.jpg)
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងជំនួបជាមួយគណៈប្រតិភូក្រុមហ៊ុនជប៉ុនដឹកនាំដោយ Shu NISHIYAMA នាយកប្រតិបត្តិក្រុមហ៊ុន កាលពីថ្ងៃទី ២៥ ខែមករា។ រូបថត MPWT
ភ្នំពេញៈ គណៈប្រតិភូក្រុមហ៊ុនជប៉ុនបានណែនាំគ្រឿងចក្រប្រភេទថ្មី ដែលមានសមត្ថភាពអាចកែច្នៃសំរាមប្លាស្ទិកឱ្យទៅជាបេតុងកៅស៊ូ (AC) ដើម្បីនាំចូលសម្រាប់ប្រើប្រាស់លើការសាងសង់ផ្លូវនៅកម្ពុជា និងបានស្នើសុំឱ្យកម្ពុជាពិចារណាលើការប្រើប្រាស់បច្ចេកវិទ្យាថ្មីនេះ។
ការណែនាំ និងសំណើនេះត្រូវបានលើកឡើងនៅក្នុងជំនួបរវាងរដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល ទទួលជួបជាមួយគណៈប្រតិភូក្រុមហ៊ុនជប៉ុនដឹកនាំដោយ Shu NISHIYAMA នាយកប្រតិបត្តិក្រុមហ៊ុន ដោយមានការអមដំណើរពីជំនាញការទីភ្នាក់ងារសហប្រតិបត្តិការអន្តរជាតិជប៉ុន (JICA) កាលពីថ្ងៃទី ២៥ ខែមករានេះ។
ជាកិច្ចចាប់ផ្តើមលោក Shu NISHIYAMA បានណែនាំគ្រឿងចក្រប្រភេទថ្មី ដែលមានសមត្ថភាពអាចកែច្នៃសំរាមប្លាស្ទិកឱ្យទៅជាបេតុងកៅស៊ូ (AC) សម្រាប់ការសាងសង់ផ្លូវនៅកម្ពុជា និងបានស្នើសុំឱ្យក្រសួងពិចារណាលើការប្រើប្រាស់បច្ចេកវិទ្យាថ្មីនេះ ដោយហេតុថា វាមានលក្ខណៈសមស្របអាចប្រើប្រាស់បាននៅក្នុងស្ថានភាពប្រទេសកម្ពុជា ដែលសម្បូរទៅដោយភ្លៀងធ្លាក់រយៈពេលយូរអាចធានាបាននូវការជ្រាបទឹក និងធ្វើឱ្យផ្លូវជាប់រឹងមាំបានយូរអង្វែងផងដែរ។
ជាការឆ្លើយតប លោក ស៊ុន ចាន់ថុល បានណែនាំឱ្យក្រុមហ៊ុនពិនិត្យស្ថានភាពនៅកម្ពុជាឱ្យបានល្អិតល្អន់ មុននឹងសម្រេចលើការនាំចូលបច្ចេកវិទ្យាថ្មីនេះ ជាពិសេសពិនិត្យទៅលើសំរាមនៅកម្ពុជា ដែលមិនមានការបែងចែកប្រភេទសំរាម អាចបង្កជាបញ្ហាស្មុគស្មាញក្នុងការផ្គត់ផ្គង់សម្រាប់ដំណើរការកែច្នៃ និងការប្រមូលសំរាមផងដែរ។ ប៉ុន្តែទោះយ៉ាងណាក៏ដោយ លោករដ្ឋមន្ត្រីនៅតែបង្ហាញនូវការគាំទ្រលើគំនិតផ្ដួចផ្ដើមនៃការនាំយកមកប្រើប្រាស់នូវបច្ចេកវិទ្យាថ្មីនេះផងដែរ ដើម្បីចូលរួមថែរក្សាបរិស្ថានស្អាត។
លោក ស៊ុន ចាន់ថុល ក៏បានស្នើឱ្យក្រុមហ៊ុនធ្វើការសិក្សាឱ្យបានលម្អិតទាក់ទងនឹងបរិមាណប្លាស្ទិកនៅកម្ពុជាថាតើអាចផ្គត់ផ្គង់សម្រាប់ការកែច្នៃបានកម្រិតណា និងមិនឱ្យផលិតផលនោះលើសពីតម្លៃធ្វើពីបេតុងកៅស៊ូឡើយ។
លោកថា៖ «តម្លៃផលិតផលនោះមិនត្រូវឱ្យលើសថ្លៃបេតុងកៅស៊ូ (AC) ដែលកំពុងប្រើប្រាស់នាពេលបច្ចុប្បន្នទេ និងត្រូវសិក្សាអំពីបញ្ហាផលប៉ះពាល់បរិស្ថានដោយប្រៀបធៀបនឹងការប្រើប្រាស់បេតុងកៅស៊ូផងដែរ»។
លោកក៏បានស្នើ ឱ្យក្រុមហ៊ុនសហការឱ្យបានជិតស្និទ្ធជាមួយវិទ្យាស្ថានតេជោសែន សាធារណការ និងដឹកជញ្ជូន ដែលទើបបង្កើតថ្មី ដើម្បីសិក្សាលម្អិតអំពីការនាំយកបច្ចេកវិទ្យាថ្មីនេះមកប្រើប្រាស់នៅកម្ពុជា។
ស្ថាបនិកក្រៀលកម្ពុជាលោក ហួ ឆៃងន់ ថ្លែងថា ក្នុងករណីមានបច្ចេកវិទ្យាកែច្នៃសំរាមប្លាស្ទិកនៅកម្ពុជា គឺជារឿងមួយដ៏ល្អជួយលើកកម្ពស់សោភណភាពនៅក្នុងសង្គម កាត់បន្ថយផលប៉ះពាល់សុខភាព ជាពិសេសកាត់បន្ថយទៅលើកម្ដៅផែនដី។ ទី ១ ជួយសោភណភាពក្នុងប្រទេស នៅពេលមានការគ្រប់គ្រងប្លាស្ទិកបានល្អ មួយទៀតកាត់បន្ថយកម្ដៅផែនដី ព្រោះប្លាស្ទិកនៅលើដីនៅក្នុងទឹក ចង់មិនចង់ វាតែងតែបង្កផលប៉ះពាល់។
លោកថា ការគ្រប់គ្រងសំរាមប្លាស្ទិកនៅតាមផ្សារទំនើប តាមម៉ាត នាពេលបច្ចុប្បន្នមានលក្ខណៈល្អប្រសើរ ដែលវានឹងបង្កលក្ខណៈងាយស្រួលក្នុងការប្រមូល និងប្រគល់ជូនអ្នកជំនាញខាងអ្នកផលិត។
យោងតាមការសិក្សារបស់ក្រសួងបរិស្ថានបានឱ្យដឹងថា សព្វថ្ងៃការប្រើប្រាស់ប្លាស្ទិកមានការកើនឡើងជាគំហុកគិតចាប់តាំងពីការនាំចូលប្លាស្ទិកមក ប្រទេសកម្ពុជាជាង ២៥ ឆ្នាំមុន។ បច្ចុប្បន្ននេះ ថង់ប្លាស្ទិកប្រមាណ ១០ លានថង់ត្រូវបានប្រើប្រាស់ជារៀងរាល់ថ្ងៃនៅក្នុងទីក្រុងភ្នំពេញ ខណៈដែលប្រជាពលរដ្ឋកម្ពុជាម្នាក់ៗដែលរស់នៅក្នុងទីក្រុងនានា ប្រើប្រាស់ថង់ប្លាស្ទិកជាង ២ ០០០ ថង់ក្នុង ១ ឆ្នាំ។ ក្រសួងបរិស្ថានបន្តថា នៅក្នុងប្រទេសកម្ពុជា បើតាមរបាយការណ៍របស់អង្គការសត្វព្រៃ និងរុក្ខជាតិអន្តរជាតិ (Fauna & Flora International) ឆ្នាំ ២០១៩ ប្រជាពលរដ្ឋរស់នៅតាមតំបន់ឆ្នេរ ក្នុង ១ខ្នងផ្ទះប្រើប្រាស់ថង់ប្លាស្ទិកជាមធ្យមចំនួន ១២ ថង់ ក្នុង ១ ថ្ងៃ ហើយបរិមាណសំណល់ប្លាស្ទិកប្រមាណជា ៤៨ ភាគរយ ត្រូវបានបោះចោលចូលទៅក្នុងសមុទ្រ។
ប្រភពដដែលនេះបានឱ្យដឹងថា កំណើនបរិមាណសំណល់ប្លាស្ទិកបានបង្កការគំរាមកំហែងយ៉ាងធ្ងន់ធ្ងរដល់បរិស្ថាន ជីវចម្រុះ សុខភាពមនុស្ស និងសេដ្ឋកិច្ចជាតិ៕
