ព្រះសីហនុៈ ប្រជានេសាទសមុទ្រម្នាក់ ដែលបានបាត់ខ្លួនក្នុងឧបទ្ទវហេតុ ធ្លាក់ពីលើទូក ពេលកំពុងនេសាទត្រីនៅក្បែរកោះដូង ក្នុងភូមិសាស្ត្រ ឃុំកំពេញ ស្រុកស្ទឹងហាវ ខេត្តព្រះសីហនុ កាលពី ៣ ថ្ងៃមុននោះ ត្រូវបានគេប្រទះឃើញ សាកសពអណ្ដែតនៅលើផ្ទៃសមុទ្រ ក្នុងចម្ងាយប្រមាណ ៤០០ ម៉ែត្រ ពីកោះដូងនៅថ្ងៃទី ២៦ ខែមករា។
លោក រស់ កី អធិការស្រុកស្ទឹងហាវ បានប្រាប់ភ្នំពេញប៉ុស្តិ៍ថា សពបុរសរងគ្រោះឈ្មោះ ហ៊ូត ចាន់ អាយុ៤២ឆ្នាំ ជាប្រជានេសាទនៅភូមិអំពែង ឃុំអំពែង ស្រុកដំណាក់ចង្អើរខេត្តកែប។
កាលពីថ្ងៃទី២៣ ខែមករា កន្លងទៅនេះ ជនរងគ្រោះបានចុះទូកនេសាទ ជាមួយសាច់ញាតិក្នុងភូមិជាមួយគ្នា ហើយបានជួបឧបទ្ទវហេតុ ធ្លាក់ពីលើទូកនៅចំណុចទីតាំងខាងលើ ដោយសារតែរលកសមុទ្របោកខ្ទប់ទូកខ្លាំងពេក។
លោកថ្លែងថា៖«នៅថ្ងៃកើតហេតុ កម្លាំងសមត្ថកិច្ចយើង រួមសហការជាមួយក្រុមអន្តរាគមន៍សង្គ្រោះរបស់ក្រុមហ៊ុនលោកឧកញ៉ា ទៀ វិចិត្រ បានចេញឧប័រទៅរុករកជនរងគ្រោះផងដែរ ក្រោយទទួលបានសេចក្ដីរាយការណ៍ពីក្រុមគ្រួសារជនរងគ្រោះ ប៉ុន្តែដោយសារបញ្ហាអាកាសធាតុ ក្រុមសង្គ្រោះ មិនបានប្រទះឃើញជនរងគ្រោះនោះទេ»។
បើតាមការបញ្ជាក់របស់សាច់ញាតិជាម្ចាស់ទូក គឺលោក អ៊ុក ស៊ិន អាយុ៥០ឆ្នាំ បានបញ្ជាក់ថា ការប្រទះឃើញសពជនរងគ្រោះ គឺបន្ទាប់ពីពួកគាត់ បានរៀបចំពិធីសែនព្រេន ដល់ម្ចាស់ទឹកម្ចាស់ដីនៅតំបន់កោះដូង។
លោកថ្លែងថា៖«គាត់[ជនរងគ្រោះ]បានធ្លាក់ចូលទៅក្នុងសមុទ្រភ្លាម ពួកយើងបានចុះមុជរាវរកភ្លាមតែមិនឃើញ បន្ទាប់មកយើងខ្ញុំបានសុំអន្តរាគមន៍ ទៅកម្លាំងសមត្ថកិច្ចនគរបាល និងកម្លាំងអន្តរាគមន៍របស់លោក ឧកញ៉ាទៀ វិចិត្រ ឱ្យជួយរុករក ប៉ុន្តែ២ថ្ងៃមកនេះ នៅតែមិនអាចរកឃើញ។ លុះដល់ពួកយើងបាននាំគ្នាសែនព្រេន ដល់អារក្សសមុទ្រ ទើបឃើញសពអណ្ដែតឡើង»។
លោក ស៊ិន បានបញ្ជាក់ថា៖«ករណីនេះ បើមិនជឿក៏មិនកើតដែរ»។
យ៉ាងណាក៏ដោយ លោក រស់ កី បានមានប្រសាសន៍ថា ករណីនេះ វាគ្រាន់តែជាជំនឿមួយរបស់ក្រុមអ្នកនេសាទសមុទ្រប៉ុណ្ណោះ ពីព្រោះជាទូទៅមនុស្សដែលលង់ទឹកស្លាប់ គឺសាកសពនឹងត្រូវផុសអណ្ដែតទឹក ប្រសិនបើគ្មានការយាយីពីសត្វសមុទ្រ និង បើគ្មានករណីអ្វីផ្សេង ដែលពាក់ព័ន្ធនឹងអំពើឃាតកម្មទេនោះ។
លោកថ្លែងថា ក្រោយពីប្រទះឃើញសពជនរងគ្រោះ មន្ត្រីនគរបាលជំនាញ បានចុះទៅពិនិត្យកោសល្យវិច្ច័យសពជនរងគ្រោះ ប៉ុន្តែមិនឃើញមានស្លាកស្នាមណាមួយ ដែលជាប់ពាក់ព័ន្ធករណី ឃាតកម្មនោះទេ ទើបប្រគល់សពឱ្យទៅសាច់ញាតិនាំយកទៅធ្វើបុណ្យតាមប្រពៃណី និងបានឧបត្ថម្ភថវិការមួយចំនួនសម្រាប់រៀបចំពិធីបុណ្យសព្វជនរងគ្រោះនោះផងដែរ៕