ភ្នំពេញៈ ក្រុមសង្គមស៊ីវិលចំនួន ១៣ ស្ថាប័ន និងអ្នកជំនាញជួបជជែកគ្នាពីបញ្ហាប្រឈម និងការវិវឌ្ឍជុំវិញសិទ្ធិឌីជីថល និងសេរីភាពអ៊ីនធឺណិតនៅកម្ពុជាដោយរំពឹងថា រដ្ឋាភិបាលបន្តបើកចំហ និងធានាដល់សិទ្ធិទាំងនេះដល់អ្នកប្រើប្រាស់ ខណៈការវិវឌ្ឍថ្មីៗនៃបច្ចេកវិទ្យាក្នុងពេលបច្ចុប្បន្នត្រូវមានការរួមគ្នាដោះស្រាយ។
ការជជែកពិភាក្សានេះបានធ្វើឡើងក្នុងសន្និសីទថ្នាក់ជាតិស្តីពី «សិទ្ធិឌីជីថល និងសេរីភាពអ៊ីនធឺណិតនៅកម្ពុជា» ដែលរៀបចំដោយក្រុមការងារស្តីពីសិទ្ធិឌីជីថល ដែលជាបណ្តុំនៃអង្គការសង្គមស៊ីវិលចំនួន ១៣ ស្ថាប័នកាលពីថ្ងៃទី ២៦ មករា នៅសណ្ឋាគារហ៊ីម៉ាវ៉ារី រាជធានីភ្នំពេញ និងតាមប្រព័ន្ធហ្ស៊ូម។
ក្នុងសន្និសីទនេះមានការចូលរួមជជែកពិភាក្សាពីអ្នកជំនាញមកពីស្ថាប័នរដ្ឋាភិបាល សង្គមស៊ីវិល និងវិស័យឯកជន ដែលមានបទពិសោធពាក់ព័ន្ធនឹងសិទ្ធិឌីជីថល និងអ៊ីនធឺណិតនៅកម្ពុជាទៅលើប្រធានបទសំខាន់ៗចំនួន ៣ គឺការលើកកម្ពស់សិទ្ធិឌីជីថល និងការការពារឯកជនភាព ស្មារតីសាមគ្គីភាព និងសំឡេងរួម ដើម្បីសេរីភាពអ៊ីនធឺណិតនៅកម្ពុជា និងលម្ហសង្គមស៊ីវិល និងភាពជាដៃគូ ដើម្បីការពារសិទ្ធិឌីជីថល និងសេរីភាពអ៊ីនធឺណិត។
លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) បានថ្លែងក្នុងឱកាសនោះថា ការរីកចម្រើនវិស័យឌីជីថល និងអ៊ីនធឺណិតធ្វើឱ្យសាធារណជន មានលទ្ធភាពក្នុងការផ្តល់ព័ត៌មាន ការទទួលបានព័ត៌មាន និងមានទំនាក់ទំនងកាន់តែទូលំទូលាយ។ ប៉ុន្តែការរីកចម្រើនក្នុងវិស័យនេះ គឺជាបញ្ហាមួយដែលទាមទារឱ្យគ្រប់ភាគី ជាពិសេសរដ្ឋាភិបាលត្រូវយកចិត្តទុកដាក់ និងធ្វើយ៉ាងណាធានាឱ្យបានសិទ្ធិ និងសេរីភាពក្នុងកាប្រើប្រាស់របស់ប្រជាពលរដ្ឋ។ លោកបញ្ជាក់ថា កន្លងមកលោកសង្កេតឃើញសេរីភាព និងការរឹតត្បិតមួយចំនួនបានកើតឡើងជាបន្តបន្ទាប់។
លោកបានបញ្ជាក់ថា៖ «ការរីកចម្រើនផ្នែកឌីជីថលនេះ គឺមានផលប្រយោជន៍ធំធេង។ ដូច្នេះចំពោះខ្ញុំ ទាំងរដ្ឋាភិបាល ទាំងម្ចាស់ជំនួយ ឬដៃគូផ្សេងៗ គួរតែផ្តោតនូវការខិតខំទៅលើការវិនិយោគវិស័យឌីជីថល និងអ៊ីនធឺណិតនេះលើហេដ្ឋារចនាសម្ព័ន្ធ ដោយធ្វើយ៉ាងណាពង្រីកនូវសេវាក្នុងការទទួលបានអ៊ីនធឺណិតឱ្យបានទូលំទូលាយដល់ពលរដ្ឋខ្មែរ»។
លោកបានបន្ថែមថា៖ «ភាគីពាក់ព័ន្ធ គួរតែផ្តោតលើការកសាងសមត្ថភាព ជាពិសេសក្នុងចំណោមយុវជនក្នុងការប្រើប្រាស់នូវបច្ចេកវិទ្យាថ្មីៗនេះ ដែលមានប្រយោជន៍សំខាន់ ហើយក្រៅពីការកសាងសមត្ថភាព យើងក៏មិនត្រូវមើលរំលងផងដែរពីប្រព័ន្ធសុវត្ថិភាព»។
ក្នុងឱកាសនោះដែរ លោកស្រី ស៊ិន ពុទ្ធារី នាយិកាប្រតិបត្តិអង្គការគណៈកម្មាធិការសហប្រតិបត្តិការដើម្បីកម្ពុជាបានលើកឡើងដែរថា សន្និសីទថ្នាក់ជាតិលើប្រធានបទក្នុងពេលនេះ គឺមានសារៈសំខាន់ខ្លាំងណាស់ ក្នុងពេលដែលបច្ចេកវិទ្យាទំនើបបានកើតមានឡើងយ៉ាងផុសផុលក្នុងជីវិតប្រចាំថ្ងៃ។ លោកស្រីក៏បានបញ្ជាក់ដែរថា ការជជែកពិភាក្សាក្នុងពេលនេះរបស់អ្នកពាក់ព័ន្ធនឹងផ្តល់ឱកាសរួមគ្នា ដើម្បីអាចឆ្លើយតបទៅនឹងបញ្ហានានាពាក់ព័ន្ធនឹងបច្ចេកវិទ្យាទាំងនេះក្នុងពេលខាងមុខ។
លោកស្រីថ្លែងថា៖ «តាងនាមឱ្យក្រុមការងារផ្នែកឌីជីថលដែលមិនមែនរដ្ឋាភិបាល គឺយើងចង់លើកកម្ពស់បរិយាកាសអំណោយផល លម្ហសង្គមស៊ីវិល ក៏ដូចជាកិច្ចសហប្រតិបត្តិការជាមួយភាគីពាក់ព័ន្ធមានខាងក្រសួង មានដៃគូអភិវឌ្ឍន៍ ហើយនិងវិស័យឯកជន។ យើងចង់ឃើញប្រព័ន្ធអ៊ីនធឺណិតមួយ ដែលយើងទាំងអស់គ្នាអាចបញ្ចេញនូវសេរីភាពស្របទៅតាមគតិយុត្តជាតិ អន្តរជាតិរបស់ប្រទេសកម្ពុជាយើង»។
លោកស្រី ពុទ្ធារី ក៏បានអះអាងថា ដើម្បីចូលរួមក្នុងការដោះស្រាយបញ្ហាប្រឈមនានាជុំវិញការរីកចម្រើនវិស័យឌីជីថល និងអ៊ីនធឺណិតនេះក្រុមការងារទាំង ១៣ ស្ថាប័ន ក៏បានរួមគ្នាធ្វើយុទ្ធនាការតាមបណ្តាញសង្គម និងការស្រាវជ្រាវ ការអប់រំផ្សព្វផ្សាយពាក់ព័ន្ធទៅលើអនុក្រឹត្យស្តីពីការបង្កើតច្រកទ្វារអ៊ីនធឺណិត និងសេចក្តីព្រាងច្បាប់នានាពាក់ព័ន្ធបច្ចេកវិទ្យាផងដែរ។ លោកស្រីបន្តថា នៅពេលប្រមូលធាតុចូលគ្រប់គ្រាន់ហើយ ក្រុមការងារទាំង ១៣ ស្ថាប័ននឹងដាក់ជូនក្រសួងប្រៃសណីយ៍ និងទូរគមនាគមន៍សម្រាប់ជាធាតុចូលមួយក្នុងការតាក់តែងច្បាប់នៅកម្ពុជា។
លោក សូ វិសុទ្ធី អ្នកនាំពាក្យក្រសួងប្រៃសណីយ៍ និងទូរគមនាគមន៍ពីម្សិលមិញ មិនអាចសុំអត្ថាធិប្បាយជុំវិញកិច្ចជជែក និងសំណើរបស់មន្ត្រីសង្គមស៊ីវិលបានទេ ដោយលោកអះអាងថា កំពុងជាប់រវល់។
តាមតួលេខ ដែលចេញផ្សាយដោយនិយតករទូរគមនាគមន៍កម្ពុជា គិតត្រឹមឆមាសទី ១ ឆ្នាំ ២០២០ កម្ពុជាមានអ្នកប្រើប្រាស់ទូរស័ព្ទចល័តសរុបជាង ២០ លានស៊ីមកាត ខណៈអ្នកប្រើប្រាស់អ៊ីនធឺណិតមានសរុបជាង ១៥ លាននាក់ ហើយក្នុងនោះអ្នកប្រើប្រាស់គណនី Facebook សរុបជាង ១០លានគណនី៕