.jpg)
(រាប់ពីឆ្វេង) លោក ម៉ុង ឫទ្ធី លោក គួច ចំរើន លោក ជា សុផារ៉ា និងលោក សុខ គង់។ រូបថត MLMUPC
ភ្នំពេញៈ រាជរដ្ឋាភិបាលគ្រោងសាងសង់ផ្លូវថ្មី ១ ខ្សែប្រវែង ២៧ គីឡូម៉ែត្រតភ្ជាប់ពីផ្លូវជាតិលេខ ៤ ឆ្ពោះទៅភ្នំបូកគោដោយទទួលបានថវិកាសាងសង់ពីលោក សុខ គង់ អ្នកវិនិយោគរមណីយដ្ឋានភ្នំបូកគោ ដោយផ្លូវ ១ ខ្សែនេះនឹងត្រូវឆ្លងកាត់តាមដីសម្បទានសេដ្ឋកិច្ចចម្ការដូងប្រេងរបស់លោក ម៉ុង ឫទ្ធី ដែលជាអ្នកជំនួញល្បីឈ្មោះម្នាក់។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការដោះស្រាយទំនាស់ដីធ្លីបានឱ្យដឹងនៅលើទំព័រហ្វេសប៊ុករបស់លោកកាលពីថ្ងៃទី ២៥ មករាថា អនុវត្តតាមប្រសាសន៍ដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន កាលពីថ្ងៃទី ១៨ ខែធ្នូ ឆ្នាំ ២០២១ លោកបានសម្របសម្រួលជាមួយលោក សុខ គង់ អ្នកវិនិយោគរមណីយដ្ឋានភ្នំបូកគោ និងលោក ម៉ុង ឫទ្ធី ជាអ្នកជំនួញម្នាក់នៅកម្ពុជានឹងធ្វើការសាងសង់ផ្លូវថ្មី ១ ខ្សែប្រវែង ២៧ គីឡូម៉ែត្រ។
លោក ជា សុផារ៉ា បានបញ្ជាក់ថា៖ «ផ្លូវថ្មីនេះនឹងតភ្ជាប់ពីផ្លូវជាតិលេខ ៤ ត្រង់គីឡូម៉ែត្រលេខ ១៥៨+២០០ ឆ្ពោះទៅភ្នំបូកគោឆ្លងកាត់តាមដីសម្បទានសេដ្ឋកិច្ចចម្ការដូងប្រេង។ អ្នកឧកញ៉ា សុខ គង់ ទទួលរ៉ាប់រងការចំណាយស្ថាបនាផ្លូវ ហើយអ្នកឧកញ៉ា ម៉ុង ឬទ្ធី ជួយឈូសឆាយដើមដូងប្រេងដើម្បីបើកផ្លូវ»។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ មិនអាចទាក់ទងសុំការអត្ថាធិប្បាយបន្ថែមជុំវិញគម្រោងសាងសង់ផ្លូវថ្មី ១ ខ្សែនេះបានទេកាលពីថ្ងៃទី ២៦ មករា ដោយលោកមិនលើកទូរស័ព្ទ។ ប៉ុន្តែលោក ជា សុផារ៉ា បានបញ្ជាក់យ៉ាងខ្លីប្រាប់ភ្នំពេញ-ប៉ុស្តិ៍កាលពីថ្ងៃទី ២៦ មករា ថា ក្រសួងនឹងប្រកាសព័ត៌មានលម្អិតពីគម្រោងសាងសង់ផ្លូវនេះក្នុងពេលខាងមុខ។
លោក ម៉ុង ឫទ្ធី ដែលចូលរួមវិនិយោគក្នុងការសាងសង់ផ្លូវ ១ ខ្សែនេះបាននិយាយថា លោកនឹងចូលរួមឈូសឆាយដើមដូងប្រេងរបស់លោក ដើម្បីបើកផ្លូវ នៅពេលណាដែលផ្លូវ ១ ខ្សែនេះត្រូវបានស្ថាបនាឆ្លងកាត់ចម្ការដូងប្រេងរបស់លោក។
លោកបញ្ជាក់ថា៖ «ពេលនេះ ឧកញ៉ា សុខ គង់ អ្នកវិនិយោគភ្នំបូកគោដែលត្រូវធ្វើផ្លូវឆ្លងកាត់ពីបូកគោរហូតមកឡើងនៅផ្លូវជាតិលេខ ៤ ដោយឆ្លងកាត់ចម្ការដូងប្រេងមួយចំណែកធំ។ ចំពោះខ្ញុំជាអ្នកធ្វើសម្បទានដីចម្ការដូងប្រេង ដែលលោកឧកញ៉ា សុខ គង់ ចេញលុយសាងសង់ផ្លូវ និងមានការសម្របសម្រួលពីក្រសួង និងអភិបាលខេត្តផង នឹងធ្វើការសាងសង់ផ្លូវប្រវែង ២៧ គីឡូម៉ែត្រនេះ»។
លោក ឃាង ភារម្យ អ្នកនាំពាក្យសាលាខេត្តព្រះសីហនុបានប្រាប់ភ្នំពេញប៉ុស្តិ៍នៅថ្ងៃទី ២៦ មករាថា ថ្នាក់ខេត្តទើបតែបានទទួលព័ត៌មាននៃការបង្កើតផ្លូវថ្មី ១ ខ្សែនេះដែរ ប៉ុន្តែគម្រោងនៃការសាងសង់ និងការចំណាយថវិកាលើការសាងសង់នេះ គឺលោកមិនទាន់បានដឹងច្បាស់នោះទេ។ យ៉ាងណាក្នុងនាមខេត្ត លោក ឃាង ភារម្យ បានអះអាងថា រដ្ឋបាលខេត្តនឹងចូលរួមសម្របសម្រួល ជាមួយអាជ្ញាធរពាក់ព័ន្ធ ដើម្បីធ្វើយ៉ាងណាឱ្យការសាងសង់ផ្លូវ ១ ខ្សែនេះ ដំណើរការទៅដោយរលូន ព្រោះគម្រោងនេះក៏មានការឆ្លងកាត់ពីខេត្តកំពតមកផងដែរ។
លោកបានបញ្ជាក់ថា៖ «កាលណាយើងមានផ្លូវ គឺមានសង្ឃឹម ហើយក៏បានចូលរួមចំណែកសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរផង។ អ៊ីចឹងផ្លូវថ្មីនេះ គឺបានចូលរួមចំណែកក្នុងការជំរុញកំណើនសេដ្ឋកិច្ច។ បើសំដៅទៅវិស័យទេសចរណ៍ អ្នកទេសចរអាចធ្វើដំណើរដោយងាយស្រួល និងចំណាយពេលតិចជាងមុន បើធ្វើដំណើរពីផ្លូវជាតិលេខ ៤ ទៅភ្នំបូកគោ»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា សុំមិនបញ្ចេញយោបល់អ្វីចំពោះគម្រោងសាងសង់ដែលទទួលបានកាវិនិយោគពីសេដ្ឋីក្នុងស្រុកទាំង ២ នេះទេ ដោយគ្រាន់តែសង្ឃឹមថា ការស្ថាបនាផ្លូវ ១ ខ្សែនេះនឹងធ្វើឡើងប្រកបដោយគុណភាព ដើម្បីធានាដល់គុណភាព និងសុវត្ថិភាពដល់អ្នកបើកបរ។
លោកបានបញ្ជាក់ថា៖ «ខ្ញុំមិនមានយោបល់អ្វីចំពោះចំណុចនេះទេ គ្រាន់តែការសាងសង់ផ្លូវសុំឱ្យផ្សារភ្ជាប់ជាមួយនឹងការរៀបចំវិធានសុវត្ថិភាព ស្លាកសញ្ញាសុវត្ថិភាពអីអ៊ីចឹង ហើយការការពារ នៅពេលយើងសង់ផ្លូវអីអ៊ីចឹង ដើម្បីឱ្យស្រួលធ្វើដំណើរ»៕
វីដេអូ៖
