឱ្យអនុវត្តតាមការណែនាំនេះឱ្យមានប្រសិទ្ធភាព។
លោក ឃួង ស្រេង បានសង្កត់ធ្ងន់ថា៖ «ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងបញ្ជាការដ្ឋានយោធភូមិភាគពិសេសត្រូវចេញបទបញ្ជាឱ្យម៉ឺងម៉ាត់ដល់កម្លាំងរបស់ខ្លួន ដើម្បីអនុវត្តឱ្យមានប្រសិទ្ធភាពហើយជនណាបំពានលើសេចក្តីណែនាំនេះ ឬប្រព្រឹត្តល្មើសបង្កឱ្យមានចលាចលក្នុងសង្គម បាត់សណ្តាប់ធ្នាប់ សន្តិសុខ សុវត្ថិភាព និងរបៀបរៀបរយសាធារណៈត្រូវទទួលទោសតាមច្បាប់ជាធរមាន»។
ដោយឡែក លោក ប្រាក់ វិចិត្រ អភិបាលស្រុកមណ្ឌលសីមា ខេត្តកោះកុងបានឱ្យដឹងថា លោកបានណែនាំទាក់ទងនឹងការរក្សាសន្តិសុខ សុវត្ថិភាព និងសណ្តាប់ធ្នាប់នាឱកាសបុណ្យចូលឆ្នាំប្រពៃណីចិន-វៀតណាម ក្នុងស្រុករបស់លោកផងដែរ ។
លោកបានថ្លែងថា៖ «ត្រូវគោរពច្បាប់ស្តីពីចរាចរណ៍ផ្លូវគោកថ្មី និងមិនត្រូវបើកបរក្នុងស្ថានភាពស្រវឹងដើម្បីចៀសវាងគ្រោះថ្នាក់ផ្សេងៗពិសេសត្រូវបង្ការទប់ស្កាត់គ្រោះអគ្គិភ័យដោយប្រុងប្រយ័ត្ន និងម្ចាស់ការខ្ពស់ចំពោះភ្លើងទៀន ធូប ភ្លើងចង្ក្រាន ចរន្តអគ្គិសនី និងការដុតក្រដាសសែនដើម្បីរក្សាបានទ្រព្យសម្បត្តិអាយុជីវិតផ្ទាល់ខ្លួន និងអ្នកដទៃ»។
លោក ប្រាក់ វិចិត្រ ក៏បានហាមដាច់ខាតចំពោះការលេងល្បែងស៊ីសង អុជផាវ និងហាមដាច់ខាតចំពោះការលក់ ការនាំចូលផាវ គ្រឿងផ្ទុះគ្រប់ប្រភេទ និងហាមហែក្បួនផ្សេងៗដែលគ្មានច្បាប់អនុញ្ញាតផងដែរ៕
វីដេអូ៖
