.jpg)
ទីស្នាក់ការដែនជម្រកសត្វព្រៃភ្នំឱរ៉ាល់ និងផែនទីបង្ហាញទីតាំងដែលត្រូវដកហូត។រូប រដ្ឋបាលខេត្តកំពង់ស្ពឺ
កំពង់ស្ពឺៈ អាជ្ញាធរខេត្តកំពង់ស្ពឺប្រកាសបដិសេធ ហើយនឹងដកហូតដីព្រៃឈើ ចំនួន ៧៨៤ ហិកតាស្ថិតក្នុងដែនជម្រកសត្វព្រៃភ្នំឱរ៉ាល់ត្រង់ចំណុចភូមិត្រាង និងភូមិចំបក់ ឃុំត្រពាំងជោរ ស្រុកឱរ៉ាល់ យកមកជាសម្បត្តិរដ្ឋវិញ ដោយទុកពេល ១ ខែសម្រាប់ការតវ៉ា។
លោក វ៉ី សំណាង អភិបាលខេត្តកំពង់ស្ពឺថ្លែងនៅថ្ងៃទី ២៦ មករាថា អាជ្ញាធរខេត្តបានចេញដីកាបដិសេធ និងដកហូតដីព្រៃឈើចំនួន ៧៨៤ ហិកតាក្នុងដែនជម្រកសត្វព្រៃភ្នំឱរ៉ាល់។ ដីព្រៃដែលស្ថិតក្នុងដីកាដកហូតនោះមាន ២ទីតាំង គឺស្ថិតក្នុងភូមិត្រាង និងភូមិចំបក់ ឃុំត្រពាំងជោរ បន្ទាប់ពីពិនិត្យឃើញថា ដីនោះទទួលរងនូវការកាន់កាប់ រុករាន ទន្ទ្រានដើម្បីវាតយកដីធ្វើកម្មសិទ្ធិដោយខុសច្បាប់។
លោកអភិបាលខេត្តបានឱ្យដឹងថា ដីដែលបានចេញដីកាដកហូតនោះ គឺត្រូវរក្សាទុកជាសម្បត្តិរដ្ឋ ដោយមិនអនុញ្ញាតឱ្យមានការទន្ទ្រានកាន់កាប់ទៀតឡើយ។ ប៉ុន្តែទោះយ៉ាងណា រដ្ឋបាលខេត្តទុករយៈពេល ១ ខែឱ្យអ្នកពាក់ព័ន្ធធ្វើការតវ៉ា ដោយយកបណ្ណមកបង្ហាញ ប្រសិនបើប្រាកដថា ដីមានបណ្ណត្រឹមត្រូវ។
លោកថ្លែងថា៖ «យើងទុកពេលឱ្យគាត់ ១ ខែ ដើម្បីឱ្យគាត់តវ៉ា ព្រោះអ្នកខ្លះគាត់ថា ដីគាត់មានបណ្ណអ៊ីចឹងទៅណា។ បណ្ណហ្នឹងជួនកាលជាបណ្ណកាលពីជំនាន់សូន្យមួយសូន្យអីឯណោះ។ អ៊ីចឹង អាហ្នឹងក៏យើងមិនត្រូវដកហូតរបស់គេដែរ ព្រោះវាជាដីស្របច្បាប់»។
មេឃុំត្រពាំងជោរ លោក ទេព ណែម ថ្លែងនៅថ្ងៃទី ២៦ មករាថា លោកនឹងបើកការប្រជុំឱ្យក្រុមការងារចុះធ្វើការផ្សព្វផ្សាយជូនប្រជាពលរដ្ឋឱ្យបានជ្រាបកាន់តែ ច្បាស់បន្ថែមទៀតទៅកាន់ពលរដ្ឋពាក់ព័ន្ធនៅតំបន់ដី ដែលមានដីកាដកហូតនេះ។ លោកប្រាប់ថា មិនបានដឹងច្បាស់អំពីចំនួនប្រជាពលរដ្ឋប៉ុន្មាននៅលើទីតាំងដីដែលមានដីកាដកហូតនោះទេ។ ប៉ុន្តែបើតាមការប៉ាន់ស្មានមានប្រជាពលរដ្ឋប្រមាណ ២០ គ្រួសារនៅទីនោះ បានធ្វើការឈូសឆាយបន្តិចបន្តួច តែមិនមានការដាំដុះ ឬធ្វើសំណង់រឹងមាំអ្វីឡើយ។
លោកថ្លែងថា៖ «ដីដែលមានដីកាដកហូតហ្នឹង កន្លែងខ្លះក៏មានពលរដ្ឋនៅ ខ្លះក៏អត់អ៊ីចឹងទៅ។ ព្រោះដីនោះ ជាដីព្រៃរបស់រដ្ឋ ហើយខ្ញុំនឹងផ្សព្វផ្សាយបន្ថែមឱ្យពួកគាត់បានដឹងច្បាស់ពីការដកហូតដីនេះ ព្រោះតាំងពីចេញដីកា ខ្ញុំមិនទាន់បានផ្សព្វផ្សាយទៅដល់គាត់នៅឡើយទេ»។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) គាំទ្រចំពោះការខិតខំប្រឹងប្រែងរបស់រដ្ឋបាលខេត្តកំពង់ស្ពឺ ដែលបានចេញដីកាដកហូតដីស្ថិតនៅភូមិត្រាង និងភូមិចំបក់ ឃុំត្រពាំងជោរ ស្រុកឱរ៉ាល់នេះ។
លោកប្រធានអង្គការលើកឡើងថា តាមការកត់សម្គាល់របស់លោក ការដកហូតដី គឺមានជាបន្តបន្ទាប់ជាច្រើនមកហើយ ប៉ុន្តែការអនុវត្តជាក់ស្តែង ដើម្បីមានមូលដ្ឋានគ្រប់គ្រងដីរដ្ឋ ដែលបានដកហូតនោះឱ្យមានប្រសិទ្ធភាពនៅមានកង្វះខាតច្រើន។ នេះដោយសារអាជ្ញាធរ និងមន្ត្រីជំនាញមិនបានអនុវត្តច្បាប់ស្តីពីតំបន់ការពារធម្មជាតិ ដែលជាហេតុធ្វើឱ្យជនប្រព្រឹត្តបទល្មើសនៅតែបន្តធ្វើសកម្មភាពជាបន្តបន្ទាប់នៅលើដីកាដកហូត។
លោកបានបញ្ជាក់ថា៖ «គាត់នៅតែលក់ នៅតែធ្វើសកម្មភាពដាំដុះ សាងសង់លំនៅឋានលើទីតាំងដី ដែលមានដីកាដកហូត។ បើយើងមិនតាមដាន មិនអនុវត្តឱ្យបានច្បាស់លាស់ទេស្មើនឹងអត់ប្រយោជន៍ទេ ដីកាដកហូតហ្នឹង គឺអត់មានប្រសិទ្ធភាព។ អ៊ីចឹងដើម្បីអនុវត្តឱ្យមានប្រសិទ្ធភាព មានដីកាដកហូតហើយ ត្រូវអនុវត្តដីកាដកហូត។ អ្នកដែលប្រឆាំងត្រូវបញ្ជូនសំណុំរឿងទៅតុលាការចាត់ការតាមច្បាប់»។
ទោះយ៉ាងណាក៏ដោយ លោក ទេព ណែម មេឃុំត្រពាំងជោរ បានអះអាងថា អាជ្ញាធរមិនបានព្រងើយកន្តើយបណ្តោយឱ្យជនប្រព្រឹត្តបទល្មើសចូលទន្ទ្រានកាន់កាប់លើដីដែលមានដីកាដកហូតនោះទេ។ នៅពេលដែលមានពលរដ្ឋចូលទៅទន្ទ្រាន អាជ្ញាធរតែងតែធ្វើការសម្របសម្រួលណែនាំដោយសន្តិវិធី។ លុះត្រាតែណែនាំច្រើនដងហើយ មិនស្តាប់ ទើបសហការជាមួយមន្ត្រីជំនាញ និងមន្ត្រីនគរបាលយុត្តិធម៌អនុវត្តច្បាប់តាមសភាពជាក់ស្តែង៕
